FACEBOOK LEH KTP
-Rinfela Zadeng
Zobawk Vengthlang Branch
II Timothea 4:5-Nang erawh chu engkimah fimkhur la, hreawm tuar la, Chanchin Tha hriltu lam hna thawk la, i rawngbawlna kha hlen rawh.
Facebook khawvel
Kristian Thalai Pawl zingah hian Facebook(FB) hrelo leh hmang ngailo hi kan tam a rinawmloh a, chuvangin sawifiah kual lo mai ila. Tuna kan khawvel hman hman mek, a bikin thalaite`n hun kan khawhralna tam ber chu FB hi a ni tiila kan tisual tam awm lo e. Rawngbawlna, Chanchin Thar leh thu leh hla inthawn nan te kan hmang a, a tangkai zawnga kan hman chuan tun lai khawvelah chuan thil hlu leh tangkaiber pawl a ni tih kan hre theuh awm e. Keini KTP te hian engtin nge FB kan hman ve thin? Hnathawhloh phah nan leh zing thawh tlai phan nan kan hmang thin em?
Eng nge ka Like thin?
Ka Home ah ka lut a, Notification tam tak ka neih te ka`n en thla dan dan a, milem leh tlalak, thu leh hla te ka hmu a, chung zingah chuan eng nge ka Like thin le?
KTP thiltum te zingah-Krista Chanchin Tha puandarh-tih a awm a. Krista Chanchin Tha puandarhna lam kawnga min tanpui thei thu leh hla, thlalk leh milem te ka Like thin em? Nge thu ho mai mai leh milem/thlalak ho mai mai, chhungkuaa enho dial dial tlakloh te ka Like thin?
Zan rei tak tak thleng ka FB(online) a ka thil Like the hi Lal Isua hian min Like pui ve angem le?
Eng thu nge ka sawi thin?
Ka FB ah hian eng thu nge ka sawi(status update)thin le? KTP ah OB kum tamtak ka lo ni tawh a, tuna ka FB-a ka thusawi leh ziah mek ah hian ‘Isua Krista rinna leh amah anna kawnga thalaite hruai’ thei tur thu ka ziak em? Tun a ka thuziah mek hi Lal Isua hian a lo Like in Comment min pe a ngem le?
Eng Group-ah nge ka awm?
Ephesi 2:10 ah thiltha ti tana siam kan nih thu leh chu thil tha tih chu kan awmna tur a Pathianin min buatsaih lawk a nih thu kan hmu a. Tun a FB-a ka awmna Group-te hi thil tha chu anni em le? Zahmawh leh Film thalo awmna Group-te hi em ni ka awm duhna leh ka mit leh beng titlai tu?
‘Kohhran hnathawh tihpuitlin’duh kei Kristian Thalai hian tuna ka awm mekna Group atang hian Kohhran hnathawh tihpuitlinna tur thil ka hmuchhuak zo a ngem?
Eng thu in nge kan inkawm (chat) thin?
Zan rei tak tak thlenga tuemaw nen a kan inkawm (chat) hian engthu nge kan sawi thin? ‘Kohhran kutke nitura thalaite buatsaih’-na thu kan sawi dun thin em? Nge Setana kuthnu niawm tak thu kan sawi dun melh melh zawk?
Tun a ka thusawi (chat) mek hi Lal Isua nen pawh a sawidun tlak thu a ni em? Lal Isua titipui (chat) tlak ka ni em? A rawnbawltur a a chhnadam Kristian Thalai ka ni si a.
Engkima fimkhur
II Timothea 4:5-na thu ang hian engkima kan fimkhur hi a va pawimawh em! Tun ah hian lo boral ta ila, kan FB Account hi belhchian (check) tlak a ni a ngem? Kan thil Like te, kan Comment te leh kan titi (chat) te hian kan nun nasa takin a eiral thin em?
Kan nun chhungril leh kan hunawl min luahkhattu tamber Facebook hi keini KTP te hian Lal Isua Like ve theih, Comment ve theih leh Lal Isua awmve na tlak Group a nih theih nan i hawng thar ang u. Setana awmna leh a duhzawng thilte kan tarlanna hmun atan kan FB te kan hmnag a nih chuan kan nun hian a tuar ngei dawn a. Lal Isua hmingin Facebook hmang thin zawng zawng te`n kan Account i vawng tlat ang u khai!
Mar 8, 2013·
Comments
Post a Comment