Kum 2013 khan Zobawk Vengthlang Branch KTP chu Tlabung Zodin Branch KTP te'n min lo tlawh an tum a. Tin, Zobawk Pastor Bial KTP Meet chu kan Branch chuan kan thlen dawn bawk a vangin Fellowship-na tur atan Pandal sak nise kan ti a. Tichuan BKTP Meet hma kar chiah in Tlabung Zodin Branch KTP te chu min lo tlawh turin kan ti a. Branch lian kan nilo a, member pawh a lu nungin 21 vel kan ni țhin.
Pandal kan sak dawn chuan Mau put a ngai a, KTP hnatlang kan inko a-kan chhuah that chuan mi 14 te kan chhuak thin. Kum tawp lam a nih bak ah member te kan chakloh lai tak a nih a vangin hnatlang kan kal that theih ka ringlo in, ka beidawng ru hle a. Ka rin ang ngeiin kan Kohhran Upa fapa kum 13 mi, kan Tual Upa-KTP Over tawh-a tulna vang a KTP a min la tel pui nen, kan 3 chauh chu hnatlang tur chuan kan chhuak a. Kan kalna tur Motor chu kan Leader in a lo khalh mek bawk a-kan vaiin 4 kan nih chu.
Mi 4 lek tan a Pastor Bial khat daih Fellowship-na tur sakna daih khawp mau pum han sah chu ka huphurh em em a. Kan Biak In kawt zawn thlen chuan kan Tual Upa chuan hnatlanga chhuak te thingpui inna tur No han la turin min tir a nih kha. Beidawng ru ang reng takin Biak In lam chu ka pan a. Hnatlang tur dang kan awm tawh lo in beisei tur midang kan awmloh zia chu ka hrechiang em em a-a hminga Secretary ka nih avangin.
Biak In hnunga Thingpui No kan dahna chu ka hawng a. Ka rilru in ka tawngtai ta tawp a-" Lalpa, tun ah hian hnatlang tur chu mi 4 chiah kan ni a. Hnatlang a chhuak te tan Thingpui No hi engzat nge ka lak ang? Mi 4 lek tan chuan kan Mau mamawh zat hi kan sat chhuak thei dawn lo a. Chuvangin nangmah rinchhan in, No 7-i number hi ka la tawp a, mi 7 tal hnatlang a chhuah ka duh, min ti thlawn suh ang che" tiin ka tawngtai ta tawp a. Rinna nen no 7 chu ka la a, ngawi rengin ka thiante awmna panin ka chhuak ta a nih kha.
Tichuan kawngpui dung ah chuan kan Leader chu a motor-407 nen a a lo chhuak chu kan nghak ta a. Kan leader chu kan awmna a lo thleng tep tawh a, mahse midang hnatlang tur a lo kal belh tumah an awm lo. Mahse Pathian chuan Ama number zat ka lak Thingpui No 7 chu a tihthlawn ka ringlo a, mi 7 tal hnatlang kan awm chu ka ring a ni. Kan Leader chu a motor nen chuan kan awmna zawn chu a lo thleng a. Mi 3 chauh in kan lo nghak tih a hmuh chuan a hnual ve hlek tih ka hria.
Chutia Motor-a kan lawn dawn lai tak chuan, kan member pakhat-High School a LDC hnathawk chu a Bike in an inlam panin a lo tlan thla a-a thian te 2 nen(Kohhran dang a mi). Mi han hmuh chuan sikul an chawlh thu leh hnatlang tur a lo haw thu min hrilh a-a thiante 2 pawh chu a lo sawm thu min hrilh a. Ka ngawi reng a, Pathian hnathawh ropui zia chu ka hmu-mi 7 kan ni ta chiah mai. Lalpa chu fakin awm rawh se!
Ka lo beidawng a, ka lo zam hman a nih kha. Mahse Pathian chu a tlai ngailo a. Kan rin phawt chuan a che a ni tih ka hmuchiang hle. Chumai a la nilo-ka lo ring tlem mah mah a ni. Chutia kan insingsa buai vel hmu chuan kan member pakhat chu damtha lo chung chungin hnatlang tur chuan a lo insiam a , a lo chhuak ve chiah bawk a-a tir a 4 chauh kha mi 8 kan lo ni ta! Ka thingpui No lak aia tam Pathian chuan hnatlang tur min pe- a va ropui em! Lalpa chu fakin awm rawh se!
Kan rin a, Amah ah kan innghah a, Ama tan a kan thawh phawt chuan Pathian chu kan tan a che zel dawn a lo ni. Amen! A va ropui em!! Lalpa, kan tawngtaina tlawm tak te min chhansak a, i rinawmzia min hmuhtir avangin i hming chu fakin awm rawh se!
Pathian chu i rin phawt chuan-i rin ang zat chiah in i tan a che ang-i rinna aia tam pawh in!
Comments
Post a Comment