Kristiante zingah Sam 46 thu hi hre lo kan awm lo ang a; Sam 46:1-na thu phei hi chu chhia leh tha thliar thiam chin phei chuan kan hre vek awm e. He laia Pathian thu ropui tak hi kan innghahna leh kan thlamuanna a ni a, mi tin ngainat leh duh rawn Bible chang a ni ang ti ila kan sawi sual kher lo ang.
Kora fapa te fakna hla
Sam 46-na hi Levia chite zinga mi Kora fapa te’n Lal Davida hun laia Pathian fak leh chawimawina tura Temple an sak thin niin a lang a (2 Chro. 20:19). ‘Zion hla’ tiin an sawi thin a; Pathian khawpui, Pathian chenna hmun chungchang sawiin Zion tlang, Jerusalem khawpui, Temple awmna chu Pathian chenna a ni tiin he Sam 46 hian a sawi lan vang niin ESV Global Study Bible chuan min hrilh a. Sam 46 phuahtu hi chiang taka hriat a ni tawh lo a, Kora fapate fakna hla tiin Bible-ah hian dah a ni.
Hla bihchianna
Sam 46-na hi chang hnih leh thunawn nei hla a ni a; chang 7-na leh chang 11-na hi a thunawn a ni tiin ESV Global Study Bible chuan min hrilh. Mi mala sak chi hla ni loin, a huhoa Pathian biakna atana hman thin hla niin a lang bawk. Sam 46 hi ‘Hun hnuhnung Sam’ (Eschatological Psalm) tiin zirmite chuan an sawi bawk a. Zawlnei Isaia te’n an lo sawi tawh indona hriamhrei te halral a nih dawn thu he Sam-ah hian kan hmuh tel avangin ‘Hun hnuhnung Sam’ tiin an sawi phah a ni. Martin Luther-a pawh khan Sam 46-na hi a duh hle niin an sawi thin. World Biblical Commentary Vol 19 in a sawi dan chuan Sam 46 hi Soprano (Hmeichhe rual aw) a sak tur niin a lang a; ‘Alamoth’ hi nula tihna a ni.
Pathian neih hlawkna
Thuthlung Hlui hunah khan Israel fate khan harsatna hrang hrang – indona, sal leh bawih nihna, pathian dang an biak avanga tuarna, hripui, tui lian leh khawkheng adt an tawk thin tih kan hmu a. Zawlneite kaltlanga zilhna leh Pathian be tura fuihna te, an sual avanga hrem an tuar tur thute kha kan hmu fo a nih kha. Chutianga harsatna hrang hrang an tuarna atang chuan thil tam tak an zirchhuak a; Pathian nung neitu leh Pathian hnam thlan, Pathian fate nih hi inhumhimna leh chakna a nih zia kha an zirchhuakin, a tak ngeia tawngtu leh neitu an nih zia Sam 46 atang hian kan hmu a ni. Pathian mi an nihna leh Pathian fate an nih avangin beiseina nung, chakna leh inhumhimna kha an nei tha bik tih kha atak ngeia tawnga hretu an ni.
Chhiatna leh harsatna karah pawh Pathian kan lamah atang
Khawvela kan awm chhungin chhiatna leh harsatna kan pumpelh dawn lo a; mi zawng zawng kan la thi vek dawn a ni. Chutiang harsatna leh hreawmna karah pawh chuan Pathian nung neitu kan nih chuan engkim hi a tihtheihin, Pathian chu kan engkima engkim a nih vangin thlamuanna kan neih thu Sam 46-na hian min hrih. Hripui leng te, indona te, Cancer natna leh Sakhaw nekchepna karah pawh Kristiante chuan Pathian kan neih tlat avangin manganga lungngai tur kan ni lo tih kan inhrechiang nawn thei awm e. Ringtu kan nih avangin harsana kan pumpelh dawn lo a; Pathian nena hmachhawn tur kan nih thu kan zirchhuak thei awm e.
Pathian nihna hriatchian
Sam 46-na chang tawp berah hian Pathian chu amah lo inpuangin, hnamtin zingah chawimawiin a awm dawn thu kan hmu. Mi tam takin Pathian nihna kan hriatchian loh avangin kan ringhlel a, kan vui a, kan lawm lo thin. Pathian chu engkim chunga thuneitu, fak leh chawimawia chibai buk tur kan nihna hi hrechiang nawn tura thupek kan hmu kan ti thei awm e. Pathian ropuina leh thiltihtheihna hmuchianga hrechiang tur chuan tuarna leh hreawmna kan paltlang te hi a ngai fo a; chumi atang chuan Pathian neih hlawkna leh hlutna tak tak kan chhut chhuak thei a ni.
Manganna leh harsatna thuk ber kan tawh laia min tanpuitu tur chu Pathian hi a ni a, kan chakna leh kan beiseina neih chhun pawh Pathian chauh hi a nih zia Sam 46-na hian min zirtir a ni.
Comments
Post a Comment