Chetan Baghat, India rama lehkhabu ziaktu lar em em mai chuan, "A chang chuan nun hi i duh duh tihna tur a ni lo a, i tih tur i tihna tur a ni zawk" (Sometimes life isn't about what you want to do, but what you ought to do) tiin a lo sawi a nih kha. Kan nuam tih zawng ringawt ni lo, kan tih duh loh leh midang leh kan chungah pawh thleng ve lo se kan tih - thihna, hlawhchhamna leh chhiatna te pawh kan hmachhawn tho tho a ngai ṭhin a nih hi.
Lal Isua bulah pawh khan, a piantirh aṭanga mitdel an hmuh khan, a zirtirte chuan “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zawt a nih kha. Isua erawh chuan “He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi." tiin a chhang a nih kha (Johana 9:1-3).
Sakhaw hrang hrang te, mi fing/philosopher leh mi thiam/Scientist te pawhin khawvela harsatna, natna leh a ṭha lo lam zawng zawng lo awmna chhan hi sawifiah an tum vek a, kan rindan leh pawm dan pawh a in ang vek lo. Keini Kristian te chuan Bible aṭangin kan hrilhfiahin kan pawm a, chu chu kan innghahna pawh a ni. Engpawhchu nise, tumahin harsatna hi kan pumpelh thei lo.
Mi inuluk em em, zuk leh hmuam pawh ti ngai lo, taksa sawizawi ngaipawimawh em em te'n Cancer natna an vei laiin, ruihhlo leh zuk leh hmuama fihlim lo te an hrisel viau lawi a! Mi ṭhenkhat an hlawhtlin laiin mi ṭhenkhat erawh vawi tamtak an hlawhchham a. Chumai a ni lo, piantirh aṭanga piangsual leh mi ang lo te an awm a, chungte chu eng vang nge? Eng nge a chhan? Eng nge kan tihsual? Tu thiam loh nge? Chhan theih loh zawhna tam tak a awm awm e.
Khawvelah nunna neia kan pianchhuah rualin mi pangngai chuan mawhphurhna kan nei a; dam khawchhuak tura hna kan thawh a ngai bawk. Tunlai khawvelah ngat phei chuan, din hmun siam ṭha apiangte chu mi hlawhtling, innghahna tlak, nupui pasala neih tlak an ni zel tawh a. Chhungkaw awhawm leh zahawm kan tehna lian tak pawh - sum leh pai ngah, khawvela innghahna nei te hi an ni ta deuh zel a. An lakluhna leh an thawhchhuahna lam chu a lo dik vak lo a nih pawhin, thianghlim tak leh mi ṭanpuina atana an hmanchhuah chuan tumahin kan hnar phal lo a, kan sawisel phal lo chho mek chu a ni ta zel mai!
Kan hmalam hun siam tuma kawng kan zawhnaah hian, kan ruahman lawknaah pawh tel ngai lo, tel tur pawha kan duh loh leh hun leh kum, sum leh pai tam tak kan hloh phahna khawpa hma kan lakna kawngah kan la hlawhchham cheu a, a zahthlakin a beidawnthlak ngawih ngawih a. A ṭhen phei chu siam ṭhat theih tawh loh leh engtikahmah lo kir leh tawh lo tur te a ni bawk.
Kan nupui pasal, kan fa te'n min boralsan a, kan ngaihzawng te'n min ṭhen a. Theihtawpa kan inbuatsaih ve chungin hna kan dilnaah kan hlawhchham a, vawi tam tak IAS/MCS adt kan tling zo lo a, kan sawhthing a la tâm zui a! Inhlawhfakna tur kan hre mumal lo a, kan pawisa neih chhun a phai tial tial a. Gpay hmanga awlsam taka engkim kan lei theihna khawvelah hian Gpay-a pawisa lut tur nei ve lo zawng kher khera kan lo piang te hi tu thiam loh nge maw ni le tih mai a awl hle!
Mahse heng heng zawng zawng hi keimahni chauhin kan tawrh bik leh kan tawn bik a ni lo a, mihring nun nihphung pakhat, mi zawng zawngin an pumpelh theih bik loh a ni. Chuvangin hnual lutuk tur kan la ni lo a, damna leh hriselna ṭha kan neih chhung chuan beiseina hi kan nei tlat tur a ni. Mihring nun hi chona a ni a, min chotu chu harsatna zawng zawng -thihna, natna, hlawhchhamna adt te hi an ni. Chumi hneh thei tura Pathian siam kan nihna hi hre rengin hmalam pan luih i tum zel teh ang.
Bo hlen tur chu ui reng loin thlah liam thiam vat ila, beisei tur la awm chu beisei phak turin inbuatsaih ila. A tak ngeia kan neih theih hun a thlen ve theihna turin kan um zel ang. Kan chunga thil thleng te hi kan tihdanglam theih loh chin chu pawm hmak ila, kan la thlak danglam theih te chu theih tawp chhuahin tihdanglam i tum teh ang.
Beisei tur nei tawh lo khawpa harsatna tawk, Cancer, AIDS vanga khuma mu reng tawh, i thi dawn a ni tih nangmah leh i chhungte pawhin an hriatchian tawh hmun awm mek i nei thei e. Hmelma hnuhnung ber thihna ngamtu Pathian kan nei tih hi hre reng ang che. Chu chuan chatuan nunna min pe a, khawvelah mi vanduai ber nia mi dangin min hmuh laiin, chatuan ro neitu kan ni. Chuvangin rintlak Pathian hi a rintlak loh ve ngai loh.
 |
| Vanglaini |
Kan harsatna tawhna hmunah ngei, kan hlawhchhamna hmunah ngei, kan beidawnna hmunah ngei hian kan la hlawhtling dawn a ni tih rilru puin Pathian hnenah damna leh hriselna dil ila. Kan duh zawng te a hlawhtlin theihna turin theihtawpa inbuatsaihin, Pathian rinchhan chung zelin hmalam i pan zel teh ang.
Comments
Post a Comment