Kum 1886 a din tawh Arsenal FC hi kei chuan kum 2007 ah chauh khan ka tan ve a. Chupawh ka putea fapa leh kan te ber hian Arsenal an tan em avangin Football en ka tui chilh ve duh ka tih khan Arsenal tan tur in min ti a, ka tan ta a nih kha.
Thierry Henry chu ka player tan chhan a ni takna in kum 2007 chho vel ah hi chuan a vanglai a pel titih tawh a, a inhliam reng bawk nen a inkhel ka en mumallo a-Tv kan neilo bawk nen. Tichuan kum 2007 atanh chuan ka tan ta bur a, la tan reilo hle mahila tun ah chuan a fan ruhkawl ka ni ve ta reng mai.
Arsenal tan a, chhimlam mi nih a, Synod nih bawk a ZNP han nih zui ngat phei hi chu kan te 'quit' a, mahse kan ruh hle thung!
Arsenal FC leh ka mizia hi a inang ka ti thin hle a. Beiseiawm tak leh tihfuh tum a a tha ber ni thin hian a hun tak ah kan zuzi a, mi beisei kan phalo a, mi nuizat tawk vel chiah in kan puitling teuh hle thin. Khawvel a club ropui ber ber Barcelona FC te pawh kan tukzal a, chutih rual chuan Man Utd in 8-2 in min sawp a. Bayern Munich in Champions League ah 10-2 (aggregate) in min sawp bawk! Chutih rual chuan English Premier League atanga Real Madrid hneh hmasa ber kan ni a, chumai nilo in 'Invincibles' team niin kum 2003-04 season ah kan champion bawk-tun thlengin kan la champion leh lo-EPL ah!
Chuti ang teh nuai chuan chanchin ngaihnawm leh ngaihnawmloh kan nei nuk a, kei ngei pawh ka ni. Mite hmuh ah puitling ve fu, a taka nawi ru phian, a hun a che fuh hlei theilo, mi hmuhsit tawk vel lek a beisei awm hian ka awm fo thin. Mahse Arsenal Fan ka ni hi lawmna nasa tak mai ka nei a, chu chu engdang nilo in ka Arsenal Fan pui te hi vawiin a ka thiantha ber ber te leh unau ang chiah a ka en te an ni-ka mikhualna Aizawl ah hian!
Lohtheihloh in Aizawl ah kum 4 aia tam Pathian zara ka dam chuan ka awm a ngai dawn a. Chutih laiin thisen zawmpui chhungte kan nei lem lo. Mahse Arsenal lam a ka thiante hi ka tan chuan ka chhungte an ni a. Ka mangan tawp a ka bula ding thin te, chaw ka eina leh ka tlukluhna, ka riahna leh ka tahna leh ka nuihna te chu anni-Arsenal Fan te ngei hi an ni.
Kei tehlul, an club tan Arsenal ang maia ngaihsakloh theihloh, ngaihsak tak tak dawn a puitlinglo leh rilru tina tu, an tan a tangkailo lo leh hnawksak ni fo thin hi Arsenal avangin min khawngaih a, min duhsak a, min tuamhlawm tlat zel thin-ka va lawm em!
Arsenal hi tan lo ila chuan tun ah te hian chaw eina, riahna leh tahna, nuihna leh hlimna tur te hi ka va van dawn em! Nangni avang hian ka lawm a, Arsenal ka tan avang a induhsakna ka dawn zozai-in mi hmangaihna leh khawngaihna hi ka rul zolo che u. Chunglam a mi khian a let tamtak in a rul ngei ang che u. Ka lawm e.
"Mi khawngaih thei takte chu an eng a thawl e; khawngaih an la hlawh dawn si a" (Mt. 5:07)
Comments
Post a Comment