Skip to main content

Kohhran leh Chanchinbu - Rinfela Zadeng (22nd March 2024)

 Mizorama Kohhran hrang hrangte hian kan Kohhran Chanchinbu thla kip chhuak - Kohhranpui, Ṭhalai, Hmeichhia leh Naupang pual kan nei a. Tualchhungah pawh Pathianni zinga sem chhuah chanchinbu hi kan nei deuh vek bawk a. Heng atan hian Kohhran hian sum tam tak a seng a; Kohhranin chanchinbu hlu tak a chhuahna atana a sum sen ngaihtuahin Kohhran mipuite hian kan hlut em tih hi zirchian ngai tak niin a lang. 

Kohhran hian chanchinbu bu engzat nge kan tih chhuah?

A tira kan sawi tawh angin Kohhranin chanchin bu ṭha tak tak a buatsaih a; chumai bakah Sunday Sikul Zirlaibu, Nilai/Beihrual Thupui bu te a buatsaih bawk a. Hengte hi kan chhiar tak tak ngai em le? Mizorama Kohhran lian pahnih - Mizoram Presbyterian Kohhran leh Mizoram Baptist Kohhran te chanchinbu chhuah hi han en ta ila. Mizoram Synod hian 'Kristian Tlangau' chanchinbu thla kip chhuak hi kum 2024, February thlaah hian bu 44,000 a tichhuak a. Mizoram Baptist Kohhran hian 'Kohhran Beng' thla kip chhuak hi kum 2024 ah hian bu 12500 a tichhuak bawk a. Heng bakah hian Synod News Letter leh Baptist Today te hi kan sawi mek Kohhran pahnih te hian an la tichhuak leh bawk. 

KṬP chanchinbu Kristian Ṭhalai hi kum 2024 - ah hian bu 43000 a chhuak a, ṬKP chanchinbu Ṭhalai Entu hi kum 2024 - ah hian bu 13050 a chhuak bawk a. Salvation Army hian 'Sipai Tlangau' hi kum 2024 -ah hian thlatin bu 5050 an chhuah a; Ṭhalai chanchinbu The Young Salvationist hi bu 3350 an chhuah a. Salvation Church of India/Chhandamna Kohhran hian 'Chhandamna Kohhran' thla kip chhuak chanchinbu an nei a, a 'copy' zat a lang lo a, Ṭhalai chanchinbu erawh an chhuah lo thung. 

United Pentecostal Church (NE) hian 'Pentecostal Voice' hi kum 2024 -ah hian bu 6100 an chhuah a; PYD chanchinbu Thlamuantu hi kum 2024 - ah hian bu 5250 an chhuah bawk a. United Pentecostal Church (MZ) hian 'Pentecostal Jubilee' hi kum 2024 - ah hian bu 7000 an chhuah a, Ṭhalai chanchinbu Pentecost Meichher hi kum 2023 chhung khan bu 5403 an chhuah bawk tih editor ni mek chuan a sawi.  

Kohhran dangte hi ka be pawp mai thei lo a; a chunga kan tarlan aṭang ringawt pawh hian Kohhran hian chanchinbu bu 193300 kan tichhuak a. Hengah hian Hmeichhe lam leh Naupang lam kan kan la sawi tel lo a; Sunday Sikul Zirlaibu leh Nilai/Beihrual Thupui bu te pawh kan la telh lo a ni.  

Kan hlut tawk em?

Hetiang tak hian Mizorama Kohhran hrang hrang te hian chanchinbu hi kan ngaipawimawhin kan chhuah a; Kohhran mipuite zawk hian kan hlut em? Kan Kohhran chanchinbu chhiar ngai miah lo, editor pawh hre lo Kohhran Upa leh Ṭhalai/Hmeichhia/Naupang hruaitu hi kan awm ṭeuhin a rinawm. Mobile phone leh Youtube khawiha ngaihthla hman, chanchinbu chhiar hman miah lo hi Kohhran hruaitute zingah hian mi tam tak kan awm tih hi thudik a ni.

Pulpit tlang aṭang hian Kohhran hruaitute hian kan kohhran mipuite hi lehkhachhiar taima tura fuih ngai se, keimahni zawk hian kan chhiar ngun em tih hi kan intehna hmasa ber tur a ni. Sum tam tak senga Kohhranin chanchinbu a chhuah, sum senga kan lo lâk hi a man phu khawpin kan chhiar lo niin a lang.

Mi ropui te leh chanchinbu chhiar

Khawvel huapa ram hruaitu ropui leh Pathian thu hriltu ropui tak takte chanchin kan zir chian chuan lehkhabu leh chanchinbu an chhiar nasa hle tih kan hre ṭhin. Pathian thu hriltu ropui tak Billy Graham chuan, "Naupang ka nih lai aṭangin ka nu hian lehkhabu chhiar turin min ti a. Chuvang Robin Hood te ka chhiar a, Tarzan thawnthu bu te hi ka ngaina em em a ni" tiin a sawi a. Amah ngei pawh hian lehkhabu 33 zet a ziak ni. Kum Zabi Sawmhnihna-a Pathian thu thiam ber pawla ngaih Karl Barth chuan, "I kut lehlamin Bible keng la, i kut lehlamah Chanchinbu. Chutichuan a pahnihin chhiar ang che" tiin a sawi a nih kha. 

Kan zui Lal Isua pawh hian lehkha a chhiar ṭhin a; Chanchin Ṭha Luka ziak 4:16 - 20 ah khan a chhiar tih kan hmu a. Thlalera Setana'n a thlêm khan 'tih ziak a ni' tih hmangin a lehkha chhiar kha a hmang ṭangkai hle tih kan hmu bawk (Matt 4:1-10).

Keini chuan kan buaina te chhuan lamin chanchinbu leh lehkhabu kan chhiar ngai lo a, Sunday Sikul zirlaibu tak ngial pawh chhiar chhuak lo hi kan awm a, a pawi hle. Keini aia buai leh hun awl nei lo zawka kan ngaih mi ropui tak tak te hian lehkhabu leh chanchinbu hi an chhiar nasa a ni tih hi Kohhran te hian inzirtir ang u. 


Vanglaini

Kohhran hruaitu, Kohhran chanchinbu leh chanchinbu chhiar ngai lo chuan Bible pawh hi a chhiar ngun lo ang tih hi a lang chiang hle a; Sermon dawna Bible en thuak kan nih chuan kan thusawi a nung mawh hle ang. Pathian pawlna leh awmpuina dawnga thusawi nung leh ṭha tak sawi tur hian Bible leh Chanchinbu kan chhiar te hi a ngai a ni.

Revival Speaker te leh Pastor te, Kohhran Upa te leh Kohhrana rawngbawlna peng hrang hrang chelhtu te hian lehkha chhiar tam ila, Kohhran mipuite pawh i zirtir ang u tiin kan insawm a ni e.

Comments

Post a Comment

Popular posts from this blog

Lal Isua Hmangaihna

Ramhlun North Pastor Bial Zaipawl in kum 2013 a an sak Lal Isua hmangaihna tih hla, T. Laldintluanga phuah hi tun lai ah hrelo kan vang hle awm e. He hla hi Zaithiam hrang hrang te pawhin an sa a. Lal Isua hmangaihna hi kan tan a tawkin engkima engkimah a rintlak zia puanchhuahna ropui tak a ni tih kan hre awm e.     He hla phuahtu T. Laldintluanga, Ramhlun North hi tunah hian Synod Choir (2018-2020) Conductor ni mek a ni a. He hla a phuah dan chanchin hi ka va zawt a, PDF in min lo pe thlap a, a chung ah ka lawm hle.  “He hla hi kum 2013 a ka phuah a ni a, heng hunlai hian a bikin thalaite ah mahni intihlum te, ruihhlo avanga thihna te, thih thut thutna ang chi kha a tam em em a, ka phak tawkin ka vei ve hle a ni. Chung ka thalai pui sual in a tihbuai mek, mahni intihhlum duhna hial nei, nun beidawnga tap mek te pawh chu Lal Isua hmangaihna hian a nghak reng ni hian ka hria a. Emau kawnga khualzin pahnih ten an khawhar hnem tura Lal Isua an sawm khan an va...
Post a Comment
Read more

BEISEINA NUNG

I Petera 1:3-9 A chunga kan tarlan Bible châng innghahna hi Petera te hun laia Asia Minor-a Kohhran țhang chak em em mai te chungchang lehkha a thawn ațangin a ni a. Helai 1:3-9 ah hian Pathian khawngaihnain Lal Isua tiha thawhnlehna hian beiseina nung min neih tir thu leh chu Lal Isua thiha thawhlehna chu kan chhandamna-chatuan nunna kan neih theihna tur a nih thu Petera hian min hrilh a. Beiseina hi keini ringtute chauh ni lo mi zawng zawng hian kan neih hi a pawimawh em em a. Beiseina hi mi rethei te chaw an ti hial țhin a ni. Miin beiseina a neih tawh loh chuan nun hlutna hi a hre tawh țhin lo a. Mi lar, zaithiam, Celeb etc pawh nise amah ah beiseina a awm loh chuan mahni intihhlum mai hi a thlang țhin. Hmanni lawk ah Linkin Park band-a an Vocalist Chester Bennington-a pawh inawkhluma an hmuh kha! Khang te kha a larin khawvelin an hriat nen-beiseina a neih tawh loh vang a ni ngei ang- a nunna kha amahin a inlak hial ni! Chuvangin beiseina neih pawimawh zia hi kan sawi ...
7 comments
Read more

Lal Isua chaknaa innghatin

Kristian Hla Bu Number 149-na kan keu chuan khawvela Pathian hla ropui ber pawl; Edgar Lewis leh William W. Rock te phuah 'Lal Isua chaknaa innghatin' (Just lean upon the arms of Jesus) tih kan hmu a. He hla hi Mizotawngin Ch. Pasena leh Zakunga te'n min lehlin sak a, Zofate zingah he hla hi sam thiamlo kan awm awmlo e.  He hla phuahtu zinga pakhat William W. Rock-a chanchin hi han hriat zui em em tur a awmlo a. Edgar Lewis-a erawh hi chu  February ni 8, 1865 ah Yates City,   Illinois ah a piangin a laiah hming chu Lewis Edgar Jones a ni a. Hla thluk a siam emaw, a phuah emaw hian  Edgar Lewis, Lewis Edgar tih emaw Mary Slater ti te in hming lem a hmang thin. Moody Bible Institute-ah Pathian thu a zirzawh hnuin  Young Men’s Christian Association,  Davenport , Iowa;  Fort Worth , Texas ah leh Santa Barbara, California ah te a thawk thin.  September 1, 1936 khan  Santa Barbara , California ah a boral a;  Santa Barbara Cemetery ,...
1 comment
Read more