KRISMAS

Luka 2: 10 & 11- Tin, vantirhkoh chuan an hnen ah, " Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu."

Kan tet lai kha chuan Krismas hi thawmhnaw thar neih hun a ni tih kan hria a, Tin ruai kan theh thin avangin nuam kan ti hle a. Lal Isua lo pian ni a ni tih chu bengin kan hria a, thinlung erawh chuan kawr thar leh ruaitheh hun tih a hre chiang thung. Tlangsam leh Japan hlo a lo par kha chuan kan ngah fan fan Krismas a lo thleng tep tih kan hria a, kan phur tin hle. Krimsas ruai kilna tur changel hnah kan pu thin a, a nuam thin khawp mai. A neinung deuh fa te'n halpuah an keng a, kan vawm puak dur dur zel a nih kha. 

Kan nu leh pa te'n Krismas kekawr min lei sakah  Pistol lem a awm kha chuan kan intithei hle a. Pheikhawk engthei bun ngat phei kha chu zan lamah kan ngaisang thin hle a. Krismas hma chiah a Pathianni a tlak tum in kan thiante'n Masi thawmhnaw ha in inkhawm mahse keini chuan Masi atan kan khek tang tang thin. He hun lawmawm tak kan hman theih nan a kan nu leh pa te thawhrim zia kha kan ngaihtuah phalo a, he hun neitu Lal Isua hlut zia kha beng chauh in kan hria.

Kan tleirawl chho a, ngaihzawngte kan nei tan a. Pathian in min hmangaih zia leh kan hmangaih let ve tur a ni tih te chu thinlung leh bengin a hre tan a. Sunday Sikul ah kan zir nasa bawk a, Krismas hlutna pawh kan hrethiam pha ve tan a. Kan ngaihzawngte'n min then avang a kan rilru natzia atangin kan sual avang a Lal Isua-min hmangaihtu rilru kan tihnat turzia chu kan suangtuah pha ve der der tan a. 

Mihringte inhmagaihna-tawp leh mai thin mah kan inthenin na kan tihzia kan ngaihtuah a. Pathian hmangaihna tawp ngailo kan lo hnawl thin hi chu Pathian rilru nat dan tur te kan suangtuah thiam pha ve a. Mahse, kan ngaihzawngte kan hmangaihna a tang chauh a kan teh avangin Pathian hmangaihna ropui zia erawh kan hre phalo.

Krismas kan hman fo hnu ah nupui fanau kan nei a. Kan fate hlut zia leh kan hmangaih zia kan hre chiang a. Chuti ang a fapa nei, a fapa mal neihchhun pawh  uilo a min petu Pathian ropui zia chu kan hriat chian pha ta hle a. A hmangaih em em leh a neih chhun A fapa min pek chu, lo dawng sawng tha duhlo a lo hnawl tu kan nih thinna chuan Pa rilru a nat thin tur zia te kan hriat phah ta uai uai mai!

Kum upa leh chaklo lam tak kan ni tawh a. Kan tan a lo piang Lal Isua faktur in kan tha a thum zo tawh a, kan che chhuak hleithei tawhlo a. Kan panlai hun leh kan vanglai hun te kan dawn kir a, theihtawp a Lal Isua kan lo faklo kha kan in ui a, kan dawn kir vawng vawng thin. Krismas a nihna anga hmanglo a, a nilo zawng a hman vanga mi lungngai tamtak te kan ngaihtuah kir a, siamthat sak kan chak thin.

Vawiinah erawh chuan chung thil hlui te chu kalsan ila. Kan tan a chanchin lawmawm em em lo thleng hi a neitu kan nih angin lawm takin i lo dawngsawng ang u. Naupang leh thalai, pitar leh putar  pawh ni ila, Lal Isua kan tan a lo piang hi lawm takin i lo pawm ang u. He khawvel piahlam thleng a nunna min pek avang leh, kan biak phak mai tur a ran chaw pekna thleng a a lo mut avang hian, Lalpa chu fakin awm rawh se