Kan sawi tur hi thil thar a ni lo a; khawvela lehkhabu ziaktu hlawhtling ber, lehkhabu ziah avanga khawvela mi hausa tawntaw ni thei hmasa ber J.K. Rowling chanchin hi kan hriat fo tawh hnu a ni ang. Pasal thena fa pakhat pawm chunga a hlawhtlinna chanchin hi kan sawi thar leh dawn a, chona leh beiseina min siamsaktu a ni ngei ang.
A chanchin tawi
J.K. Rowling hi ni 31 July 1965 khan Yate-a Cottage Hospital-ah a piang a, a lai ah hming chu Joanne Rowling niin vawiinah hian kum 58 a upa a nih chu. Sap ram chhungkaw pangngai tak atanga lo piang a ni a, sikul kai rual a nih atangin thuziak mi nih a duh a. Insider-in an kawmnaah a sawi danin kum 6 mi a nih atangin thuziak mi nih a duh tawh thu a sawi. A hming 'Rowling' tih avang hian sikula a thiante chuan an chhaih thin a, 'Rowling pin' tiin an ko thin. Primary sikul hi Gloucestershire-ah kum 9 a nih thlengin a kal a; Kum 1982 khan Oxford University-ah luh a tum a, a tling zo lo. Hemi hnu hian University of Exeter, France atangin College a zo a, Amnesty International (mihring dikna chanvo humhalhtu pawl) ah a thawk a. Kum 1990 khan a nuin a boral san a, a tuar hle a. Kum 1991- ah C Ronaldo te ram Portugal-ah English zirtirtu hna thawkin Jorge Arantes nen intawngin fa Jessica a nei a. An hlim viau dawn emaw tih laiin kum 1 hnuah an inthen leh ta mai a. Tunah tak hian Dr Neil Murray nen inneiin Edinburgh-ah an cheng a, fanu 1 leh fapa 1 an nei mek a ni.
A pasal hmasa zawk a then lai hian J.K. Rowling hian hna a nei lo a, fa pakhat pawm chungin a nun chu hreawm a ti hle a. Mahni intihhlum mai a tum a, rilru lam natna/depression a nei bawk. Chutiang teh nuaia a nun hman lai chuan Harry Potter a ziah tawh sa hi a chhunzawm a, vawiin hi a lo thleng ta a ni.
Harry Potter thawnthu lo pian dan
Harry Potter a ziah hma hian J.K. Rowling hian Sazupui chanchin thawnthu 'Rabbit' tih chu kum 1971 khan kum 6 mi lek a nih laiin a ziak a. J.K. -i nu hian 'Rabbit' hi lehkhabua chhuah turin thurawn a pe nghe nghe a ni. Kum 1990-ah Manchester aṭanga London pan tur relah J.K. Rowling chu chuan a tum a, rel chu darkar li zetin an tikhawtlai a. Hetia rel khawtlai an nghah chhung hian khawvel hriata amah pho chhuaktu tur naupang pakhat dàwi lam zirna school-a a luh dan chanchin chu a ngaihtuah chhuak tan ta a. Tichuan Harry Potter thawnthu chu a bul atanga intanin a indawt dan tur fel tak nen a thinlungah a lo lut ta zawih zawih mai a ni.
"Keimahin London panin relah ka haw a. Ka ngaihtuahnaah Harry Potter chu a lo lut ta a. Kum 6 mi ka nih lai atangin thil hi ka lo ziak ve fo tawh a, mahse chumi tum anga ruahmanna mumal chu ka la dawng ngai lo. Amaherawhchu, chutih lai chuan pen ka lo ken theihnghilh tlat pek a; mi dang hnena pen hawh han dil kha ka hreh bawk si a. Tichuan darkar 4 chhung ka chuanna rél an tihkhawtlai chhung chu ka thu a. Ka rilrua thawnthu ruangam lo lang chu ka ngaihtuah zui ta char char a. Chumi tlaiah chuan Harry Potter bu hmasa ber ‘Philosopher’s Stone’ chu ka ziak tan char char a ni” tiin a sawi. Chumi tlai chuan Clapham Junction bula a flat-ah Philosopher’s Stone phek hmasa ber chu a ziak tan a; Portugal/Porto-ah Harry Potter lehkhabu hmasa ber bung hmasa pathum chu a ziak a, a tam zawk chu Tchaikovsky-a Violin Concerto a ngaihthlak laiin a ziak a ni.
A chhuak nghal mai lo!
Kum 1995-ah Harry Potter thawnthu hmasa ber a ziah zawh hian lehkhabua chhuahsak tu tur a hmu mai lo! Mizoram te angin Press-a va dah luha lehkhabu tihchhuah kha an tih dan a ni ve lo a; lehkhabu chhuahtu/publisher te'n lehkhabu chhuah tur (manuscript) chu an chhiar phawt a, an duh zawng a nih chauhin an chhuahsak thin a. Chuvangin J.K. -i lehkhabu pawh chu lehkhabu chhuah thin mi 12 zet te chuan an hnawlsak a ni. Mahse beidawng duh loin lehkhabu chhuah thinte chu a be kual zel a. A tawpah chuan mi hriat hlawh em em lo Bloomsbury Publishing Plc chuan kum 1997 - lehkhabu a ziah zawh atanga kum hnih hnuah bu 1000 lek chu an lo chhuahsak theih thu an lo hrilh ve ta a; chu pawh chu £2500 pe lawk turin an la ti zui!
Bloomsbury Publishing hian a tirah hian, mi hriat hlawh pawh ni lo J.K. Rowling lehkhabu Harry Potter hi phur takin an chhuah hauh lo! Bloomsbury Publishing chairman Nigel Newton chuan Harry Potter kutziak hmasa ber chu a elpui te zawng zawngin an hnawl vek tih a sawi. J.K. Rowling 'agent' Christopher Little chuan Soho Square-a Bloomsbury Publishing office te tak te chu a tlawh a, an chariman Newton-a chhiar turin lekhabu phek 50 (sample) a pe a. In lamah lehkhabu chu a hawn a, mahse amah ngei chuan chhiar ta lo chuan a fanu kum riat mi Alice hnenah chuan a pe a.
Darkar khat hnuah chuan Alice-i chu in chung pindan atanga lo chhukin, “Pa, hei hi a dang zawng aiin a tha a ni" tiin a pa chu a hrilh ta a. Chutia fanu te berin ngaihnawm an tiha tha an tih chuan tiin Nigeil Newton hian Harry Potter chu bu 1000 lek a'n chhuah chhin a, a bak zawng chu 'History' a ni ta.
Khawvela lehkhabu hralh hnem ber a ni
Kum 1997 June thlaah Bloomsbury Publishing Plc chuan Harry Potter lehkhabu hmasa ber chu bu 1000 an tichhuak a, chuta tanga a chanve bu 500 chu library hrang hrangah an pe darh a. Thla nga hnuah chu lehkhabu chuan Nestle Smarties Book Prize-a dawng nghal a. Kum 1998-ah United States-ah chu lehkhabu chhu thei tur zawnna an neihah chuan Scholastic Inc. chuan $105,000-in an chhang a; a ziaktu J.K. Rowling lawm lutuk chu a thi lo chauh a ni!
'Harry Potter and the Goblet of Fire' hi ni 8 July 2000 khan tihchhuah a ni a, UK-a chuan nikhatah bu 372,775 hralh nghal a ni. Ni 16 July 2005-a tihchhuah 'Harry Potter and the Half-Blood Prince' chu darkar 24 chhungin bu maktaduai 9 zet hralh a ni bawk. Kum 2007 February thlaa tihchhuah 'Harry Potter and the Deathly Hallows' chu a ni khatnaah bu maktaduai 11 zet hralh nghal a ni bawk. Harry Potter bu hi kum 1997-a tlangzarh a nih atangin khawvel pumah bu maktaduai 500 chuang hralh a ni tawh a, phalna nei thlap/official-in tawng 82-ah lehlin a ni tawh bawk a ni.
Film lamah pawh a hlawhtling
Harry Potter film-te hi khawvela film franchise hlawhtling ber pathumna an ni pha a, box office-ah dollar tluklehdingawn 10 vel zet an lalut tawh a ni. He film changtute - Daniel Radcliffe, Emma Watson, Rupert Grint, Tom Felton, Bonnie Wright adt hi lemchan khawvelah pawh mi hriat hlawh te vek an ni tih kan hre awm e. Tun thlengin lemchan khawvela hming langsar leh hausa te an ni vek a nih hi.
Hmeichhe huaisen
Kan sawi tak ang khan J.K. Rolwing hian Harry Potter a ziah tirh hian hlawhtlinna a chang nghal vek lo a, harsatna a paltlang nasa hle. A pasal a then a, a nuin a boral san a, fanu Jessica Isabel Rowling Arantes (Jessica Mitford) nen an inzui kawi hnek hnek a. Chuvangin Harry Potter thawnthu pawh hi a fanu mutthilh hlanin Nicolson’s Cafe leh The Elephant House Edinburg-ah a ziak a ni.
Harry Potter bu hmasa ber a chhuah dawn hian a hming dik tak Joanne Rowling tih a hman chuan mipa hoin an chhiar duh loh a hlau a, J.K. Rowling tiin a ziak a ni. Chuvangin amah ngaisangtu hmeichhe pakhat Francesca Gray chuan a lehkhathawnah 'Ka Pu/Dear Sir' tiin a ko nghe nghe!
Hlawhtlinna chang tur hian mi fate nih a ngai - tiin fiamthuin kan sawi thin. Mi thenkhat hi chu an awmna leh an seilenna azir tein hlawhtlinna hi an chang thei niin kan hre thin. Mahse, keini pawh hi kan awmna khawvelah theuh hian 'mi fate' angin hlawhtlinna kan chang thei a ni. Taima tak leh beidawng loa beih tang tang hi hlawhtlinna chu a ni a; chu chu Pathianin mal a sawm mai a ni.
Comments
Post a Comment