TAWNGTAINA TLAWM LEH HLU

"Aw Lalpa,

Chaw leh thil tinreng min pek avangin kan lawm e;

I rawngbawl turin min pui la,

Isua Krista hmingin kan dil a che-

Amen"

He tawngtaina thu hi ka hriat hmasakna ber  chu Anganwadi kan kal laiin kan hotu te'n min zirtir thin a, chaw ei dawn a tawngtai dan tur a ni ti a min hrilh avang khan chaw kan ei dawn apiangin he Tawngtaina thu hmang hian ka tawngtai thin-ngaihzawng neih kan chin thleng in!

BA kan zir zawh tawh hnu, nupui pasal neih kan ngam tawh hnu ah, ka thiannu pakhat-kei aia upa chuan he tawngtaina hmang hian an chhungkaw chaw ei dawn ah a tawngtai a. Nula a pumpa, naupan lai a tawngatina min zirtir hmang a tawngtai kha a zak ru hle tih ka hria a, zawite in a tawngtai nghe nghe.

Ni e, puitling kan nih tawh hnu chuan he tawngtaina thu hi kan hnualsuat in, kan mamawh zawng zawngte a funkimlo deuh ni a ngaiin, Biak in leh engmaw thiltih tawngtai ah chuan kan hmang ngai lo a. Tin, naupang kum 10 hnuailam chin tawngtaina atan kan ngai deuh bawk.

Keima tawk ah ngun takin ka ngaihtuah ta a. He tawngtaina nun neitu hian tawi kim leh fel fai si a he tawngtaina thu a lo chham chhuak hi a hlu ka tiin, ka ngaihtuah ngun poh leh a mamawh zawng zawng a fun kim in a nun hausak zia hi ka ngaihtuah a, ka awt thin.

Kan nitin mamawh chu Chaw a ni a-a chhan chu kan nunna hnar a nih vang a ni. Nun leh dam kan duh avang hian thil tamtak kan ti a. Kan lo hrisel a, kan lo hlim theih nan eitur tha leh thawmhnaw tha, motor nalh leh changkang te kan duh a. Heng zawng zawng bul hi-nuam tak leh hlim tak a kan nun kan hman duh vang ani a. Chu kan duh chu he tawngtaina nun neitu hian a tir ah-Chaw leh thil tinreng min pek avangin-tiin bul a lo  tan diam mai!

Chaw leh kan nitin mamawh min petu Pathian hnenah lawmthu a sawi a. Rilru thianghlim tak pu a he tawngtaina hi a sawi avangin a thil neih-Chaw leh thildang te hi Sorkar sum a eiruk a tang a a neih a nih a rinawmloh a. A thenawm khawvengte pawhin a hlawh leh a thil neih a inphulo ti a an sawi ruk sep sep mihring a nih loh hmel bawk. Tin, a thil neih chu engpawhnise, Pathian hnen ah hlim tak mai a lawmthu a sawi theih avang hian a lungawiin, sum leh pai vang ringawt a hausa a nih a rinawmloh a, sum nilo nun hlima pawh a nei tih a hriat a, nitin a chaw eitur nei mihausa tak a ni bawk. 

Thil tinreng min pek avangin -ti a tawngtai theih avang hian a mamawh engkin chu Pathian in a pe a, a lungawi hle tih a hriat a. A thenawmpa neih ah a buailo a, a tlukpui ni a a hriatte aia rethei zawk ni a midangin kan ngaih laiin engkim a neih thu amah in a hria a, mi itsik leh awt reng reng in hun a hmanglo tih a hriat. A hlawh zat ang hlawh te'n an hlawh phulo a Car thar ber ber an lei a an hlim loh laiin, a ni chuan tawlailir pawh nei  ve miahlo mahse a vuilo ang tih a hriat a. Diklo tak sum leh pai a invur a tum a rin awmloh a, ACB-te'n a sulhnu an enthlak reng a rinawmloh bawk. Tin, Anticipatory Bail hi a mamawh ve miahlo ang tih a chiang hle bawk!

Chumai ala nilo, I rawngbawl turin min pui la-ti a a la tawngtai zel te hian Pathian tan a mi tangkai, Lal Isua thupek zawm a khawvel zawng zawng a Chanchin Tha hriltu nitur a amah pui tuirn Pathian hnen ah a la dil zui a nia, a va ropui em! Sual zep ruk leh thil thalo ti thin nise Pathian hnen ah a rawngbawl tur a dil hi thil harsa leh hlauhawm ber a ni dawn si a, a nun hi ava ropui tak em!

Heti ang nun nei tur hian nang leh kei hi Lal Isua'n min thlang a, a tihhlawhtlin chu kan mawhphurhna a ni. He tawngtaina thu tlawmte a innghat ngama nunpui thetur hian nang leh kei hi Lal Isua'n min sawm a. A ram leh a felna kan zawn hmasak phawt chuan kan mamawh zawng zawng hi min pek a, belhchhah min tiam a sin! 

Dak la, en rawh; Pathian neilo nun chuan sum leh pai, hmelthatna leh duhawmna, finna leh hmingthanna te hi nei mah se, nun tak-chatuan a nunna chu a neihloh avangin a khua har a, hlimna tluantling a nei ngailo.Lal Isua lo hi nun hlimna dang reng reng a wmlo a.  Lal Isua neitu chuan khawvel thil engmah neilo mah se nun hlimna thuruk a nei a, chatuana nunna a neih avangin a hlim a, a eng a, a parchhuak thin. Midangte tan malsawmna a ni a, a mamawh chu pek belchhah in a awm thin. 

Hawh, Lal Isua hi i nei tlat ang aw? Chuchuan nunhlimna thuruk min pe ang nga, he khawvel piah ah pawh chatuan nunna chu kan ta a lo ni ang. Tin, he khawvel anchhedawng ah pawh Lal Isua nen chuan-

"Aw Lalpa,

Chaw leh thil tinreng min pek avangin kan lawm e;

I rawngbawl turin min pui la,

Isua Krista hmingin kan dil a che-

Amen"

tiin hlim leh lawm takin kan tawngtai thei dawn bawk si a!!!