Engkim mai hian a lang chin leh lang lo chin a nei a; a lang lo lama thil tak tak awm chu hmuh chhuah tumin - Science leh Philosophy hmang te pawhin kan zawngin kan chhui a. Thutak leh thil tak tak chu hmuh tumin mihring hian kan dam chhung hun hi kan chhiar zo a ni ber a. Kristiante erawh chuan thutaka innghahna kan neih chu Bible hi a ni a. Vawiina kan dinhmun hi Bible zirtirna atangin a lang lo lama thil awm chu kan chhui dawn a ni.
Chhung ril lama takna
A lang lo lam kan sawi hian chhungril lama thil nihna tak tak, kan pawn lam lan dan min nih tirtu kan sawina a ni a. Sam 51:6 - ah chuan, "Ngai teh, chhûngril lamahte hian takina i duh thin a: Tichuan lang lo lamah hian finna mi hriattir ang" tih thu kan hmu a. Lal Davida chuan uirena sual lian tak mai tiin tual a that zui a; Pathian pawi a khawih a. Chu a sualna avang chuan Pathian lakah a inchhirin Pathian chuan a ruka sual tih chu a huain a duh lo a ni tih chiang taka a hriat chhuah leh zual avangin Davida chuan he Sam hi a phuah ta a ni. Sam 51 hi 'Inchhirna Sam' tiin an sawi hial reng a nih kha. Kristian zirtirnaa innghat, Bible zirtirna ringa nun hmang kan nih chuan - a lang lo lama kan nun hi Pathianin a hrechiang duhin, chu a lang lo lama kan nun dan chuan thutak leh finna min hriattir dawn a ni tih helai thuah hian kan hmu chiang hle.
A lang lo lam - mimal nun
A lang lo lama kan nun hi thup reng theih a ni lo a; a lang lo lama kan nun dan dik tak chuan lan chhuah hun a nei thin. A ruka mi dik tlat, rinawm tlat, taima tlat, Pathian tih tlat mi chuan a tawpah chawimawina a hlawhchhuak nge nge zel. Tlang chunga khaw awm chu thuruk theih a ni lo angin, a lang lo lama nun nget nei lo, sual haw tak tak lo, Pathian tihna tak tak nei lo mi chuan a tawpah mualphona kan pumpelh thei ngai lo. Engkim hriaa rel feltu Pathian hi - hmangaihtu Pathian, ngaihdamna leh khawngaihnaa khat nimah se sual haw Pathian a nih tlat avangin mi sual te chu kan mualpho ngei ngei tih hi Pathian awm ring miah lo te pawhin a dikzia kan hre awm e.
A lang lo lama kan thil tih that leh thil sual kan tihte hi kan thupin kan zep tlat a ni thei e. Mahse chung zawng zawng hretu leh kan thiltih ang zela rorelna dika rorel tur Pathian chu bum theih a ni lo. Mipuite pawh hian mi dik leh mi tha kan duh tak tak a nih chuan roreltu tha thlanchhuah hi kan mawhphurhna a ni a. Mi dik lo leh tha lo roreltu kan neih reng chhan te hi kan rilru leh kan duhthlanna dik tak lo lang chhuak a ni. Kohhran huang chhung chauha dikna duh, a bak zawnga mahni tana nung leh si kan nihna te hi Pathianin a hre reng a. Chuvangin kan phu tawk leh kan thiltih rah mil zelin ram roreltute pawh min pe a ni tih hi huai takin kan sawi ngam a ni. Chutih rual erawh chuan mi dik, mi tha, Pathian tih tlat hi mi tamtak kan awm a. Chung mite chuan hnehna an chan hun pawh a la awm ngei ang. Mi mal theuhin a lang lo lama kan thiltih thin ang zelin keimahni leh kan ram hi a damin a dam lo ang.
A lang lo lam - Politics
Ram leh hnam rorelna, Sorkar/Politics thilah pawh hian Pathian hi thuk takin a inrawlh a. Thuthlung Hluia Lalte leh Roreltute bu kan chhiar chuan, lalte leh roreltu te khan an ram leh hnamin Pathian an hawisan apiangin an tluchhe thin tih kan hmu. Danial Block, Gunther H. Knoedler Professor Emeritus of Old Testament, Wheaton College -a mi chuan Roreltute lehkhabu hian Pathian hnena kir leh tura mipuite kohna a entîr tiin a sawi a. Chumi awmzia chu - a lang lo lama roreltute dik lohna hi Pathianin a duh lo a; dik taka rorel turin min phut a, Pathian thupek a ni tihna a ni. Vawiina kan ram roreltute chet dan hi a lang lo lamah hian a fel loin Pathian pawm tlakin ro an rel lo tih kan sawi thei awm e. Ram/State khat ve meuh Chief Minister thusawi kan awih loa kan nuihzat tlat ta mai te hi a lang lo lama kan thiltih rah a ni.
A lang lo lama Pathian kan tih leh tih lohna hi kan mimal nun, kan kohhran leh kan ram leh hnam awmzel dan tur leh kan hmabak hriltu a ni a. Kan thil sual tih, kan sim loh avanga mualphona kan tawh mek te hi a lo lang chhuak fo a. Chungte chuan mualphona min thlen a, insiamthaa sim tur kan ni. Mahse tuna kan Mizoram khawvel leh sorkar rorelna te hi en ila; a lang lo lama kan sualna lo lang chhuak hi kan zahpui ta mang lo a ang hle. Lal leh thuneitute sualna leh mualphona chu dan hmanga hrem an nih rualin dan hmang vekin zalenna an pe a. Mi rethei te sualna erawh chu an phu tawka hremna na tak pein an zalen nghal mai mawh hle. Sual hi kan haw tur a ni a; mi hausa leh mi retheite sualna hi Pathian mithmuhah a in ang reng a ni.
A lang lo lama thil tha ti tur hian kan la tlai lo a, thil tha kan tih hun hi Pathian chuan a nghak reng a ni. Chu chu tun atang hian tan ila; Kristian ram kan nihna te hi kan thiltihah lang chhuak mawlh tawh teh se. Chu chuan ram rorelna tha a hring chhuak nghal bawk ang.
Juda pa rethei ve tak, Nazareth mistiri fapa Isua kha vawiin leh chatuan thlenga kan la rin tur a nihna chhan chu a lang lo lama a thiltih te kha thup thei loh khawpa a rintlak vang a ni. A lang lo lamah hian dikna nen bul i tan phawt mai teh ang.
Comments
Post a Comment