KA ZUI TLAT ANG CHE (I HAVE DECIDED TO FOLLOW JESUS)

India ram atang a lo chhuak, a bikin Assam, North East India tanga lo chhuak ‘I have decided to follow Jesus’ tih hla hi Kristiante chuan hrelo kan awm awmlo e. Kum zabi 19-na laihawl a Welsh Missionary te chhungkua chu Lal Isua an rin tlat avangin an that a. Chhungkaw nu ber an thah hnu ah Pa ber chuan Lal Isua hi phatsan thei a niloh zia chu he hla hian a puang chhuak a. India ram thuhriltu ropui Sadhu Sundar Singh in a tih lar hnu ah kum 1959 ah American hymn editor, William Jensen Reynolds chuan siam tha in Assembly Songbook ah a telh a. Pathian thu hriltu ropui Billy Graham chuan a America-ah chawi larin khawvel pumin an lo hriat phah ta a nih kha.

He hla ropui zia hi ka ngaihtuah thin a. Hmangaihna ropui zia min hriat chhuah tir a ni. Ka hmangaih em em in min then thut a, ka va han buai teh reng em! Ka rilru a na in ka tap a, a bul a ka awm reng theilo a. Kan inkar siamtha turin hun ka neilo a, kan awm dun thei lo. Chutah chuan Pathian hnen ah tap chungin ka tawngtai a. Kan inkar min siamthatpui tur leh kan lo inthen ta nih pawh a pasal tha tak nei turin tawngtaina  nen a ka thlah liam chuan ka biang ah mittui a luang nasa a. Ka tawngtai zo chu hnamdang ho in Tawngtaina In pawn atang chuan min lo thlir thap a, mahse zak hlei thei ka nilo-ka hmangaih a ni!

Ka phone a, “ I lak ah ka beidawng theilo, min hnar fithlak thak hma chuan ka zui zel dawn che, ka kalsan dawnlo che. Engpawh thleng se thuthlukna ka siam tawh. I have decided to follow you” tiin ka hrilh a. Ka hun awl neih hmasak ber ah an in ah kal in ka kalsan dawn loh thu a bul ah ka hrilh a. Tukthuan ei dawn ah a bul ah thut ka duh thu ka hrilh a. Mahse chawhlui kan kil meuh chuan a bul a thut a rem chang ta silo a. Mahse tihdan ka hre chhuak thut a-dawhkan hnuai lam ah a chhungte hriatloh in a ke ka tlawh char char a; kalsan ka tumloh dan chu thu leh a takin ka lan tir a ni.

Chuti ang khawp a inngaitlawm a ka theihna zawng zawng nen a a rilru neih let tum a ka beihna chuan rah tha a chhuah a. Min hnar bur thei biklo a, ka tawngtaina tlawmte chu chhan in a awm mek tih ka hria. A ni ka hmangaihna aia thuk a min hmangaihtu Lal Isua hi ka dam chhung zawng a zui ka duh thu tap chungin ka lo la hrilh ngailo tih ka hre chhuak a. Ngaihdam dilin ka tawngtai a. He hla ropui tak hian ka nun ah thu a sawi a, Pathian hmangihna ropui zia hi chhang let tur hian kan theihna zawng zawng hlan hi a lo tul tak meuh a ni tih ka hre chiang thar hle.

Heti ang taka zui duh; harsatna leh thihna hial pawh tawk mahila a lam a rilru pe tlat a zui tum tlat, thil dang thlang duhlo tute hi Lal Isua’n a va lo chhinchhiah teh reng em! Amah zui duh te chu Lal Isua’n a hnar lo a. Khawvel mite hmuhsit leh endawng, tihduhdah leh thihna hial pawh tawk se, ‘KA ZUI TLAT ANG CHE’ titu te Nunna Lallukhum ropui tur zia hi aw! Chuti ang a theihna leh nunna zawng zawng nen a Lal Isua thlang tlat tute avang hian nang leh kei hian Chanchin Tha-Lal Isua min chhandamna ropui chu kan lohriat phah a, chatuan nunna kan lo neih phah a sin. Lawmthu hi sawi sen a nilo a, thihna pawh in a then theihloh Lal Isua zui tlat tute avangin nang leh kei hian Lal Isua chu kan neih phah a, chuti kau a min hmangaihtu Lal Isua hi kan zui ve tlat dawn lawm ni? 

1. I have decided to follow Jesus;
   I have decided to follow Jesus;
   I have decided to follow Jesus;
   No turning back, no turning back.

2. Though I may wonder, I still will follow;
   Though I may wonder, I still will follow;
   Though I may wonder, I still will follow;
   No turning back, no turning back.

3. The world behind me, the cross before me;
   The world behind me, the cross before me;
   The world behind me, the cross before me;
   No turning back, no turning back.

4. Though none go with me, still I will follow;
   Though none go with me, still I will follow;
   Though none go with me, still I will follow;
   No turning back, no turning back.

5. Will you decide now to follow Jesus?
   Will you decide now to follow Jesus?
   Will you decide now to follow Jesus?
   No turning back, no turning back.