Lal Isua te chhungkua hi an hausa em?

Krismas a hnai chho leh ta a; kan rilruah pawh Krismas lam a lang chho leh tan mek a. He hun hlu tak hi a hlutzia kan sawi thiam tawk lo a, kan hlut thiam tawk lo fo bawk. Vawiinah hian Krismas neitu Lal Isua te chhungkaw chanchin hi kan thiam tawk tlemte hmangin kan zir dawn a ni. 

Mistiri chhungkua

Chanchin Tha Matthaia ziak bung 13:55 kan chhiar chuan Lal Isua chu an khua Nazareth-ah a haw a, mipuite a zirtir tih kan hmu. Nazareth khawmi te hian Lal Isua hi a naupan lai atanga amah lo hre tawh an nih avangin an ngaisang hran lo a, mi danglam bik leh thiltithei tak a nihna kha an hre lem lo. Inkhawmna inah mipuite a zirtir pawhin mak an ti a, ‘thingrem siamtu fapa’ kha a ni lo em ni tiin an zawt a nih kha. A nu leh pa, a unau te pawh an hriat chian a ni a, chhungkaw zahawm tak leh vantlang chunga leng chhungkua an ni lem lo. Marka ziak 6:3 kan chhiar phei chuan Lal Isua chu thingrem siamtu, Mari sawn kha a ni lo em ni tiin mipui chuan an zawt a ni tiin ESV Global Study Bible chuan a hrilh fiah. Chuvangin Lal Isua hi an khaw mipuite chuan an ngaisang hran lo a, mi danglam leh zahkai tak niin an hmu lo. Mihring lamah chuan Lal Isua te hi chhungkaw hausa leh zahkai an ni lo a, misitiri chhungkua mai an ni.

An thilpek atangin an hausa lo tih a lang

Leviticus bung 12 thu kan chhiar chuan – nau neih zawha hmeichhiain fapa a hrin chuan ni 40 hnuah inthen thianghlim tur a ni a, beramno kum khat mi leh sual thawina atan parvano emaw thuro emaw ken tur a ni a. Beramno an neih phak loh chuan thuro tuak khat emaw parva tuak khat emaw ken tur a ni. Mari pawh hian fapa Lal Isua Krista a neih vangin ni 40 hnuah inthian thinghlim turin Jerusalem-ah an kal tih Luka bung 2:22-24-ah kan hmu a. Hetah hian Beramno an neih loh avangin thuro tuak khat emaw parva tuak khat emaw an keng tih kan hmu bawk. Bermano pawh nei zo lo chhungkua an nih chuan an hausa bik lo tih a lang. Lal Isua te chhungkua hi mihring lamah chuan an ropui bik lo a, nang leh kei ang bawka khawsa chho ve nawk nawk chhungkua an ni ve ang.  

Hmeithai chhungkua

Chanchin Tha Luka ziak bung 2 - na kan chhiar chuan Lal Isua hi kum 12 –a upa a nihin a nu leh pa te’n Jerusalem-ah Kalhlen Kut hmang turin an hruai tih kan hmu a. Lal Isua hi Temple-ah zirtirtute bulah a awmin a nu leh pa te rualin a haw ve lo a, nithum hnuah Lal Isua hi a nu leh pa ten an zawng hmu leh tih kan hmu. Hei mi bak hi chu Josefa chanchin Bible-ah kan hmu zui lo a; mi thiamte chuan Josefa hi a boral hma niin an ngai a, a pawmawm hle. Hmeithai chhungkua an nih vang te pawh a ni ang e, kum 30 a nih atangin rawngbawlna atan tih Luka ziak 3:23-ah kan hmu a. Chanchin Tha Johana ziak 2:13,23, 6:4, 11:55, 2:1 kan chhiar chuan Lal Isua hian Kalhlen Kut hi vawi 3 a hmang tih kan hmu a, chuvangin kum 3 chhung vel hi Lal Isua rawngbawl hun chhung niin zirmite chuan an ngai a. Josefa hi Lal Isua’n rawngbawlna atan hmain a boral tawh niin an ngai bawk. Heng avang hian Lal Isua hian a chhungkua a enkawlin hun a hmang nasa ve ang tih a rin theih a; unau mipa 4 – Jakoba, Josea, Juda leh Simona te a nei bawk. 

 Kan phak tawk Lal Isua

Lal Isua Krista chhungkaw chanchin kan zir atang hian Lal Isua hi kan phak tawk a ni a, inthlahrunna tur reng reng a lo awm lo. Chhungkaw hausa leh ropui tak kan lo ni a nih pawhin kan tan Lal Isua tlawm takin a awm a; chhungkaw khawsak harsa ve tak kan nih pawhin Lal Isua chu kan dinhmun anga ding ve tho a ni bawk. Chuvangin Lal Isua hi kan phak tawk, kan mil tawk a ni a, a piancham Krismas te pawh hi ropui tak leh kan neih phakbaka lawm turin min duh lem lo ang. 

Vanglaini

 

Kan retheihna vang tein Krismas boruakah rilru hah tak leh inthlarunna rilru puin kan indawm kun fo tih hi ataka hretu te kan ni. Mi angin thil thar leh mawi te neih ve kan duh a, kan sum leh paiin a daih loh avanga lungngai hi kan awm thin. Mahse Krismas neitu Lal Isua te chhungkua hi an hausa lem lo a, kan pek ang ang leh kan neih ang ang hi a pawm a ni. Tuna kan nihna ang mai hian Krismas i hmang teh ang aw?