YMA AW, LUNGLEI

THIANTE 

-Rinfela Zadeng 

*** An hmeltha emaw mi ngo an ni emaw, kawr nalhlo tak tak an ha thin emaw, kan mangan lai ber leh kan unau pianpui ni reng thin, min phatsan ngailo tu, min hmangaih reng thin tu, thilthlawnpek kan dawn hlu ber chu-Thiante... 

NGAIHZAWNGTE 

Kan rilru chhungril ber tha kan tih em em, zan mut hmun a kan ngaihtuah zui vawng vawng, mumangah hmu ila kan tih em em mahse kan hmuh theih siloh hun te a lo thleng a, a buaithlak thin ngawt mai. 

Zan dar 6:30 a lo ri a, kan lo duh ruk ve ngawih ngawih te In a len ve ngei kan duh. Thiante kan han sawm a, lut hmasa zawk tur a reife kan han inhnawn hnu-ah thiante nge nge chuan a changtupa chan zawk min han pe a, kan tan zah leh mualpho huamin kan `duh-i’ te kawngkhar min kik sak ta kauh kauh thin..thiante hlut zia hi aw.. 

SUM LEH PAI 

College kan kal a Bus kan chuan te hian chhungte`n bus fare daih pawisa min han pe a. Kan chhungte hian an ‘economy’ vang ai mahin ‘poverty’ vang zawk hian sum leh pai hi min paipawn hnem lem lo thin khawp mai. 

Hlauhthawn ang ngeiin Bus a lo awm remchanglo ngei a, taxi-a chuan te kha a ngai ta tlat thin a. Chutah bet lo zet in kan han chuang a, taxi fare han pek zawh chiah hi chuan In lama haw lehna tur hi tu ta nge ka puk ang-tih ringawtin ni kan han vui liam a. Inthlahrung taka thiante pawisa puk kan han dil chang hian ui hmel pu lo, hlim hmel pu chunga pawisa kan mamawh zat min han pek paha ‘ min rulh a ngai lo’ an han tih zui ngat phei hi chuan lawm avanga bianga mittui lo luang tur hi kan dang bet hram hram thin. 

HOTEL 

Ni 365 a ni 300 vel tehmeuh thiante bula class kal te, hna han thawhte chuan thingtlang zawk lama awm ta nafam chuan In lama haw mai lo remchan loh changte a lo awm a, riah loh theihloh changte a lo awm thin. Thainte`n phal takin an In lama riak turin min han sawm a, an chhungte`n zanriah min lo chhumkep tawh silo a, tlai hnuhnawh taka keimah avanga chawbel an han phit tir leh vut vut thin hi chu zahna leh thiante hlutzia sawiloh chu tih tur a awm lo. 

Hotel Bill ang phei chuan min han thing ta se kan chan chu chem lova lu lak te chu nep te..Mahse a thlawn mai nilo hmangaihna leh duatna nen min han mikhual a, thiante hi aw.. 

TIAM TLAT E 

Kawngkhar min kik sak tak fo si-ah chuan kan inkikchhuak ve ta nge nge a. Mahni a maltlat reng hreawm tive ta nafam, palai tirh thiante`n min han rawtpui a, a neitu ber tur hian engmah thiam leh tih neilo in an zar kan han zo ta vek a. 

Kan damlaia kan hun tawn ropui ber-’Tiam tlat e’ ti-a hun kan hman mek lai pawhin thiante chuan rinawm takin kan bul ah min dinpui a, kan chhiat that engkimah mahni tihtur kalsan in min buaipui a, hengte hi ka phu em mawni le? 

LUNGLEN 

Motor, Rel leh Thlawhna-ah te kan han chuang a, thiante nen kan nuiho dar dar a, fiamthu leh politics, Pathian thu leh eirukna, thil tamatak kan sawi a kan ri leh hlut thin! Kum tamtak a lo vei hnu-ah thian hluite nen han inhmuh leh changte hian hmana kan nun, kan rilru-a hlui ve silo te kha a lo thar nawn awn awn thin. 

Hmanni lawk kha la reilo te emaw kan tih laiin kan taksa a lo chuar a, kan rilru la tharlam reng hi kan vun hlui zel hian min tuam a, thiante hnen kan thleng phak ta lo fo a, rilru lamah hian an hlutna a zual tawlh tawlh a, lung an tileng tawlh tawlh bawk a. 

THILTHLAWNPEK 

Pathianin thil tamtak min pe a, A malsawmna kan dawnte hi kan sawi seng ngai dawn lo. Mihring kan nih chhung hian thilthlawnpek kan dawn zinga a hlu ber pawl chu kan thiante hi a ni. I tan ka tih theih chhun a beitham hle ang. Mahse thilthlawnpek i ni a, i kiangah ka nun ka hmang a, ka hmang zel ang a, ka hmang ral ang. Hlu ka intih ve na em em na chu i thian ka nih vang hian a ni.