KOLKATTA AIRPORT

Mi fate chuan Airport hi vawi tamtak an hmu tawh ang a; a bikin Kolkatta Airport ngat phei hi chu Zofa-pawisa nei țențawn tan chuan thingtlang pa Aizawl hmuh aia tam an hmu tawh ang chu! Chuti ang teh nuai chuan kan hmuh zin leh zinloh chu a inchen lo zung dawn a, kan hmuh ve dan han sawi ve tawp mai teh ang.

Engtik kum a an sak leh din nge tih vel chu ka sawi dawn lo a, internet ah en tur a awm teuh tho ang. Taxi in Kolkatta Airport ka pan a, hnamtin chitin hi an lo awm teuh a. Zing dar 7:00am lek nimahse mihring an tam tawh hle a. Hmeltha tak tak leh class hmel tak tak an awm teuh a, hmeltha lemlo te pawh an awm. Kei ang thingtlang pa ro ve tak, ro ti belhchhah tur zawng a sam sen deuh thur hi chu ka hmu lo-ka awmna ah chuan.

Hnam hrang hrang-Sap, Vai hnam tha leh chhia, Mizo leh Chakma te nen lam kan awm a. Lengpui Airport pan tur te thutna chu an la hawnloh avang chuan ka thu mai mai a. Mi nungchang vel chu ka thlir kual mai mai a; an incheina leh an khawsak phung vel atang chuan cheng nuai khat theuh chu an Bank Account ah a awm vek a rinawm-mahse kei chuan Bank Account ka nei lo.

Thlawhna a lut tur buaipuitu nula sawn tunge a star ve ang??

Thlawhna chhung pan tur te Ticket lo endiktu nula te chu an nalhin an hmeltha hle a. An hna an tlinin an incheina pawh a nalh hle a. Bialpa te an nei ve ang em, khawi khua nge an nih ang, ISL an en ve ang em, Arsenal Fan an ni ang em,  zin veivak an dawnsawn tawhte zing ah star an nei ve tawh ang em, an bialpa te hi khawikhua nge ni ang adt....chuti ang zawhna chi hrang hrang te chu va zawt turin chanchinbu mi ka nih loh bak ah min chhang turin hun an neilo a, ka tawng thiamin a daih hek lo.

Thlawhna hi Tv leh vansang a a thlawh bak ka la hmu ngailo a, hnai taka han hmuh te chu a nuam ve ang reng khawp mai-kei thingtlang pa tan chuan. Khuti ang Airport building ropui tak mai hmulo a fam chang ta te an awm teuh tawh tih hriat chuan vannei ka inti fu a, ka chapo tep. Mahse ka'n ngaihtuah ngun a, America, Paris, England, Burma adt te hmu miahlo hian ka fam dawn tih ka inhriatchhuah nghal avang erawh chuan ka chapo rei lo kher mai!  Pathian in min dahna hmun apiang a lungawi thei zel nih hi a va lo hlu dawn em tih ka hriat phah!

Airport ah chuan ka ril a tam ang reng hle mai a, mahse Coffe no khat kha ₹ 100/- an ti mauh mai a; kei thingtlang pa chawheh tan chuan nghei mai kha ka duh zawk-pawisa ka neihin a daihlo!Kan thlawhna kha Air India thlawhna a lo ni hlauh a, eitur an lo sem hlauh chu tihzia hle! Kan hma a thu te seat hnung chu dawhkan angin a hman theih tih te chu ka thutpui te'n an han kaihparh tak ah chuan ka'n hre ve hnuhnawh a! An fian min pek kha ka ti tla vek a, ka thutpui pa chuan min pe ta ringawt a. 

Lengpui kan pan chhungin ka chuanpui te titi ka'n ngaihtla a, sum leh pai an neih hmelin an changkang hle ang tih ka ring nghal a. Ka rin aiin an lo hausa vek-Lengpui Airport ah an Private Car in a lo hmuak vek mai! Car a hmuak tu neive lo te pawhin Taxi an la a, an tlan liam zung zung mai. Engtin nge Aizawl panin ka chhoh ve nghal ang aw-tiin ka inngaihtuah a. Ka wallet zawrzet ah chuan Aizawl panna khawp pawisa chu a awm a, mahse Lunglei lam te Sumo a pan a la ngai nen-ka inngaihtuah reuh reuh a.

Chutia Taxi contri' pui tur ka melh rauh rauh lai chuan ka bula thu nutling chuan a chuan chhohna tur Car a chuang ve turin min sawm hlauh mai a, Pathian hnen ah lawmthu ka sawi a, Pathian khawngaihna chu ka chungah a tak ngeiin a lo lang leh ta a ni. 'Tichuan Aizawl pan in kan chho a. Tlawnglui kan kan lai chuan a kam a nufa za-fapa 2 leh fanu 1 nei chuan rawra an lo chhu keuh keuh a. A fate chuan thawmhnaw chhe te te an ha a; min lo en zawk a; a rilru ah chuan mi hausa tak fapa-private car nei, Thlawhna hmang a zin veivak thei ah min ngai niin ka hria a. Mahse a nihnatak ah chuan a dinhmun ai chuan ka rethei zawk a, kan khua ka thlen veleh chempui nen lo ka vat leh nghal dawn a ni.

Pathian zar ah Aizawl chu tluang takin kan thleng chho a, a tuk lam ah kan thiante ho nen kan inhmu khawm nak nak a, a nuam in dam man a awm ka ti hle. Airport atang a mahni in lam pan theuh theuh ah kan luhna tur in chu inthlau hlawm hle mahse him taka min hruai thlengtu Pathian chu fakin awm rawh se!