Mi tam takin an ziak tawh a; amah ngaisangtu tam tak an awm avangin a chanchin zawng zawng chu kan sawi seng lo ang a. Chuvangin Revd Dr Chuauthuama hlutna lam hi tun tumah chuan kan sawi dawn a ni.
A hming ziah dan
Mizoram Kohhran Pastor tam zawk te hi an hming kan sawi leh ziah danah chuan Rev. Chumi-khamia tiin kan sawi thin. Revd Dr Chuauṭhuama erawh hi chuan Revd tih ngatin a hming hi a ziak thin a. Revd tih zawhah hian chhun han (dot .) dah hi a duh miah lo a; chuvangin a hming ziah dan tur dik tak chu Revd Dr Chuauṭhuama hi a ni. Hei hi mi tam takin kan ziak dik lo thin a, a duh dan ngeia ziah hi kan tum tur a ni.
Kohhran mamawh Pastor huaisen
Mizorama Kohhran hrang hrang te hian harhna/revival te, zirtirna dik tawk lo (heresy) ang te leh thil dik tawk chiah lo tam tak hi khawvel awm chhung chuan kan la hmachhawn zel dawn a. Chutiang hunah chuan Pastor te leh Kohhran Upa/Committee chin te hian mipui/kohhran rilru tihnat palh kan hlauh luatah kan ngawi liam fo a. Revd Dr Chuauṭhuama erawh hi chuan huaisen takin a sawisel a, a hriatna a thukin dik nia a hriatah chuan a tawp thlengin a tang tlat a. Chu chu a thihpui ta thak mai a nih hi.
Nakinah hetiang ang harsatna hi Mizorama pawl hrang hrang Kohhran te hian kan la hmachhawn zel dawn a. Chutih hunah chuan Revd Dr Chuauṭhuama thu leh hla te hian ngaihhlut a hlawh nawn fo ang. Amah anga huaisen Pastor hi Zofate hian engtikah nge kan neih leh ang tih hriat a ni lo. Pathianin Mizo te tana ani ang Pastor tha leh huaisen min pe hi lawmthu i sawi nawn fo ang u.
Pathian thu zir tumte tana mi hlu a ni
Theological College a ni emaw mahnia Pathian thu zir duh tan emaw Revd Dr Chuauṭhuama thu leh hla te hi zir tham a ni. A Pathian thu ziak tam tak leh zir bingna anga zawnga a ziah te hi ngun taka chhiarin zir ila, hma kan sawn pui ngei ngei ang. Chutih rual erawh chuan rilru zau tak leh zirna rilru pu loa chhiar tu tan erawh chuan Revd Dr Chuauṭhuama hi an va hmu roin an va hmu sir he/liberal viau ang. Mahse, an hriat loh vang zawk a ni.
Khawvela University tha ber pawl Cambridge University atanga Thuthlung Hlui lama thiamna sang (M. Phil) zir zo ngat a ni a, a thiamna leh a hriatna hi a namai lo hle. Khawvel zirna lam/Secular-ah pawh UPSC/IAS interview hma chhawn thei khawpa mi turu a nih avangin hian a nep thei lo hrim hrim bawk.
Aizawl Theological College -a Pathian thu (Bachelor of Divinity) zir tum te tan phei chuan a lehkhabu ziah 'Bible Knowledge' tih kha chhiarin thiam vek ila, written test chu kan paltlang ngei ngei ang. A kut chhuak hrim hrim hi a 'academic' em em a; hriatna/information tam tak a keng tel bawk. A rin dan mai mai a sawi lo a; a tak ngeia a tawn leh hriat te lamin a sawi a ni. Chuvangin Pathian thu zir chhuak, Theological Degree neiin Revd Dr Chuauṭhuama hi an ngaisang lo a nih pawhin an dah hniam thei ngai lo.
Greek leh Hebrai tawng te hi a thiam em em a; Pathian thu thiamna lama PhD/DTh nei tam tak aiin a hriatna hi a nghetin a thuk zawk a ni.
Kohhran humhalh tu - Defender of the Church
Revd Dr Chuauṭhuama aia kohhran humhalh tu hi kum zabi 20/21-naah hian an tam bik lo ang. Kohhran hi a dah pawimawhin a rorelna/inkhawmpui te hi a ngaipawimawh em em a. Tun lai zawlnei thupuan aiin Kohhran rorelna hi a ring zawk tih a thuziah tam takah kan hmu. Lal Isua Krista kha Zawlnei huhnung ber a ni a, a dawt a mi chu Lal Isua taksa Kohhran hi a ni e tih lam hawi khan a sawi thin a, a pawmawm hle. Chuvangin tun laia zawlnei hrilhlawkna eng eng emaw aiin Kohhran thuchhuak leh rorelna te hi Pathian thu chhuak, Zawlnei thupuan anga thudik leh Kristiante zawm tur a nihna kha a tuipui tih kan hreawm e.
Biak ina tui in te, thlalakna tur Photo Booth siam te, Camera nena inkhawm laia Biak Ina tei sek te kha a ngaisang lem lo a. Kohhran Hruaitu, zuk leh hmuama fihlim lo te kha a ngaisang lem lo bawk. Pro Pastor hna lak dawnah te, Pathian thu zir tur (Bachelor of Divinity) lak chungchangah te khan a duh fir em em zel bawk a. Kohhran zahawmna tibawrhbang thei tur thil dang reng reng kha chu a ngaisang lo a, chutiang chuan amah ngei kha nung bawk. KTP General Conference, Kolasib-a Speaker a nih tum pawh khan darkar khat dawn thu a sawi pawhin vawikhatmah a thusawi laiin tui a in duh loh kha!
Dikna duh mi a ni
Revd Dr Chuauṭhuama nuna langsar ber chu dikna leh rinawmna hi a ni a; chuvangin huaisen takin thu a sawi ngam bawk. Sorkar thil tih dik tawk loh te, a awmna kohhran Mizoram Synod a duh khawp lohna te pawh huaisen takin a sawi hmiah hmiah a. Chu chuan rah tha tam tak a chhuah phah bawk a. Mi tam tak phei chuan Revd Dr Chuauṭhuama hi Mizoram Synod hotu ber emaw tiin kei ngei pawh hi min zawt fo a. A nihna takah chuan Mzoram Synod Secretary a nih bak kha chu Mizoram Synod Hotu lian kha a ni hran lo. Chutiang taka pa thawmna leh duhtui, dikna duha thil sawia ziak mi a nih avang khan Kohhran dang te leh ralkhat atanga lo hretute chuan Mizoram Synod-ah hian a thu ber emaw an tih fo a ni.
Mizoram Sorkar kalphung dik tawk lo te, Land and Revenue Department lam thiltih dan fel hlel te kha Aizawl Theological College ram tur an buaipuina kawngah khan a hmu chiangin a vei hle tih kan hmu a. Zu chungchang te pawh a veiin a sawi nasa ber pawl a ni hial awm e. Ani anga mi dik leh huaisen, dikna tana engkim sawi ngam mihring hi Mizote zingah hian kan tam lo viau awm e.
 |
| Vanglaini |
Mizo te zingah Pathianin Revd Dr Chuauṭhuama min pe hi lawmthu sawi ila; a nun leh a thiltih hmanga Zofate hnena ro min hnuchhiah hi him tak enkawltu leh a ti pungtu ni turin kan theihtawp i chhuah ang u.
Comments
Post a Comment