'Engkim hi Pathian siam a ni a; engkim chunga thuneitu a ni a; amah chauh chu a bul leh a tawp a ni' tih hi Reformed Theology kan sawifiah thiam dan awlsam ber a ni ang a, a innghahna chu Bible a ni. Chumi chhungah chuan chhia leh ṭha hriatna te, sualna leh chhiatna te, ṭhatna leh khawvel piah lam thil te thlenga beiseina te pawh kan khung leng awm e. Mihring sualna bul te, chhandam ngai kan nihna zawng zawng te pawh kan hmu a. Chumi ep chiaha chuan, a taka hmuha finfiaha, chhiarkawp dan hmanga a dikna chawhchhuaha finfiah theih te chauh hi thil tak a ni a. He khawvel leh engkim (universe) mai, nunna chen hian Pathian tel lo hian a lo awm thei reng a ni tih zawn chhuaha finfiah tumna hi natural science tiin kan sawi awlsam thei mai awm e. Biology thlirna tlang aṭang chuan khawvela (nature) thil thleng reng reng hi khuarel thil (natural) vek a ni a, hmangaihna, pawngsualna, rukruk, tuai/patil (homo-sexuality), natna leh lirghing te thlengin khuarel thil vek a ni tihna a ni thei. Chuvangin natural science aṭang chuan chhia leh ṭha/morality kan tih hi a awm thei tak tak lo ti ila, kan sawisual awm lo e.
A bul aṭangin
Hman atang tawhin 'Engtia lo awm nge kan nih?' tih zawhna chhan tumin nasa takin thil kan lo chhui tawh a. Keini aia chungnung zawk 'tu emaw' a awma hriatna kan neiin pathian tam tak kan be bawk a nih hi. Hnam fing hmasa Grik hote'n pathian tam tak an bia a; Roger Bacon chuan - hriatna bulpui chu finfahna (emperical) hmanga hriatna kan neih te chauh hi hriatna hnar dik a ni a ti a. Chu chuan Renaissance, Reformation leh Scientific Revolution te a lo hring chhuak kan ti thei ang.
Vawiinah phei chuan hmanraw ṭha ber ber hmangin kil hrang hrang aṭanga a chipchiar thei ang berin thil kan zirin kan chhui a, Pathian tel lo hian kan lo awm (exist) thei a ni tih hmuhchhuah tumin kan phe ta suau suau a. Keini ang mi mawl tan phei chuan hnial rual lohin mi thiamte thusawi hi a awihawmin a dik em em a; a finfiahna tam tak pawh min kawhhmuh ta a nih hi. Kan Bible te pawh Hebrai ho thawnthu bu pakhat, an chheh vel Asian Near East rama mi te thawnthu nen pawha danglam teh chiam lo angin an sawi a. Eng ber hi thudik ni ta?
Pathian mamawh lo nunna
Kum 1859 ah Charles Darwin chuan 'On the Origin of Species by Means of Natural Selection' tih lehkhabu bengverh zet mai a tichhuak a; vawiin thlengin Science zirna huangah hmun pawimawh tak mai a chang zui a. He lehkhabu innghahna bulpui ber chu tuna thil nung chi hrang hrangte hi kan bul ṭanna thuhmun vek, zawi zawia lo danglam chhoa tun hi lo thleng ta kan ni e tih a ni a. A hranpaa siamtu/creator mamawhna tel loin hun lo kal chho zelin a tihdanglam chhoh nunna nei, chi hrang hrang/species a lo awm ta kan ni e tiin min zirtir a nih kha. Thil mumal lo (disorder) kha pangngai tak leh nihphung nghet (order) neiin kan lo awm ta ni tih kha Scientist te leh mihring chanchin zirtu/anthropologist Thomas Huxley te khan an pawm em em a. Eng emaw kan hmuh theih loh (metaphysical element, supernatural), thil nihphung awm tir tu kha kan mamawh ta lo tiin a sawi a nih kha.
Kum tluklehdingawn li kalta vel aṭanga hun lo inṭanin chutah chuan nunna a lo awm a, chu chu FUCA (First Universal Ancestor - nunna nei zawng zawngte thlahtu bul) an ti a. Chuta ṭang chuan hma lo sawn chhoin LUCA (Last Universal Common Ancestor - nunna nei zawng zawng te thlahtu bul tawpna ber) a lo awm leh a. Chuta ṭang chuan kum maktaduai tam tak paltlangin Bacteria, Archaea leh Eukarya te lo awmin nunna chu a lo changkang chho zel a; mihring, zawng, sangha, thing adt te chu tuna kan nihna ang hian kan lo insiam chho ta zel mai a ni tiin an sawi.
Engtin zel nge?
'Evolutionary biology' chuan nunna he khawvela alo darh dan a sawi a, nimahsela a bul, khawi aṭangin nge nunna alo awm tih hi ring lo mi te tan pawh chhan awlsam tak a ni lo thung. Anni chuan 'abiogenesis' kan tih mai thilnung lo aṭangin thil nung a lo insiam tih hi an pawm a. Chumi awm theihna 'proof' tu nia an sawi, science experiment lar tak Miller and Urey experiment te ngei pawh kha a awmsa (nature) a kan hmuh theih miah lo hmanrua an lo hmang nasa hle tih hmuhchhuah a ni a. Tin, nunna lo awm thei tur hmanrua/material kha zaa hmunkhat vel a ni a, a bak zawng chu thil hlauhawm (toxic material) vek a lo ni a. He enchhinaah hian - amino acids hian protein a siam lo a, protein hian an mahni chauhin nunna an siam lo tih an hmu tel niin an sawi. Chu chuan thil mawl/simple taka aṭanga chipchhiar tak emaw hlawm khawm ṭha tak emawa (complex) insiam tur kha a dang thei tih hmuhchhuah a ni bawk. Pathianin engtin nge thilnung hi scientific takin a siam tih kan hre lo ang bawk hian science pawh hian alo insiam chhuah dan chu rin thu bakin ala sawi thei bik lo ang.
Evolutionist te sawi ang hian nunna nei zawng zawngte hi thlahtu inṭawm aṭanga lo chhuak vek kan ni tih hi a dik famkim em tih hi Scientist tamtak te chuan zawhna chhan harsa tak a ni tih hi an ṭan chhan a ni. Sik leh sa, kan chhehvel thil avangin mihring/thilnung hi lo danglam thei mahila, chu chuan kan thlahte zelah danglamna neisain an lo piang chhuak lo tih hi an ṭan chhan ve pakhat a ni.
Evolutionist-te chuan eng emaw avangin (random mutations), siamtu leh duangtu awm loin nunna chi thar (DNA strand) a awm thei niin an sawi bawk a. Mahse, hei hian Mathematics lama harsatna thuk tak a siam a; Computer program-ah hian character thar hrang hrang random-a dah luh a nih chuan, computer program ṭha zawk, awmze nei tak, hnathawk thei siam chhuah ai chuan computer kha a tichhe vek thei zawk a ni.
James Shapiro (1992)-a rawtna angin Natural Genetic Engineering tia hriat, hmaraw hmanga finfiahna (materialist theory) dang pakhat chuan thil thar lian ber ber hmuhchhuah te chu sawifiah a tum a. A hnuah chuan insiam danglam thei tura duansa ni se (pre-programmed adaptive capacity) tiin a rawt a, chu chu pawn lam thilin a tichhuak thei a, chu chuan protein thar ṭhenkhat a siam thei a, chungte chu gene-ah a awm tawh a ni. Chuvangin 'mutation' tam tak hi random tak tak a ni lo va, pre-programmed a ni zawk tiin an sawi a. He 'pre-programmed information' lo chhuahna chungchanga zawhna chu a la awm tho a. Chuvangin chemical evolution theory chu a hlawhchham a, a chhan chu cell nung chhunga amino acid (nunna siamtu) te chu a nih dan tur anga awm tur (three-dimensional protein molecule) chuan eng emaw (information) a mamawh vang a ni.
Bible aṭanga thlirna
Genesis bung 1-na kan en chuan Pathianin lei leh van a siam dan kan hmu a; mihring tih loh nunna nei dang zawng zawng te chu an chi awm dan tur ang ṭheuha awm tura a siam thu kan hmu leh a. Bible hi Science/Biology zirna bu a ni lo a; a hun laia mite hriatthiam tur tawka mawl leh awlsam takin Pathian chu mihringte hnenah a in puang mai a. Chu chu mawl viau mah se vawiin thlengin a tunlai (advance) viau bawk si a ni.
Nunna lo awm dan leh nunna chhunga thil awm hrang hrang, nunna lo siam chhuak theitu (chemical) chi hrang hrang te hi ngun taka an zir chian chuan, fel tak maia ruahmansa (programme) leh thiam taka lo duan (intelligent design) a ni tih hi an hmu chhuak zel a ni. Evolution avang hian nunna nei te hi chi tamtakah (species) chuan lo chhuak thei ta teh reng pawh nise, nunna lo awm ṭanna tak tak hi chu eng emaw vanga lo thleng thei a ni tih pawma rin tawp mai hi chu - Pathian siam a ni - tih rinna aia nasa rinna thuk neih a ngai ang.
Engkim siamtu Pathian
Nunna awm tura kan mawmawh thil (chemical) te hi awmze nei tak leh a nih dan tur ang taka chawhpawlha nunna siam chawp tum hian scientist te hian hma han lak mek mah se la, chutianga nunna (life) thar hlak lo chhuak tur khawpa hmasawnna hi chu vawiin thleng hian hriat tur a la awm lo a. A duangtu leh nung tura thupea siamtu (external locus of control) hi a awm ngei a ni tih hi huai takin kan sawi thei ang. Chu chu keini Kristiante chuan Pathian a ni tih kan pawm a; Pathian hi engkim siamtu leh thuneitu a nih thu kan hmuhna 'Reformed Theology' hnawl theih a ni lo.
 |
| Vanglaini |
Pathian rin hi a tunlai a; Science thiamnain a thlen phak piah lama awma nung Pathian biaka rin hi a changkangin a tunlai reng a ni.
Comments
Post a Comment