Johana 3:16- "Pathianin khawvel a hmangaih em em a, chutichuan a fapa mal neihchhun a pe a, amah chu tupawh a ring apiang an boral loh a, chatuana nunna an neih zawkna'n."
Bible chang kan tarlan khi Internet a Pathian thu zawn hlawh ber a ni e an ti a. A pawimawh in a hlu em em a, Kristian zawng zawng chuan he thu hi kan hre vek awm e. Lal Isua hi keimahni tan liau liau a lo kal a nih zia hi kan hriat nawn fo a tul awm e. Misual, Kebai, Mitdel, Rukru leh Pastor emaw pawh ni ila, Lal Isua hi kan ta a ni tho tho a, kan hnaih poh leh kan ta a nihzia a chiang thin.
He khawvela alo kal dawn pawh khan, damdawi in changkang leh tha kha a thlang duhlo a, ranchaw pekna thleng a lo thlang a nih kha. A chhan chu mi zawng zawng-mi rethei leh mi hausa te tan pawh a biak phak Pathian, engkim kan dil ngam leh kan duh duh kan thlen ngamna Pathian anih vang a ni. Khawchhak mifingte pawh khan an hai a , Herod-a in a a pian an ring a, an lut nulh anih kha. Mahse Lal Isua hi keini mi chhe te te, misual leh tawmkailo te tan a lo kal a nih avangin hmun tlawm tak hi kan tan a lo thlang ani.
Tin, Mosia hun lai atang a thu leh awmlo a den hlum nghal tur,-Hmeichhe Uire lai tak an lo hruai a nih kha. Tun lai hun phei chu nise a mualpho in, WhatsApp leh Facebook ah kan vawrh darh nasa in mi zawng zawngin tuibur hmuamda lek ah a uire thu kan hre nghal vek ngei ang a, a thlalak phei chu en ngam anilo ang.
Pharisai leh lehkhaziaktute pawh khan Mosia dan, Pathianin a pek hmang a tihhlum nghal tur a nih avangin Lal Isua bul ah an lo hruai a nih kha. Mahse Lal Isua chuan, Misual ber, thi nghal tur pawh chu ngaidamin, tisual nawn lo turin a chah a nih kha. Lalpa chu fakin awm rawh se! Kan sualna leh kan bawhchhiatna te chu khawvel mite hriat leh nung tlaklo tur khawp a rawng pawh ni se, Lal Isua ah chuan ngaihdam kan ni tawh a, sim a Lal Isua zui mai kha a ni kan tih ve tur. Hei hian Lal Isua chu kan tan ngei a lo kal a ni tih chiang takin a entir a ni.
Tin, Chhiahkhawntu Zakaia, mipuite'n an huat leh an ngei ruk em em, a eiru ni ngei an ngaih in ah khan Lal Isua khan chaw a ei tlat mai! Tun lai khawvel ang chu nise mipui te hian Zakaia chet dan hi RTI Act emaw CBI emaw in finfiah an duh maithei a ni. Chuti khawpa khawtlang a tuitla lo leh an ngei em em in a Lal Isua'n chaw a ei kha an hrethiamlo hle a nih kha. Mahse hei hian a entir chu-Lal Isua hi keini misual, mite pawhin min hnualsuat leh min entleu te tan ngei hian chatuan nun min pe turin a lo kal a ni tih a lang chiang hle. Zakaia ang a Lal Isua hmuh duh a theipui kung lawn duhna rilru kan put phawt chuan Lal Isua hian kan nun ah lo thlen a, hlim taka chaw ei a duh reng ani.
Tin, Judate'n an ten em em leh an hmuhsit ber hnam Samari hnam ngei kha Lal Isua chuan tehkhin thu ah hmangin mite tanpuitu leh mite tana thiltha titu a nih thu kan hmu a. Mite tan a thiltha tih kan sawi dawn apiang in Samari mi hi kan sawi chhuak ta ziah a nih hi. Khawvelin midangte tana thiltha a tih pawhin Samari mi hming chawiin-Samiratan, Samiratan Project adt kan ti ta zel anih hi. Khawvel leh Kristiante zing a hnam lar bel pawl an ni hial ang ti ila kan sawi sual awmlo e.
He hnam ber kher Lal Isua'n tehkhin thu a hman chhan hi engdang vang nilo in chitin hnamtin tan a lo kal a nih zia a min hriattir a, min zirtir a duh vang a ni. Brahmins (Hindu hnam sang ber) kan ni emaw, Dalits (Hindu hnam chhe ber) kan ni emw, Lal Isua hi kan ta vek a ni a, Pathian chuan kan tan, angkhat vekin min pe a ni.
 |
| Ringlomi te hnen ah he thu hi ka sawi |
Misual thi tur, khawvelin a ngaihdam theihloh pawh ni ila, Kalvari tlang Kraws dinglam a an khenbeh Misual thi tur pawh ngaidam tu Lal Isua hi kan ta a ni tih i hre nawn fo ang u. Beidawnna, manganna, harsatna leh suahsualna thuk ber pawhin min nangin min chimbuai mah se, Lal Isua hian damna min pe a, thlamuanna min pe in kan sual min ngaidam a ni. Lal Isua hi kan tan chauh a lo kal a ni a, midang tan a lo kal a nilo tih i hre thar ang u.
I sim a, i pan a, i beisei phawt chuan Lal Isua hian Vanrama i thuthna tur kengin a lo pan che.
Comments
Post a Comment