Tun Mizoram khawvelah hian eng hi nge kan mamawh ber tih inzawt ta ila; a chhanna tam tak awm thei zingah chuan - min hrethiamtu leh kan rilru lama kan harsatna, a ruka kan vei leh kan buaipui hi a ni a. Chungte chu Sap tawngin Depression/Anxiety adt kan tih hi a ni. Hei hian kan rin aiin vawiinah hian kan nun a tibuai a, kan ngaihtuah ngun a tul hle. Chu mi damna chu kan mawh takzet a ni.
A lo awm chhan
Hetiang lama mi thiam leh zirbing mi ka ni lo a; heti lama mi thiamte'n an sawi leh a chhan awm thei hrang hrang an sawi te hi kan hre fo tawh awm e. Kan hun tawn zir loh vang te, kan beisei loh taka kan chunga thil lo thleng leh inthlahchhawnna avang tein hetianga rilru lama natna leh harsatna hi kan chungah a lo thleng thin a. A lo awmna chhan chu engpawhnise, he natna neitu leh veitu tan chuan natna leh hreawmna, thihna hial min thlen theitu a nih avangin kan ngaihpawimawh hi a ngai takzet a ni.
Mi dangte hriatchian leh tanpui
Kan bula hlim taka nuia kan fiam bawrh bawrh te, an chanchin tha lo leh chet mawi lohna leh famkim lohna kan sawisaka kan rel bawrh bawrhte hian he natna hi an lo vei ru reng a. A taka an natna vei an lanchhuah tir meuh chuan 'A va pawi em!' tih chiah hi kan sawi theih tawk a ni tawh thin a. Chuvang chuan kan inhriatchiana kan inngaihsak hi an lo ngai takzet a ni. Keini hi chutianga pan tlak leh hrilh tlak angin min ngai em tihte hi in enfiah fo a tul hle. Hetianga rilru lam natna neite hian an chhungte leh mi dangte hriat te hi an hlau fo a, an mahnia an inchinfel zawh loh hnuah te hian kan hrechhuak ve chauh thin a. Chuvangin kan thiante, kan nupui pasal te, kan kawppui leh kan chhungkua, kan rawngbawlpui te leh kan rin loh deuh deuh te hian hetiang hian harsatna an nei thei tih hriain kan inhriatchan tawna kan inngaihsak tawn a ngai takzet a ni.
An damlo a ni
Mi thenkhatte hian hetianga rilru lama harsatna leh natna nei te hi nep kan ti a, kan sawisel bawrh bawrh thin a, hei hi a tha lo hle. An thusawi leh an harsatna te kan ngaihnep sak a; Pathian an rin tawk loh vangah te kan la puh ta dah a! Mahse natna leh damlohna a ni a, Cancer leh Malaria te anga natna chikhat a ni tih hi kan hriatchian a tul hle. An thusawi kan ngaihpawimawh te, an harsatna kan hriatthiam te hi a tul em em a. Depression/Anxiety neite hian chhun lam aiin zan lamah te hian hreawm an ti zual a, chung hun lai chu ngaihsak an mamawh zual lai a ni a, an tan kan inhawn a ngai hle. An mahni ngei pawh hian he natna hi an vei tih an inhria a, mi a leh rilru buai a ni lo a, damlo an ni tih hi an inhre ve reng. Damna pawh an duh a, thil tam tak an ngaihtuah a, a tanpuitu leh a kawng kawhhmuhtu nih hi kan tum tur a ni.
I inhawng zau ang u
A tir lama kan sawi tawh ang khan rilru lama natna nei te hian mi dangte bula sawichhuah leh inpaihthawl hi an hreh em em a; chuvangin rei tak an thup thin a. Kan hriat chhuah meuh hi chuan an lo vei thuk tawhin thil tha lo an tih tawh hnuah te kan hre ve chauh zel a. Chuvang chuan kan rin loh leh kan beisei loh tak tak te hian he natna hi an lo vei ru thei a. Anmahni tanpui tur hian zau takin i inhawng ang u. An nihna leh an nat chhan te buaipui vak vak loin, he natna hi an lo vei tawh a nih chuan tanpui tur leh damna an chan theihna tura theihtawp chhuahpui turin mi tin te hian tan la ang u. Kohhran thalai te leh mi puitling tak tak te hian hetianga kan bula awmte natna vei hi damna an chan theihna turin kawng awm apiang zawn sakin missionary hna thawk ang u. Va dem leh va sawi chhe hman kan ni tawh lo a, tuna min mamawhna hi an tihlan theihna turin keimahni zawk hi i inhawng zau ila, i inhuam ang u.
Rilru lam natna nei ka tawn hriat ve tawh te hian an chhungte leh an mahni hrechiangtute hrilh hi an hreh tlangpui a, an buai zual hnu feah an chhungte hian an hre chauh thin. Tin, a thente phei chuan an natna vei hi kan hrethiam lo a, an nep vang leh an rilru no vangah te kan la ngai a, kan la dem lek lek zawk thin. Chung avangte chuan min hrilh chak lo a, a rukin an tuar tlawk tlawk a, thihna hial an tawh hnuhah te kan hre ve chauh thin. Chuvangin hetianga a pawi tur zawng zawng a pawi zawh hma hian kan theihtawp chhuaha kan inhawn a ngai hle. An tana kan inhawn hmasak phawt chuan min hrilh hreh reng reng lo tih hi a langchiang a, tanpuitu leh an mahni hmangaiha ngaihsaktu an mamawh em em zawk a ni.
Mi dangte hrilh rawh
Hetiang rilru lama harsatna kan neih hian ngawih bo pui mai loin min hrethiama min tanpui theitu tur zawngin tanpuina i dil hreh lo ang u. Kan harsatna hethiam lo leh min hmusita min ngaineptu, min ring lo tam tak an awm lai hian kan tana inhuam em em an awm teuh a. Chutiang mite chu kan la tawng fuh lo mai a ni tih hriain damna zawngin i pan ang u. A zualkai tawh hnu leh a inchherchhuan teuh thawh hnuah tanpuitu tur kan zawng thin a, kan tlai lek lek zel tawh a. Chu chuan beidawnna thuk zawkah min hruailut a, a tawpah kan chhe zo ta vek thin a nih hi. Chuvangin kan natna hi enkawl dam theih a ni a, tanpuitu zawngin sawi chhuak ila, beiseina nen damna i zawng ang u. Kan thupa kan up reng hian a tawpah chuan a langchhuak tho tho a, thihna hial te kan tawh phah thin a. Chuvangin a tir te atangin dam tumin damna tur i zawng nghal vat vat zel ang u. Hetiang lama mi thiam leh doctor te, Pastor leh kan thian tha tak tak te an awm teuh a. Chung mite chuan min tanpui an chakin an inhuam em em a ni.
I mal lo a, i dam lo tih kan hria a, i natna hi a zahthlak loh. I damna tur a nih phawt chuan kan theihtawp piah lam thlengin kan inhuam a ni tih hria la, min hrilh turin kan ngen che a ni. Khawvel hi hmelma neihna atan te, mi huatna atan te hian a uiawm lutuk a, kan dam rei bawk si lo. Chuvangin mahni nunna lakna atan phei chuan a uiawmin a pawi em em a, kan tanpui duh che a, kan hmangaihin kan hrethiam takzet che a ni tih hi lo theihnghilh suh.
Pathian hian engkim a ti thei a, kan natna zawng zawng pawh a ti dam vek thei. Chuvangin kan natna tawrh hi mi dang natna nen a in ang loin a zahthlak pawh ilo ti mai thei. Eng anga harsatna thuk leh zahthlak, sawi chhuah leh ngaihtuah ringawt pawha hreawm ngawih ngawih pawh a ni thei. Mahse Pathian rinchhanin kan siam tha leh vek thei a, bul kan tan tha leh thei a ni. Chu chu hre reng la, kan natna hneh tumin Pathian hnen i pan dun teh ang tiin kan insawmin kan inngen a ni e. Lo kal rawh le.
Comments
Post a Comment