Kum 2001 a pawl sarih ka zir lai kha, ka ngaihtuah lêt leh hian a hahthlak ka tiin ka nuih a za a, ka zak nawn fo țhin! Chhungte’n pawl nga kan zir lai ațangin, hmalam hun hisap ran in uniform kha lian hek hawk, pawl 7 kan nih theng a daih tur min țhui sak a, hmalam hun an thlîr thiam vang nilo in retheihna vang zawk in uniform kum thum daih tur min leisak a nih chu!
Naupang nungchang țha leh țuan fum tak nilo ta nafam chuan kan uniform chu kan tâl chulin kan ha phuai hle a. A mawng leh a khûp te chu a bel tlul ta mai! Chuti ang chuan kum 3 kan han ha, kum thum na, pawl 7 ka zir kum ah chuan a mawng chu a țet ta tlat mai! Pawl 5 ah khan ka star ruk
deuh mai a awm leh nghal a, ka rilru a va hah em!
Ka chhungte hnen ațangin form kekawr thar chu beisei chi a nilo a, engtin nge ni ang? Ka pa ka hrilh a, a țhuina lang theilo tur berin min han țhui sak na a, a țhuina a lang tho tho-ka kamis in a khuh pah silo a! Sikul kal ka hreh ta hle mai! Engtin nge ka tih ang tiin ka inngaihtuah vang vang a, ka hrechhuak ta hlauh mai! Kawrlum hmapum, mawng khuh pha ka nei a, chu chu nitin ka ha ta, ka kekawr mawng pawp chu a khuh a, ka lawm hle.
Mahse khua a lo vawt reng lo a, nipui a lo ni chho a, kawrlum chu hak reng teih a ni ta lo a, ka buai ru hle. Chutih lai chuan tactic thar ka hre leh ta-kawrlum chu ha lo in ka kawng ah ka suih a, ka mawng lam ah chuan ka bang liam ta a. Chuti chuan nitin kawrlum kawnga suihn sikul ka kal ta țhin a, ka star rûk reuh reuh hnen ah pawh ngampa takin ka kal ve leh thei ta-kawrlum veng chung in!
Mi hi an lo ã reng lo a. Chutia kawrlum ka veng reng mai chu a chhan a awm ringtu kan class ah chuan an awm tla tlat a, room chhung a ka kawrlum ka ven loh châng zauh chuan ka kekawr mawng chu a pawp an bel a nih tih chu an lo hmu ru ta fur mai! Kan Hindi teacher lah chuan intlar laiin hlip turin min ti mauh bawk a, ka harsatna kha ava han hrethiam lo tak!
Ka kekawr chuan pawl 7 board exam hun thleng chu min daih dawn ta lo a, tihngaihna a awm tawh silo, Lunglei lam a kan chhungte min pêk kekawr pawl chu ka ha ta tawp a, kan Head’ Pu Rina hen ah inreport in min ngaidam a nih kha- ka va lawm em!
Zirtirtute u, in naupangte hi an uniform a țha em, an sikul shoe a țha em, note ziahna tur ziaklohbu leina tur an nei țha em-tih te hi han ngaihven leh zual ula, Zirtirtu ropui, malsawmna thlentu, Missionary ropui in va nileh zual dawn em!!!
Comments
Post a Comment