MIN HRILH THEI EM?

1. Hmangaihloh thut dan tur che min hrilh thei em?

2. I wall leh last seen check lo a awm dan min hrilh thei em?

3. Nang lo biak leh hram hram thin loh dan tur min hrilh thei em?

Hmangaih tawhloh dan che min hrilh lo in i kal thut a, i ngaihnep hlawh khawpin ka hmangaih phah ta che a ni.

Khi thu khi tunlai thalai tamtak te’n kan rilru a ni tiraw? Kan sawichhuak lo a, kan sawichhuak thiamlo a, mahse a rukin kan tuar ni tiraw? A chhanna kan nghak a, kan beisei a, kan zawng a ni. Ni e, tun hma angin lehkha kan inthawn tawh lo a, inbiak theihloh bur hi chu kan nei tawhlo a ni tiraw-Internet signal a that phawt chuan. WhatsApp leh Messenger kan hmang a, kan thlalak thar ber ber te, kan ‘DP’ leh ‘Pro-Pic’ te chu mit khap lar lek ah kan inthawn tawnin kan hmu zung zung tawh a, tawngka a kan sawi ngamloh thu thlum tak takte chu kan mut hmun atangin awm dun lo mahila kan inhrilh a, kan kur a, kan hlim a, kan tlaivar ti tih hial thin a nih tiraw? 

Thil thui tak la ngaihtuah thiamlo leh ngaihtuah thiam fu tawh te pawh kan tlukna bul ber chu Hmangaihna thumal vang hian a ni tlat a. Tleirawl lungmawl tak leh rilru thianghlim tak kan ni a. Kan duhte lakah ui chin leh thup chin neilo in kan lo khawsa a, chuchuan kan inkar a chhiat in nghawng thalo tak lo nei in kan rilru a hahin kan nun a buai a, intihhlum hial kan duh thin  ani tiraw-kan intihhlum phah  hial reng  bawk a!

Nun pangngai taka bul tan leh tum mahila kan sulhnu an lo ‘screen shot’ leh ‘photo’ te chuan min umzuiin min vau zui a. Kan thawpik a, kan bing a, kan inchhir thin. An tan kan inpek zawhna thuk ber thil te khan kan mualpho berna tur thil a lo keng tel tih kan hriat meuh chuan tihtheih kan nei tawhlo a, kan tap a, kan hlau a, kan khur  a.  Kohhran belin Lal Isua nen nun bul tan that leh tum mahila Setana chuan kan inbox hlui te, kan photo hlui te hmangin min lo vau in min lo bei a. Lal Isua ngaihdam tlak tawhloh nun bawlhhlawh nei a min puh a, kan tha hlei thei tawhlo a, kan thla a muang thei taktak lo a, kan mualphona vawrtawp lo langchhuak thut thei chuan kan bul ah lo lan tumin min lo vau ve reng bawk sia a. Heng zawng zawng bul tumtu chu ‘Hmangaihna’ tih thumal kan nunpui vang hi a ni tiraw?

Awmmawh vang leh sihhnip vang ngawr ngawr chuan heng WhatsApp leh Messenger a kan sulhnu te hian min ti buailo-kan duhna leh kan hmangaihna lungmawl tak vang zawk khan a ni kan buai thin. Zan khat thilthu mai ah mihrang niin kan inkar a lo chhia a, kan sulhnu leh thlalak te chu a lo chhe ve mailo a, kan mangang  a, an last seen leh wall te kan check a, kan hlimpui em em thin chu kan rilru tina tu, kan mittui titla tu an lo ni ta a, kan hrilh haiin kan hrethiamlo a, ko mahila a sawt tawhlo fo thin. Chung zawng zawng tihdamna leh chhana chu min hrilh thei em-tiin mi dang hi zawt a mahila kan damna kim chhanna min pe thei an awmlo. Thil pakhat chiah chhanna dik a awm-Lal Isua neih hi.

Kan inngaihzawn bul tanna atangin Lal Isua hi a lai ah dah char char ila, kan mualphona tur leh kan inchhir vawng vawngna tur thil hian hmun a chang theilo-kan WhatsApp leh Messenger a kan sulhnu ah leh a tak ah pawh. Mualpho kan hlauh vang a nau kan tih tlak te, kan thlalak leh kan inbox vang a min tihmualpho an tumna te pumpelhna tur leh thleng lo tur chuan Lal Isua nen bul kan tan hi a ngai a ni.

Kan thianghlimna-virginity hlu tak kan hloh lohna tur chuan Lal Isua nen ngaihzawng kan neih  a ngai. Kan hloh tawh hnu ah chuan kan inchhir zia chu a hrechiang ber tu leh a tuar ber tu kan nih kha. Lal Isua neih tum a bul kan tan thatna kawngah a tello a kan nun lo hman tawh sulhnu khan min umzui a, kan inpe pumhlum theilo fo thin a ni kha. A chang phei chuan kan beidawng in sual law law te kan thlang a, kan beidawn tak tak hnu phei chuan mahni nunna kan lak phah hail reng  a ni. A pawi vawng vawng!

Tun a i hun tawn mek hi ka hrelo a; eng dinhmun ah pawh lo ding la Lal Isua nen bul tan chawt mai rawh. Setana chuan i tawngkam bawlhhlawh ber ber leh i thlalak zahpui awm tak tak te chu lo ‘screen shot’ mahse hmangaihtu Lal Isua chuan a ‘clear’ vek tawh a. I ngaihdam dilna thu te, i inchhirna thu te leh i sualna zawng zawng nen a i panna thu leh nun zawk kha a save in a ‘screen shot’ tawh zawk a ni tih hre reng la, ringhlel lo in pan ang che.

I rilru hahna thuk ber te, i mualpho mai theihna te leh i nun zawng zawng chhiat vek theihna kha i rin ber te bul ah i sawi chhuak ngamlo a, i nun a vaw chau in i thlarau nun pawh a nghawng ngei ang. Chung zawng zawng chu Setana leh Lal Isua hian an hre vek a, sual law law thi hmak tur a duhtu che Setana nge i pan ang hmangaihna nen a ngaidam tu che Lal Isua? Chung zawng zawng lo nih tir tu che Setana chuan thlem in mahni inthiamlohna neih tir tlat che mahse hnawlin Lal Isua chu thlang tlat la, i mualpho a nih pawhin khawvel leh Lal Isua hian a tawpah chuan an ngaidam ang che. 

Hmabak tamtak ila nei a, nangmah ang a harsatna tawk mi tamtak te chhanchhuak a Lal Isua nei tur a fuih a zirtirtu che in Lal Isuan ‘model’ atan a duh che. Setana’n i nun tichhia in a ‘model’ ah lo hmang tawh che mahse, Lal Isua hmangaihna chuan a ngaidam che a, a ta ni tur leh nangmah ang a harsatna tawk mek te chhanchhuak tur in i kut leh ke, i sulhnu leh nunhlui te chu a duh a ni tih hria in hma lam lo pan ang che. 

 Lal Isua’n a hmangaih che.