Kan thupui tarlan pathumte hi Sap ṭawng nimah se kan pianpui ṭawng ang maia kan hriat te an ni a. An mahni ngau ngau hi kan hre thuk lo a nih pawhin an hming leh an hawi lam hi chu a thawi them tal chuan kan hre vek awm e. He thil pathum hian khawvela mihringte hi a tuam a; mihring leh khawvel awm chhunga kan buaipui tur a ni bawk. An pathuma an ṭan tlan vek ṭum a awm a; chak zawk nih tuma an insual ṭum pawh a awm bawk.
Science
Khawvela hnam fing hmasa chu Grik hi niin mi tam tak chuan an ngai a; Grik mi fing/philosophers te khan khawvel hi engtia lo insiam nge tih kha zawn chhuah an tum niin Tim Lambert chuan a sawi a. Thales, Anaximander, Pythagoras leh Empedocles te hi Science buaipuitu hmasa pawl an ni a. Empedocles (c. 494-434 BC) khan khawvel hi thil pali - lei, tui, boruak leh meiin a siam a ni e tiin a lo sawi tawh a nih kha. Chu chu Aristotle (384-322 BC) khan pawmin khawvel siamtu pangana chu - ni, thla leh ni heltu arsi/planet te hi an ni e tiin a sawi belh a. Ramsa chanchin hriat tumin zoology lam a zir ta hial a nih kha.
Kum BC 650 velah khan Nineveh -ah chuan Neo - Assyrian te chuan van khi hmun riatah an lo ṭhensawm tawh bawk a. Chu an ṭhensawmna Map lem pawh chu The Trustees of the British Museum-ah hian a awm a nih kha. Isua pian hnu kum AD 2-na velah Ptolemy chuan van sang chanchin lo zirin kan awmna lei hi a laiah a awm niin a ngai a. Hei hi Copernicus (1473-1543) chuan a dik lo tih a hmu chhuak a, Galileo chuan a nemnghet a.
Kum AD Zabi 17 - naah chuan Issac Newton te lo chhuakin nasa takin Science thiamnain a hma a sawn phah a. Albert Einstein te lo chhuak zelin thil nihna bul an chhui a. Vawiinah phei chuan thil bul inṭanna 'Quantum Physics/Mechanics' te hi kan zir ta zel a. Kum zabi 19-naah Charles Darwin chuan nunna/biology lo inṭan dan chhuiin, nunna pakhat mawl tak mai chu zawi zawia lo changkang chho/theory of evolution zelin tun hi kan thleng a ni tiin kan zirlaibuah pawh kan zir ta a nih hi.
Kan sawi zo seng lo. Science chuan engkim mai hi mita hmuha a dikna chawhchhuah a tum a, chhiarkawp dana dik thei lo leh mit ngeia fiah dawl lo chu thudik a ni lo e tiin hmasawn zel tumin a la kal mek a ni.
Philosophy
Isua pian hma kum BC 5 -na velah khan Grik khawpui Athens-ah chuan Socrates, Plato leh Aristotle te chuan thil zawng zawng bul chhuiin an lo buai nasa tawh em em a. Chumi hma pawh chuan Thales, Heraclitus leh Parmenides te hian mihring hriatna leh khawvel chanchin te, pathian kan tih tam tak te nena kan inzawm dan te hi an lo zir fe tawh bawk a nih kha. Chuvangin Philosophy hi Science zirna Lalnu (Queen of Science) tiin Emmanuel Kant khan a lo sawi hial a nih kha.
Renaissance/thiamna leh finna kawnga mihring hnam harh chhuah hun, kum 1,400 A.D. vêl lai khan Philosophy hi a ṭhang nasa zual bawk a. Chu chuan dik lo thei lo anga an ngaih Bible din hmun a sawi nghing nasa hle bawk a. Science nena ṭang dunin engkim bul leh a chhan an zawng a, hmuhchhuah tam tak an nei bawk.
Vawiin khawvelah pawh hian Grik/European finna ril/philosophy chuan kan ngaihtuahna a luah a. An thilsawi leh an hmuhchhuah tawh te chu kan zir a, heta innghat tlat mihring hi khawvelah kan tam em em bawk a. Chutiang hria leh thiamte chu mi fing tak leh mi ngaihsan an ni zel bawk. Chhia leh ṭha hriatna, mihring ngaihtuahna fim/reason aṭangin engkim an zir chiang ṭhin.
Theology
Pathian thu aṭanga thil bul chhuia zirna Theology pawh hi Grik mi fing Plato-a chher chhuah/coined niin a lang - Plato lehkhabu 'Republic' aṭang chuan. Theology tih ṭawngkam pawh hi Grik tawng niin theos/God/Pathian tih leh Logos/Word/thu tihna a ni. Kristian te zinga 'theology' thumal hmang hmasa bera ngaih chu Origen-a kha a ni a; ani hian Stoicism (kan dam chhunga thil hlu ber chu hlimna hi a ni a; chumi nei tur chuan khawvela thil hrehawm leh nuam te hian min tibuai tur a ni lo tih zirtirna) leh Platonism (kan hmuh theih piah lamah 'forms' a awm a ring a. Thil kan hmuh zawng zawng hi a hlimthla zawk, a tak chu hmuh theih piah lam ni tih zirtirna) te chuan a rilru an hneh hle a. Chumi lam hawi chuan Theology pawh hi a kalpui nasa a ni.
Isua lo pian hnu kum AD 100 - 200 inkara Kristian te khan ''Theology' tih thumal hi Bible kaltlanga Pathian thu zirna huang ṭawngkamah an hmang chho ta a. Kristian Pathian thu thiam Athanasius (c.296-373) khan 'theology' chu Pathian thu kan hriatna leh zirna huang atana hmang hmasa tu niin Augustine of Hippo (354-430) te, Thomas Aquinas te khan zirna/academic huangah he ṭawngkam hi a seng lut ta zel a ni.
Theology chuan Pathian a ring a, Pathian inpuanchhuahna Bible/Scripture chu a innghahna atana hmangin he khawvel leh a piah lam chanchin thlengin min zirtir a. Rinna leh finna/reason and faith chu lakawpin khawvel awm chhungin chu tiang chuan min zirtir zel dawn a ni.
An pathuma khaikhinna
Science thiamna avanga kan hmasawnna leh kan finna te hi sawi zawh sen a ni ngai lo ang a, mihringte hian kan mamawh zel bawk ang. Chutiang chiah chuan Philosophy avanga mihring nun kan zir chhohna leh kan hmasawnna te pawh hi sawisen a ni lo ang. Chutih rual chuan Science leh Philosophy te hi chuan Pathian an zawng hran lo a. Kristian Scientist/Philospher tam tak an awm rualin Science/Philosophy hi chuan Pathianah engkim a tawp tiin thutlukna a siam hran lo a. Thil bul nihna leh a lo awm chhan leh a lo awmna bul thum hi hmuh tumin finfiahna nen nasa takin a zawng a. Hmuchhuah tam tak a nei a, finna nasa tak min thlen bawk.
Theology erawh chuan Pathian atangin thil bul a zir a, thil zawng zawng awm chhan leh a nihna te, engkim hi Pathian aṭanga lo inṭan a ni tiin rinna/faith nen min zirtir a ni. Pathian a zawnna leh a rinna atan chuan Science/Philosophy thiamna chu a hmang tel bawk a. Chutianga Kristian Scientist/Philosopher te thu leh hla pawh chu zir tur tam tak a awm tih kan hre awm e.
Thilsiam/Cosmological Argument atang te, chhia leh tha hriatna/Moral Argument aṭang te, Pathian/Being a awm tih thutlukna/Ontological Argument hmang tein Pathian a awm a ni tih zirna chi hrang hrang a awm a. Chu chu Theology peng pakhat Apologetics (Grik ṭawng Apologia - venghim/defense - Kristian thurin venhimna) tih huanga awmin Pathian awm ring lo/Atheist te nen kan la chai ho ta zel a nih hi.
A tawpah tu nge awm?
Chutiang chuan thil nihna bul hi kan mihring thiamna sang tak hmangin kan zawng a; natna, hrehawmna, thilmak, sualna adt te hmangin Pathian a awm rin theih lohna tur chhan ṭha tak tak hi a awm a. Keini ang mi mawl phei chuan kan hnial thiam loin kan sawi fiah zo lo. Mahse tu emaw hi a awma, engkim hian chhan leh bul a nei tih erawh hi chu Science/Philosophy hian a hnawl thei bik lo.
Kan tawn hriat atanga kan hriatna (priori/after experience) ni lo, kan tawn hma pawha kan hriatna (a priori/before experience) hmanga thil awm/being kan hriatna, Pathian a awma kan rinna/faith hi chu paih bo theih a ni lo a. Thil zawng zawng hian siamtu/creator a neih ring chunga thil te ber zirchianna (Quantum physics) te pawh hian a tawpah chuan engkim bul tanna atana thil te ber (sub atomic particle) hi chu amah awm/ready made a nih tih hi hi an hmu a. Chu thil lo awmsa chu Pathian siam a niin tiin an pawm lo mai chauh a ni.
A tawpah Pathian a awm tih pawm loa thil eng emaw vanga lo awm tawp kan ni tih ring tur hian rinna/faith a ngai nasa hle awm e. Chuvangin Theology chuan Pathian a awm thu min hrilh a, chumi rin mai chu a dikin chatuan daih a ni.
Comments
Post a Comment