Lehkhabu leh chanchinbu chhiar khat tak kan lo ni palh a nih pawhin Tv leh Youtube atang tal pawhin 'Sikpui leh Sulhnu' tih lehkhabu ziaktu Lalhruaitluanga Chawngte hi vawiina Zofate hian kan hre vek awm e. A lehkhabu leh a thuziak te kan chhiar tam lo a nih pawhin 'Comedian Search' endiktu a nih vang ringawt pawha kan hriat chian a ni a. Vawiinah hian a lehkhabu hlu tak hi kan sawi zui dawn a; kumin Krismas kan hman nawm phahnna tur khawpa lehkhabu tha a ni.
Lehkhabu pian hmang
'Sikpui leh Sulhnu' lehkhabu hi Samaritan printer kutchhuak a ni a; phek 118 a chhah a ni. Lehkhabu pianhmang lian lo tak, leklam awlsam leh zâng tha tak niin kum 2022 thlasik laia tihchhuah a ni a. Hmanni lawkah khan a vawihnihna atan chhut nawn leh a ni bawk. Cheng 250/- man lek niin thuziak sawmpariat a awm a; a ninawm loh tawk leka sei, a khamawm loh tawk leh thui a ni thung.
A ziaktu
Mizote leh khawvel pumpui hian Krismas hi kan ngaihluin Krismas avanga thu leh hla lo piang chhuak ta hi kan sawi seng lo ang a; kan chhiar seng lo ang. Chutianga Krismas avanga thu leh hla lo piang zingah chuan Zofate'n thu leh hla tha, Mizo te tana fiah tak leh kan lunglenna kai thoa Krismas vuakvet boruak fiah taka min hrilha kan lunglenna kai tho tura lehkhabu tha leh ngaihnawm, ngainatawm bawk si Lalhruaitluanga Chawngte -in min hlui hi kan vannei hle.
A ziaktu inngaihtlawmna leh Krismas neitu Lal Isua inngaihtlawmna te hi he lehkhabu 'Sikpui leh Sulhnu' ah hian hmuh hmaih thei hauh loh khawp mitthla leh rilrua lo lang nghal a ni bawk. Chuvangin he lehkhabu ziaktu hi ngaihzawnawm a, a ziahna boruak Krismas lah kan ngaihzawn rawn sa niin a lehkhabu hi chu atchilh tlaka tha a ni.
A chhunga thute
A tira kan sawi tawh ang khan he lehkhabuah hian thuziak sawmpariat a awm a; chung thuziak te chuan Krismas vuakveta Mizo nawlpui te nun dan leh hun hman dan a tarlang tha hle. Chungte chu tlemte han thur chhuak ila -
Hla hlutna a tarlang : 'Sikpui leh Sulhnu' lehkhabu atang hian hla pawimawhzia kan hmu a; Krismas khawvawt pawh sawi loin hla hmangin he hun hlu tak hi mipuiin kan lawmin kan chen a ni tih a tarlang tha hle.
Lal Isua lo pian zanah pawh khan vana mipuite khan vantirhkoh te kiangah khan Pathian an fak tih kan hmu a (Lk. 2:14). He lehkhabuah pawh hian Pathian faka zaiin Krismas leh thlasik khawvawt chu hlim takin kan hmang thin tih a lang chiang hle.
Mizo nunhlui a tarlang: He lehkhabu hi chanchin/history lehkhabu chu a ni hauh lo a; mahse Mizote hian Krismas kan lawm dan leh kan hman dan chiang takin min tarlan sak a. Mizo Kristiante hian Krismas kan lak urhsun theih zia te, Kohhran te hian an ngaih hlutzia leh naupang chenin Krismas hian min tuamin min uap tlat a ni tih a tarlang tha hle a.
Tun laia thangthar zawk keini te hian kan nu leh pa, pi leh pute Krismas lo hman dan leh an sulhnu hlu tak tak te chu he lehkhabu hlu takah hian chiang takin kan hmu thei a, kan mitthlaa hmua suangtuahin a boruakah kan cheng veng veng thei a ni. Thingtlang mi te leh khawpuia awm te pawhin Krismas kan hman dan te chiang takin he lehkhabu atang hian kan hre thei a ni.
Kan lunglenna Krismas : He lehkhabu hmingah pawh hian 'Sikpui leh Sulhnu' tih a ni a; sulhnu chuan lunglenna a keng tel tih kan hre nghal awm e. He lehkhabuah pawh hian thlasik khawvawt vin tak pawh mangnghilh thaka hlim taka Krismas hmangtute khan an sulhnu ngaiin an lung a lenzia kan hmu thei a. Chung an nun hlui leh sulhnu te chu an tu leh fate bula an sawi chhawn fo tur khawpa hlu a nihzia he lehkhabu atang hian kan hmu thiam awm e.
Kum upa lam leh 'U Ama' hmang tam tawh te tana nun hlui leh sulhnu ngaihtuah let vawng vawng theihna tur khawpa lehkhabu lungkuai, keini thangthar te tana kan nu leh pa te thlasik Krismas sulhnu hlu tak tak chanchin leh nakin lawka kan la hmabak ve tur a nizia tarlanna lehkhabu ngainatawm tak a ni.
He lehkhabu hlu tak hi a ziaktu hian min pe ve hlauh mai a, ka lawm hle. Middle Sikul naupangte nen kan chhiar a, ngaihnawm kan tiin kan kham lo hle.
 |
| Presbyterian English School, Cherhlun |
Kumin Krismas hlim taka i hmanna tura i inbuatsaihna kawngah 'Sikpui leh Sulhnu', Lalhruaitluanga Chawngte ziah hi in chhungkuaa lo chhiar ve ngei turin ka duh sak a che.
Comments
Post a Comment