Johana 15:16a- “ Nangni’n mi thlang lo, keima’n ka thlang zawk che u a”
Hmangaihna in a ken tel tlat leh a phut tlat chu hmangaih let ve hi a ni. Phut let neilo hmangaihna chu a puitling theilo a, chatuan a hawlhtlang theilo. Hmangaihtu hmangaih let velo chuan amah hmangaih tu bul ah chuan a awm theilo a, a chhanlet loh avangin pumkhat anni thei ngailo.
Ka hmangaih em em-kan pahnih a damchhung hun hman dun ka duh em em chuan sawilawk leh chhuanlawm awmlo in min then thut a nih kha! A rilru tak tak chuan min hmangaih a; mahse ka tan a rinawm theilo. Midangin a par an tlan in an chen a, chung ka hriatte chuan ka tliak zo vek thin. Rinawm takin ka tan awm thei se chuan a tan hian engtik laipawhin ka inpeih reng a, ka hmangaih takzet tih pawh a hria. A inchhir a, lo let duh mahse a rinawm thei silo a, a thinlung min pe tih sawi reng chungin a taksa erawh midangin an chang fo thin a, ka na a, zak a, ka tap.
Lal Isua chuan ka hmangaih che-tiin thu leh a takin min hrilh in min hmuh a. Keipawhin ka hmangaih tih ka hrilh. Ka damchhung mai bakah ka thih hnu ah Chatuan Nunna min pe bawk. A rawngbawltur in min thlang a, ka hmangaih che ti reng chung in a hnen ah ka awm tha peihlo a, nula, zu leh sa te nen ka hun ka hmang a-ka hmangaih che ti reng chung in. Lal Isua chu a rum a, a kun a, a ngui a.
Ka hmangaih chuan ka rilru i luah ber tiin a harsatna te min hrilh a, dawhthei takin ka ngaihthlaksak a. Chinfel ngai ka chinfel sak a, puih a ngaihin ka theihtawk piahlam in ka pui thin. Ka tan a inpumpek ka beisei tlat a, a rilru in min hmangaih tih ka hria a. Chutih lai mek chuan hmangaih leh duh dang a neih thu min hrilh in-an awm dun mek thu min hrilh a, ka hria. Ka suangtuah a, ka ngaihtuah a, tah ka tintuah a.
Ka damlo a, Lal Isua hnen ah ka tawngtai a, damna min pe a. Ka lungngaihna leh ka harsatna zawng zawng a hnen ah ka thlen a, ka boral loh nan thihna leh thawhlehna in min chinfel sak a. Hmuhsit leh endawng ka tan a tuar a, atan ka rilru zawng zawng pe velo in amah be tur a ka inkhawm laiin ka ‘Cell Phone’ ka khawihsan a. Lal Isua chu ka tan a mittui, a thlantui, a thisen a far a.
Min ti na reng tu ka hmangaih em em chu kalsan hlen tumin ka rilru ka siam a. Ka kuta a zungbun min pek chu ka paihbo a, theihnghilh hlen tumin ka rilru ka siam ta a. Biak leh ka chak pawhin ka insum tang tang a, amah theihnghilh hlen chu ka tum ta bur a. Ka nghak tawhlo a, ka thlang tawh lo.
Ka tihnat reng Lal Isua chuan ka tan a hmangaihna tawplo a min hmangaihna rilru chu tihtawp duh mahse-hmagaihna luangliam chuan min la nghak fan fan a. A tan a ka hawi let a ka rilru zawng zawng ka
pek hun chu min la nghak ta fan a, vawiin, tun, tun ah chiah hian hun min la pe a ni. Ka va phulo em! Ka thlanloh lai leh a rilru ka tihnat lai ber pawh chuan min lo la nghak reng tih chu ka hrechiang hle.
Ka hmangaih-ka rilru tina em em tu chuan Lal Isua rilru ka tihnatzia min hriattir a, ka va lawm em!! Rinawm taka amah hmangaih a pan tur chuan ka rilru ka siam a, ka hmangaih pawh chu ka tawngtaisak bawk a. Engkim kalsan a zui leh a zawng zawng a hmangaih tuirin, a tana rinawm tlat turin ka rilru ka siam ta.
Aw Isu, nangmah hmangaih tlat tur che in min pui ang che aw-tun atanga chatuan thleng in?
Comments
Post a Comment