DI HLUI

A KHUHHAWNNA: Pawl sawmpakhat kan zir kumin ka țhianpa'n Harriet Colney hla sak 'Di Hlui' hi min ngaihthlak tir a, chuta ka țhianpa thil min hrilh chu ka hre reng țhin...ka țhianpa aimahin he hla 'Di Hlui' hi ka ngaithla zing tawh zawk awm e.

ENGA TI NGE?

    A chang hi chuan khawvel hi kan rin dan ang a nilo fo a, khawvel rindan ang hi kan nilo fo bawk.

    Kut invuan rialin duhthu lo sam dun fo tawh țhîn mahila, hunin min liampui a, rokhawlhna leh harsatna hrang hrang avangte hian kan hlimpui em em țhinte hi țahpui vawng vawng a ngai a, kan nuih pui iar iar țhinte kha sulhnu mai an lo nizo tawh țhin a. Kan thunun theihloh thil hian min tlakbuak a, kan hun zawng zawngte hi a danglam zo țhin a ni.

A THAR LEH ȚHÎN

     Ni e, zanah Thla a han êng rüai a, van dumpawl thiang tak maia arsi eng pheuh pheuh te chuan suangtuahna chu lunglenna-ah a rawn hruai lut a, hlim taka an pahnih té chauha khawvel an lo hman dun tawh te chu nimin ang maiin a lo lang chiang leh fo țhîn a.

     Han kohkir leh theih se, thinlung leh tihtakzeta ngaihdam indîl tawnin he khawvel hi hmachhawn dun leh pawh a duh fo țhîn ang. Mahse...kohkir leh theih rual a ni tawh silo a, an liam vang vang tawh mai dawn a ni.

I NGAI VE ȚHÎN EM?

      'Valentine's Day' a lo thlen changte hian rawn hrechhuak ve leh țhîn tak ang maw? Hmanah chu he nî a lo thlen khan engtiklaimah a theihnghilh theih tawhloh turin ' Ka hmangaih che' tiin thinglung zawng zawngin a hnenah a lo kal a; ni duhawm leh ni lawmawm tak kha a va ni chiang em!

      Chuta țanga khawvel thar a an pahnih chauhva awm dunin an hma lamte chu hmangaihna nen an suangtuah dun fo țhîn a. Kut in suih rial in an tan ' Dar Rimawi' a rîk ve hun turte chi an ngaihtuah a, an sawi dun fo ta ve ang!

       Mahse engtikah mah chu 'Dar Rimawi' chu an tan hian a ri ve tawh ngailo anga, mi dang tu emaw nen a rîk a ngai tawh dawn a ni.

INTAWN LEH CHANGTE CHUAN

       Inhmuh leh ni a lo thleng a, inhriatchhuah leh ni te a lo awm a; inngaihsak loh thei loh changte pawh a lo awm leh țhin. Rilru chhungril berah chuan hlim tak maia bul han țan leh duhna awm mahse, biahthu inhlan a rem tawh lo a, duhsakna inhlan a ngai tawh si a. Mahse mi induhsak ber ber te zingah chuan an tel ve ngei ang.

       Engkim kha chu a la ngai a. Thla pawh mawi takin a la êng a, tlangsam te pawh mawi takin an la par a. Tlai ni tla pawh a la mawi em em reng a, mahse an pahnih erawh chuan an danglam tawh a, engkim huam a thil țha intihsak leh duhna rilru pawh la pu fo mahse hmanlai ang chang zo tawh a. Khang hunte kha hun vek chuan hmanlai leh sulhnu ni tawh turin a liampui ta vang vang mai si a.

MIN NGHILH BIK SUH AW..

       Inhmangaihber țhinte chuan hmangaih dang an neih a ngaih tlat tawh avangin thil hlu leh ropui tak an inngen ngam tawhlo a, tuemaw tan an indahțhat a ngai tawh a ni.

 

      Engkim inpe in engkim inhlan tawn fo tawh mahse tunah chuan inngaitlawm tak chungin inhre reng tur chauh in an chah lawm lawm a. Tar chhia mai an lo nih a tapchhak kîl a suangtuahna chauh an kawm hun a lo thlen huan ah pawh hlim taka an nui dun rî khan thinlung chhungril ber chu a la luah fo ang.

   Ka ti ta deuh, tuemaw nen a kan hun tawn a hlut a a san zawh poh leh lunglên a na ting mai dawn a lo nih hi maw........

(21/10/2009 @Lunglei Gov't College Magazine)