MANGȚHA MANGȚHA

                                 I 

Ni e..kan têt lai te chuan zirtâwp zan ah Star 

Movies a Friday Fury a chhuah kan nghakhlel a, 

Krismas kha kan nghak fan fan-thawmhnaw thar 

kan neih dawn a vangin! 

                                  II 

Kan lerh vang nilo in Siamtu min siam dan reng a 

nih vang zawkin 'Star' te kan nei chho a, an aw

mawi tak te kan beng ah a châm a. Khawilai ah

inhmu ila-kan han lái ta tlat țhin a! Zan mut

hmun ah kan suangtuah leh vang vang si!

                                 III

Zing a lo ni a, hlo thlo turin kan han feh a, nang

chu in lam ah hna i lo thawk a, enge i tih ang

nga tunge i lo ngaihtuah mêk ang tihngawt

ngaihtuah in hlo thlawh a sawt thei lo-vau ah

Vahui a lo hram bawk si! 

                                  IV

Hmuh chak helhhawlh vanga zanriah pawh eipuar

theilo in hmanhmawh leh zam takin in in ah kan lo

leng a. Nupa nilo ta nafam chu mahni inpan in

haw a lo ngai leh si țhin! Gauhati ka pan dawn a

Sumo a kan in mangțha te kha aw!

                                 

                                V 

Loh theihloh in Orissa lam ah kal angai ta si a,

tun ah chuan in in awmna lai vel pawh ka

suangtuah thiamlo. Mumang chauh hi a tak anga

ka hmuh theihna che a ni ta hrih si a!

                              

                               VI 

Khuangchawi thla chhawrthlapui chu no elhkhên

a lo eng a, ka rilru chu i va han luah tak em!

I bul a awm talo nafam chu i rilru ah pawh ka

awmlo chho ta zel si a,-țah loh hi a har!

                                 VII 

Tui deuhin zan ah lo mu fo la, zan mut dawn ah

chauh nilo dam chhung atan a 'Mangțha' tih

thumal chauh kan inkar luahtu mai a ni ta tih ka

hriat chhuah hian ka awmdan tur chu i hriat kha!

                                

                                VIII 

Ka zan mumang a ka hmuh țhin ang che hian,

Orissa ațanga ka lo haw hun ah, Gauhati Sumo a

Aizawl ka lo pan hun ah in vengah i pasal

fanaute kai diah diah a i bazar lai hmuh loh hram

ka tum ang-a chhan chu ka mittui a tla dawn si

a!

Mangțha Mangțha

Phuahtu : Lalzova

Aw kan nunhlui hmanlai thlirin,

Suihlunglen kimten a tho;

Lungkham chhailai di zun cham lo,

Saisen a chun chawiin.

Kumsul lam ang her se,

Sakhmel țha sen siar kan tawng;

Thinlai ah di zun a lo cham a,

Lunglen kan kiu vawng vawng. 

Chhakkawl rawn turni lo eng se,

Tawn loh nan țuanna a dang;

Awmkhaw har di ngai ka tham vel a,

Țuan zai ka rel thei lo.

Tlai khua a lo ngui a,

Hellai di run kan kai a;

Zankhua tlai se samang thennan e,

Mangțha mi lo ti e. 

Awle mangțha en chhim loh di,

Vangkhua a zau kar a hla;

Tawnmangah tawh leh ni her sela,

Thutin i hril dun ang. 

Aw chhawrthla eng hnuaiah,

Mahten duhthu ka sam a;

Luahloh tur di mahnila parte,

Ngaihlai ka bang lawng che. 

Mangțha, Mangțha, Mangțha, Mangțha,

Damten laikhum ah zalla;

Kei a riang chu kan run in chhungah,

Tinkim ka dawn ta nge. 

Aw tawnmang mawl ah pawh,

Suihlung ka rualpui silo;

Țhaval dang nen nui hiauva lengin,

Parte ka tawng thin che.