ENGE I PRESENT VE DAWN??

Thilpek (Present) in pek hi hlu in, a dawngtu nihpawh hi a hlu a, a petu nge a dawngtu nih hi nuam zawk ang tih chu a mihring a zir leh kan thilpek leh kan dawn a zir a nih a rinawm. Piancham lawmna leh Hlawhtlinna lawma thilkpek kan pek leh kan dawn chu a hrang țhin a. Tin pek tur kan neih chuan a dawngtu duh zawng leh a dinhmun a zirin kan thilpek tur kan lei a kan pe țhin. Chuti ang bawkin, kan mamawh tak leh kan duhzawng tak pek kan nih chuan kan lawmna hi a va belhchhah thin em!

Kum 2007 ah Pawl Sawmpakhat kan zir kum hian ka pian a hnulam ah Birth Day Present ka dawn hmasak ber niturin ka țhiante'n thil min pe a. Lehkha mawiin an tum thlap a, tlai sikul ban a kan in a ka haw hnu ah ka hawng a- Arsenal Logo awm chahbi khaina, Photo Album, 'Please Forgive Me' hla awmna CD Casette leh nepnawi awmna ka dawng a. Ka lawm em avangin ka mittui a tla a. Thingtlang naupang rethei leh engmah nilo khan he khawvel ah hian țhianțha te ka neiin, thilpek pek tlak a hlu ka ni ve tih ka inhriat phah a, ka va han lawm tak em! Thilpek ka dawn hrim hrim kha ka lawmna a nih rualin, ka duhzawng tak Arsenal Logo leh 'Please Forgive Me' hla Bryan Adams sak awm khan ka lawmna a belhchhah bawk.

Thilpek hlu ber kan dawnna, Lal Isua pianchampha "Krismas" ah hian Birth Day neitu Lal Isua hi enge i pek ve țhin le? Kum 25 chhung kan Lal Isua hi a piancham ah hian a duhzawng tak leh a lawm zawng tak hi ka pe lo mai nilo in, a țahna leh rilru natna tur thil ka va lo pe hnem em!! Zu leh sa, Drug leh Sex te hi thup tak leh mawi taka tuamin Lal Isua piancham lawmna a tan kan hmang țhin em? A dawngtu Lal Isua tan chuan a va na dawn em tiraw? Chutih rualin Setana tan a thilpek lawmawm ber a lo ni zawk si. Lal Isua piancham
kan lawmpuina thilpek ah hian Lal Isua hlimna ber thilpek kan pe em?

He hun lawmawm, khawvelin a hun neih hlut ber Krismas, Lal Isua kan tan a a lo pianna hun ah hian nang leh kei hian Lal Isua tan nge thil nge pek kan tum? He hun lawmawm, Chhandamna ni hi i tan boral hlenna ni, HIV i vei țanna hun, Nuthlawi Pathlawi i nih țanna hun, khawtlang leh kohhran, ram leh hnam i tihmualphona nî ah i chantir chuan, he hun neitu ber leh min hmangaihtu Lal Isua thinlung a va na dawn em! Hawh, keini chuan Lal Isua tan kan neih hluber kan nunna i hlan ang aw?

Mi hausa i ni lo in cheng tamtak man thilpek i lei theilo mai thei. Natna khuma ah mu in i chau hle emaw, ei tur neilo khawp a rethei i ni mai thei e. Tin, mi hausa tak sum leh pai hman sen loh nei pawh i ni thei e. Engmi pawh chu nila, Lal Isua piancham a Lal Isua'n i laka a thilpek dawn duh hlu ber chu i thinlung, i nunna chauh kha a ni. He thil chauh hi chu engmipawh ni ila kan neih vek hi tiraw?

Hawh, Pathian in thilpek hlu ber a fapa Lal Isua min pe a, chuvangin kan thilpek hlu ber dawnna champha Krismas ah hian kan neih vek, kan neih chhun, kan neih hlu ber kan thinlung hi Lal Isua i pe ang aw?