Lalpa,
Ka boral a ka pilbo loh na tur a ka chunga i khawngaihna leh zahngaihna, min hmangaihna hi a va thuk em! Ka hmalam hun atan a tha zawk tur leh, nun tam nei zawk tur a min kaihhruaina hi ka lawm em em a; hreawm tih chang leh rilru nat vawng vawng chang nei mahila ka va lawm em!
Zahawmna leh nun hloh vek khawp a Internet ka atchilhna ruama min chhanchhuah dan te hi ka tan chuan a va ropui em! Ka awm pangngai ang ringawt chuan Online te hi ka sim theilo a. Mahse ka hmangaih ber min chhhuhsak a, chu chuan ka nun a vaw chhia in thih hial duhin, beidawnna ruam ah ka lut a. Mahse chuta tang a min hruaichhuahna leh min kal tir i duhna ka hriatchhuah hian ka va lawm em!
Nun tak, rim tui, mi te tana malsawmna nun nei tur chuan ka duh ber hi min lo laksak ui reng reng lo tiraw? He ka nun rimchhia, zahpuiawm ngawih ngawih leh i rilru tina fo tu hi i tan i duh tlat a, i duh ang a ka nun theih nan i la chhuak a. Kei teh lul hi heti em em a 'tinge min lo hmangaih? Kei aia tha, fel leh tling zawk te an tam nen! Enge i hmaah ka sawi ang-ka lawm e tih mailoh chu.
Nangmah aia ka hmangaih ka thlan zawk hi i phallo a, amah a ka rilru zawng zawng ka pek hi hun i tilo a, tul i tilo. Mahse min laksak hi chu ka uiin ka rilru a na em em tih chu i hriatchian kha. Mahse chuta tang chuan nangmah chauh belh tur ka nei tih min hriatchhuah tir a. I duhna leh i thuawih tur a min kohchhuah dan kawng hi na tiin tap nasa em em mahila, tun ah hian ka va lawm si em!
Mi beidawng ber te nun min dai tir a, mahni intihlum duh te rilru hriatthiamna min pe a. Nangmah tello hlimna chu a tawp ah tahna leh inchhirna, beidawnna leh tihna kawng zawhna a nih zia a takin min hriattir a. Nangma tello inngaihzawnna chu a tlo lohzia min hriatchhuah tir a. Heti tak a kei teh lul thil ropui leh tha min zirtir duh hi ka va phulo in ka va lawm em!
Nangmah ah chiah innghat a, a zawng zawng a ka neih phawt che chuan engkim-ka duhtuhsam aia tha leh ka phuloh thleng in min pe dawn tih hi ka hrechiang a, ka ringhlel ngailo. Chu nun-i lal ber na leh i kaihhhruaina nun nei tur chuan ka tlinlo a, mahse min kai lui duh hi-na in hreawm eng ang mahse ka va lawm teh lul em!
I ta tak tak ni tur hian ka duh ber leh hmangaihber pawh min chhuhsak hreh lo a, a tul a nih chuan ka nunna ngei pawh hi i la hrehlo ang tih ka hrechiang. Chuti khawpa kei teh lul min hmangaih avang chuan hmangaih let ve mailoh che chu tih theih ka neilo a. Chumi tur a kei mai mai min lo thlang hi ka va lawm em!
Van in kawng ka bo loh nan ka ban ah min kai tlat la; ka hmangaih reng theihna tur che in eng hmarua pawh hmangin min chelh tlat ang che aw? Khawngaih takin ka thlah lai che pawhin min chelh tlat la, i duh anga ka damchhung nun ka hmazawh theih nan min kalsan ngailo ang che.
Amen
Comments
Post a Comment