Lehkhabu thlirna: Bâwih Ṭhahnem lo : Kum 17 + Sulhnu - Revd Dr Chuauṭhuama - Rinfela Zadeng (9 April 2024 Vanglaini )

April ni 1, 2024 Thawhṭanni chawhnu dar 1:00PM khan Synod Conference Center, Aizawlah Revd Dr Chuauṭhuama Memorial Commitee te chuan Revd Dr Chuauṭhuama kutchhuak lehkhabu hnuhnung ber 'Bâwih Thahnem lo : Kum 17 + Sulhnu' tlangzarhna hun an hmang a. Mizo Pastor zinga ropui ber pawl Revd Dr Chuauṭhuama ngaihlutu an tamin mi 100 dawn chu he hunah hian an kal a. Tun ṭumah hian lehkhabu hlu tak chanchin hi kan sawi dawn a ni. 

A bu pian hmang

'Bâwih Ṭhahnem lo : Kum 17 + Sulhnu' hi thuhmahruai leh appendix tel loin phek 475 a chhah a ni a. Lehkhabu kâwm ṭha chi (Hard Cover) leh a pangngaia siam niin a kâwm ṭha zawk hi cheng 600 man a ni a, a pangngai hi cheng 500 man a ni thung. Samaritan Printer kut chhuak niin chhiar a nuam hle a; hawrrawp chhutsual pakhat chiah ka hmu a. He lehkhabu hi Revd Dr Chuauṭhuama khan a dam laia a ziah zawh tawh niin kum 2022 a tihchhuah tum a ni a. Mahse, a ziaktu Revd Dr Chuauṭhuama boral hnuah Revd Dr Chuauṭhuama Memorial Committe te hian a ziaktu pianchampha April ni 1, 2024 ah an tichhuak ta a ni. Synod Bookroom, RL Nutei Book Store, FIT Lehkhabu Dawr, Lehkhabuk adt ah te leih theih a ni. 

A chhung thu

He lehkhabuah hian thupui 22 a awm a; chu chu Hebrai A AW B (Alef, Bet, Gimel) zat chiah niin bung 22 te hi number anga ziak loin Hebrai thumal 22 hmanga ziah chhuah vek a ni. A ziaktu hian a hun tawp a hnai tawh tih hresain a ziak emaw tih turin he lehkhabuah hian Mizoram Synod hnuaia Pastor hna rawngbawlna kum 17 a thawh chhung leh a pension tawh hnua Aizawl Theological College-a kum 4 an rawih leh baka a thih ni thlenga chanvo hrang hrang a chelh te a ziak lang a. A ziaktu mize ngai chiahin thup leh zep nei loin a thil hmuh leh  tawn hriat te a nih dan ang angin a ziak a, a hluin a ngaihnawm hle. 

A hmasa berah hian Revd Dr Chuauthuama hian an chhungkaw ṭobul leh a lo pianchhuahna chanchin a ziak a. A mizia te, BD leh Cambridge University - a MPhil (OT) a zir dan te,  Lungleia Pro Pastor a nih dan leh Aizawl Theological College - a thawh tan dante a ziak a. Mizoram Synod Secretary a nih lai chanchin leh hetih chhunga thil thleng te chipchiar tak leh zep nei lem loin a ziak leh a. Synod Inkhawmpui chungchang te, ATC a Registrar leh Warden a nih dan te, zirtirna dik tawk loin Kohhran a tihbuai avanga hman an lak dan te, ATC a thawh chhunga a thawhpui a hmuh dan te a ziak zel a. BD a zirpui te leh a pension tawh hnua Kohhran leh a peng hrang hranga a inhman zuina te ngaihnawm takin a ziak a. Mizoram Sorkar leh Mizoram Synod - a a ngaihpawimawh thil te ziaka lehkha a thawn thu te nen lam ziakin a dah tel bawk. 

Pastor aṭanga a pension hnua a inhmanna bakah Senate of Serampore College (University) aṭanga Doctor of Divinty (Honoris Causa) a dawn dan te ziak langin Pathian thu a pawm dan (Theology) a ziak bawk a. 'Miten tu nge a ni min tih?' tih chu a ziak lang bawk a. Hei phei chu a boral hnuah Revd Dr Chuauthuama Memorial Committee te hian 'Lalpa chhiahhlawh Revd Dr Chuauthuama : Miten tu nge ani an tih?' tih lehkhabu hran siamin April ni 1, 2024 hian an tlangzarh zui nghal bawk a ni. 

Revd Dr Chuauṭhuama fiamthu

He lehkhabu 'Bâwih Ṭhahnem lo : Kum 17 + Sulhnu' ah hian Revd Dr Chuauṭhuama mize dik tak a lang chiang hle a. Mi nawlpuin fiamthu kan thawh bawrh bawrh anga fiamthu hi thawh ve loin, a ngamtlak -  a Pastor pui leh a lam hnaite a fiam dan ṭawngkam kan hmu a. Chu chu a hrechiang lo te tana mi chapo leh mi kap peih tak ni anga kan lo hriatna kha a ni a. Mahse mi zakzum tak leh ṭawngkam thluaithlum thiam lo a nihna inhliahkhuna atana a fiamthu thawh ve dan a ni tih kha a langchiang hle. Tin, mi dik tak leh mi huaisen tak a nih tel avang khan thil nihna a sawi tlang ngamin a hmuh dan leh a hriat dan kha a fiamthu thiam ve danin a sawi lang a ni tih he lehkhabu aṭang hian a lang chiang hle a. Vawiina Mizoram Synod Pastor zahawm tak tak te leh a ṭhiante a fiamna leh a hmuh dan kha he lehkhabu hlu takah pawh hian kan la hmu zui ta zel a ni. 

Revd Dr Chuauṭhuama Theology

Mi tam tak chuan Revd Dr Chuauṭhuama hi an hmu sir he/liberal viau a; kum 2002 Nilai leh Beihrual Thupui bu pawh an hal sak hial a nih kha. Mahse tuna a lehkhabu hnuhnung ber kan sawi meka phek 449 - 475 inkarah hian a Pathian thu pawm dan chipchiar tak kan hmu a. Chhandamna chungchang te, hun hnuhnung chungchang te, Pathian thiltih mak a pawm dan te chiang takin kan hmu a. Heng atang hian Revd Dr Chuauṭhuama Pathian thu pawm dan himzia leh Bible a rinzia kan hmu chiang hle a. A finna leh a thiamna ril tak kha mi nawlpuiin lo hriain lo zir ve se a tih avanga thuk tak leh thiam taka a ziah kha kan lo man pha lo mai mai zawk a nihzia he lehkhabuah hian kan hmu chiang hle. Chuvangin chik taka mahnia Pathian thu zir leh zirna huanga Pathian thu zir te hian Revd Dr Chuauṭhuama hi an hmu nep thei ngai lo a ni. 

Bawih ṭhahnemngai leh huaisen

Revd Dr Chuauṭhuama hian a kutchhuak hnuhnung berah hian 'Bawih Ṭhahnem lo' tiin insawi mahse a hnathawh te en hian Mizoram leh khawvel huap pawha Pastor ṭhahnemngai ber pawl a ni ngei ang. Zirtirna dik tawk lo huaisen taka a dodal dan te, Mizo Israel nih chak em em a dona te, ATC a thawh chhunga zirtir hna tibuai zawnga hun a hman ṭum khat chiah a awm thu te, Synod Hospital Board - in nurse an lak dan chungchang a ziah te, Mizoram Sorkar leh Mizoram Synod hnuaia a ngaihpawimawh zawng lehkhathawn hmanga a hrilhna te hi a ropui hle. 

BSI hnuaia Bible lehlin chungchang leh a ṭawngbul ena a dik thei ang bera lehlin leh siam ṭhat a duhdan te en hian bawih ṭhahnem ngai, tih tur tam tak la nei chunga khawvel chhuahsan ta a nihzia kan hmu chiang hle awm e.

Vanglaini

Revd Dr Chuauṭhuama kutchhuak hnuhnung ber 'Bâwih Ṭhahnem lo : Kum 17 + Sulhnu' hi chhiar ila. Mizoram Kohhrana rawngbawltute zawng zawngte hian dikna leh rinawma hlutzia te, huaisenna leh dikna hi a tlozia te, Kohhran humhim tura theihtawp chhuaha rawngbawl a ngaihzia te hi kan zir chhuak ngei ang. Heti taka Pathianin Revd Dr Chuauṭhuama a chawimawina chhan leh Pathian rintlakzia he lehkhabu atang hian kan zir chhuak thei ngei ang.