PATHIAN A INNGHAH

Sam 37:05- " I awm dan tur chu Lalpa chungah nghat la; Amah chu ring la, aman a ti vek ang"

Vawikhat chu kan awmna Odisha a hmeichhe naupangte kum 3 mi nen kan infiam a. Hlim takin kan inchhaih a, kan nui dun nasa hle. Chutia kan infiam lai chuan 'Plastic dawhkanté' chung a lawn a lâm a duh ta a. Keiin dawhkan chu a leh loh nan nghet takin ka lo chelh a. Mah se chu hmeichhe naupang chuan dawhkan ka chelh chu duhlo in a țap ta a. Hlim taka a lâmna tur dal tu ah min ngai a, a hlimna tur laksak tu ah min ngai a ni. Anihna takah chuan dawhkan kha chelh lo ila chuan a let ang nga, chhuat ah khan lo tla in a lu sawh se, a thih phah hial mai thei.

Heti ang chiah hian kan nitin nun a Pathian nen kan len dun hian, mihringte hian kan duhdan leh nuam kan tih dan in awm kan tum fo a, kan awm fo țhin. A chang phei chuan thil țhalo, Pathian min hlat tir a thihna hial min thlen thei ah te kal/awm kan duh țhin. Chuti ang hun ah chuan Pathian in min chelh a, kan himna leh kan țhatna tur zawkin min thunun țhin. Heti ang a Pathian in min thunun a min chelh hian kan hrethiam lo a,kan țap a, kan vui țhin. Pathian chuan min hmangaih talo in min kalsan ta emaw tiin kan vui hial țhin.

Mah se chu chu Pathian rilru a ni hauhlo a. Min hmangaih zia te, min vên nasat zia leh A ropui zia a  lanchhuahna tur chu kan duhdan nilo a Pathian duhdan a kan awm chiah hian a ni. Lazara chhungte chuan Lazara damloh lai khan Lal Isua kha lo kal se la, lo tidam thuai se tih kha an duhdan leh an rilru inghahna a ni. Mahse Lal Isua'n a thih hnu a a kaihthawh khân Pathian ropui zia chu khawvelin kan hriatphah a,  Lal Isua hi thawhlehna leh nunna a nih zia chiang takin kan hmuh phah a ni. Lalzara chhungte duhdan ang a a damloh laia tihdam nise la Pathian ropui zia hi kan hmulo ang.  Chuvangin Pathian kut leh A duhdan zâwk a mihring (Lazara chhungte) an innghah chiah khan Pathian ropui zia a lo lang chhuak a ni. Lalpa chu fakin awm rawh se!

Chuti ang bawkin Abrahama pawhin a hmangaih leh a duat em em a fapa Isaaka chu Moria tlang a Pathian in hlân tur a tih khan a mihring duh dan leh ngaihdan a ni hauhlo ang nga, a rilru pawh a na hle ang tih a rinawm. Mah se phunnawi lo leh a mihring duhdan nilo in Pathian duhdan zâwkin a fapa Isaaka chu hlaral thilhlan ah a pe ta a nih kha.

Abrahama'n Pathian thu a zawm chiah khan enge lo thleng kha? Pathian ropui zia chu a lo lang a, mihringte chung ah rilru chhia a put loh zia te, intumchawp Pathian a nih zia te a lo lang a. Jehova Jire-Lalpa tlang ah ngaihtuah a ni zêl ang-tih kha Abraham ațangin kan lo hriat phah zawk a ni. Amah a kan innghah a, a thu kan awih phawt chuan min ngaihtuah sak zel zawk dawn a ni tih a va lang chiang em. Lalpa chu fakin awm rawh se!

Engmi pawh niila, Pathian hian kan nun ah hian thil ropui tak tih a duh a, a tum bawk. Chu kan nuna thil ropui leh inthup chu tih lana a awmtheihna tur chuan Amah ah kan innghah a ngai a ni. Kan duhdan nilo in Pathian thu zel ngaichang ila, phunnawi lo leh ringhlel loin Amah ah chuan innghat tawp ila, chutah chuan Pathian ropuizia chu a lo lang ang nga, keimahni tan leh midangte tan malsawmna thlen tu, Pathian ropui zia puangchhuak tu kan lo ni ang.