Mihring hian kan duh emaw duh lo emaw, he khawvela kan awm chhung hian Pathian thu leh Ram inrelbawlna/Politics hian min tuam reng dawn a. Chuvangin a tha zawnga Politics hi kan hmang a nih chuan ram nuam leh changkang, sorkar tha kan nei ang a. A chhe zawnga kan hmang zel a nih chuan tun aia chhe zawk leh tha lo zawk hian kan ram hi a awm zel dawn a ni tih hi mi pangngai chuan kan hrethiam vek awm e.
Pathian leh Politics
Thuthlung Hlui kan chhiar chuan Pathian hi Abrahama hnen atanga inpuangin Israel hnam a din a; Israel fate ram leh hnam kaihhruaina/politics - ah chuan thuk taka inrawlhin Amah chu a laiah (God-Center) a awm a, a thu ber a ni tih kan hmu. Pathian aia thildang an thlana mi lem an biak emaw an ram hruaitute leh Lal te'n Pathian an ngaihsak loh emaw chuan malsawmna an dawng ngai lo a. Israel ram leh hnam chu an chhehvela hnamdang hoin an run a, salah hruaiin an tluchhe thin tih kan hmu a. Lal Isua Krista pawh kha khawvela a lo kal khan Israel te chuan Rom Sorkar awpbehna laka chhanchhuaka roreltu ni turin an beisei a nih kha. Lal Isua Krista erawh chuan Politics thilah chauh ni loin Thlarau chhandamna kha lo kalpuiin Israel fate mai piah lamah khawvela mi zawng zawngte zalenna tura lo kal a nih thu a lo kal chhan ber a ni a. A zirtirna zawmtute chu ram leh hnam rorelna thlenga nghawng, khawvel leh chatuana thu dik leh rintlak a nih thu kan hmu.
Politics leh hausakna
Khawvel ram hrang hranga ram hruaitu Politician hausa tak tak hi an tam em em a; chhungkaw hausa tak nisaa ram hruaitute an awm bawk. Politics vanga hausa ta hi khawvelah leh Mizoramah hian mi tam tak an awm tawh a; chutiang mite kaihhruai ram leh hnam chu khawvela ram changkang leh hausa tia entawntlak leh ngaihsantlak hi an awm meuh lo thung. Thuthlung Hlui hun laia roreltu, mahni inhai vura mipuite rap beta lal hrawt thinte kha Zawlneiin Pathian thu hmanga a zilh leh a vaukhan, a tawpa Pathanin a hremzui takte an ni zel. India ram leh Mizoramah pawh hian Politics vanga hausa, thuneihna hman dik loh avanga hna tha tak tak hmua hausa te chanchin kan hmuin kan hre tam ta hle a. Politics hmanga hausak chak, a hausak theih a ni tih hria hi mi tam tak kan awm bawk a. Chutianga dik lo taka Politics hmanga hausakna rah chu mi rethei leh hausa inkar tizau tu, ram hmasawnna dal tlat tu a ni tih hriaa dodal tlat tu mi tam tak kan awm tawh bawk.
USA leh Politics
Mipui rorelna sorkar (democracy) kan sawi apianga kan sawi hmaih theih loh tur chu United States of America/USA hi a ni. An ram hruaitu President te pawh khawvela ram hruaitu ropui ber leh thiltithei ber anga ngaih an ni a; chutianga ngaih phu khawpin an ram hi an kaihhruai bawk a, khawvelin kan chung en lo thei lo a ni. USA President 33 - na Harry S. Truman khan, "Rukruk hmang leh bum hmanga i inlet a nih ngawt loh chuan Politics atang hian hausakna i chhar ngai lo ang," tiin a sawi a nih kha. Khawvel History thlak danglama Thlaa mihring lawn tirtu John F Kennedy khan, "Ka ram hian eng nge min tihsak theih ang tih hi in zawt loin, ka ram tan hian eng nge ka tih theih ve ang tih hi in zawt zawk rawh," tiin rilru dik pua ram leh hnam vei turin mipuite kha a lo choin a lo fuih daih tawh a nih kha. Keini, kan block hruaitu, MLA, Minister te hnen atanga tanpuina beiseia vote thlak thinte nen chuan kan in ang lo hle mai!
India leh Politics
India ram pawh hi khawvela mipui rorelna sorkar (democracy) lian ber pawl a ni a. A laipui/central atang hi chuan theihtawp chhuahin India ram state 28 leh Union Territory 8 te tan hian tan lain sum leh pai tam tak hman tur min pe thin. Chutih rualin state Chief Minister te that leh that loh azirin kan ram hmasawnna chu a in rual khai lo hle. India rama State rethei ni thin Bihar, Lalu Prasad Yadav-a kaihhruai leh tuna an CM ni mek Nitish Kumar-a kaihhruai Sorkar in an loh zia chu Bihara kum 33 zet awm Mizo IAS (Rtd) Clement Liankunga (L) khan 'Ka Zinkawng Bumboh' tih lehkhabuah khan a sawi chiang hle a nih kha. Thamna tam tak nen Lalu-a khan kan Mizo IAS kha a be fo a, a ram kaihhruai sorkar pawh a tha loin hmasawnna a awm lohzia leh eirukna thubuai chungchang (Fodder Scam) te pawh kan hre vek awm e. Mipuiin Chief Minister thlakin Nitish Kumar-a hnuaia kum hnih hnu lekha Bihar hmasawnna te pawh chiang takin kan hmu a nih kha.
 |
| Vanglaini |
Kum 2012 November thlaa din Aam Aadmi Party/AAP chuan kum 2013 November atanga Chief Minister Arvind Kejriwal-a hnuaia Delhi khawpuia rorelna an chan atanga Delhi hmasawnna te hi nitin chanchin thar luahtu a ni ti ila kan sawi uar lutuk lo ang. Arvind Kejriwal hi Kristian ni miah lo chungin Tlanga chunga Lal Isua thusawi ( Matthaia 5 ) te hi tha a tiin ram rorelna tan a hmang a nih kha. 'Ni khat CM film' ti a kan sawi awlsam mai, kum 2001 a tihchhuah 'Nayak: The Real Hero', Anil Kapoor channa hian India rama State hrang hrang te Politics din hmun chu a tarlang chiang hle awm e.
Politics leh Mizoram
Mizoram Politics din hmun hi a ngaihna hre chin chuan a tha tawk lo tih hi - thuk taka kan hre lo a nih pawhin - kan hre vek awm e. Mipuiin kan ram hruaitute kan beisei dan chu - anni party hi tlang tling ila, ham thatna chi hrang hrang - hna, pawisa adt - min pe thei ang tih rilru kan pu a. Chuting chu mipuiin an beisei tih hriain MLA te pawhin mipui duhzawng, a thlawna pawisa sem leh party mi leh sa induhsakna hawi zawnga in zuarin kum nga chhunga lal dan an ngaihtuah ber a. An lal chhungin an duhsak zawngte hnaah thunin, a tling leh thiam tak tak te hnawlin chutiang chuan Mizoram, Kristian ramah hian Politics kan khel mek a ni.
Mi ram hruaitute chuan thusawi ropui tak tak, zir tham leh sawichhawn tham, khawvel awm chhunga mi dangte pawhin an sawi chhawn fo tur thu sawiin a takin hna an thawk a. Kan ram chuan kan ram hruaitute thusawi chu kan nuihzat a; a tak taka thil thleng ngai lo tur thusawiin ram hruaitu dawt sawi thiam anga kan hriat zui reng tur tawngkam leh thiltih an nei ta teuh mai hi a pawi em em a. Kan tu leh fate hian kan ram hruaitu zahawm tak takte thusawi leh thiltih atanga in zirna tur leh sawi chhawn tur thu tak hnuchhiah an nei miah lo tur te hi a pawi takzet zet a ni.
Kan ram hruaitute an hausa a, mipui kan rethei tlawk tlawk a; leiba kan ngah em em bawk a, a la pung zel leh nghal! Inthlan dawn hnaihah sum leh pai tlemte hmanga min ti lungawiin hruaitu tha lo te kutah ram hruai hna kan pe leh a; i harh mawlh ang u. Kan ram hruaitute hi dik lo thei lo, eiru thei lo leh dawt sawi thei lo tura siam turin mipuite hi i awm mawlh teh ang u. Kan vote hlu tak hmanga lalna leh thuneihna chang mai mai, kan tana rawngbawl tura kum nga chhung atan chauha kan thlan lal te hian mipui hlutna leh chanvo dik tak, kan thiltihtheihna hi hre tur leh min hlaua min zah turin Mizoram mipuite hi i harh ang u.
Beiseina dik lo leh tha lo, kut tling loa hausak kan tumna rilru hi mipuiin paih ila. Chutianga dik taka rorela kan ram kaihruaitu tur chu mipui hian zawngin thlang ila, an in dik siak sup sup ang a. Ramin hma a sawn ang a, mipui te pawh kan lo hausain hna tawh tur kan lo nghah ngei ngei dawn a ni. Kan ram politics hi kan Kristianna darthlalang lian ber a ni a, tuna kan lan danah hi chuan Kristian dik tak kan ni lo a ang hle. Hawh u, i harh tak tak ang u.
Comments
Post a Comment