Ramri a buai a, India rama chanchinbu lian leh rintlak te’n kan buaina chungchang hriat chian duhin zawhna min zawt a. Chutah chuan Sap tawnga tawng a lo ngai ta chiah a, kan induhkhawplohna a lo lang a, Sap tawng kan thiam tawk lo tih lo lang chhuakin thahnemngaihna au aw kan hmu nual a. Hei hi hmasawnna lawmawm tak leh rah tha zawk chhuah ngei tura min nawr kaltu ni se a va lawmawm dawn em!
Tawng pawimawhna
Tawng pawimawhzia hi kan hre vek awm e. Tawng chuan ram leh hnam nihna a keng tel a, inpumkhatna a kengtel tih kan hmu bawk. Genesis bung 11-na kan chhiar chuan mihringte kha Sinar phaizawlah awmin tawng thuhmun an hmang a. Chutah chuan in van tawng tur khawpa sang sain an buai mup mup tih kan hmu a. Tawng thuhmun leh hnam khat an nih miau avangin an inlungrualin hna kha an thawk sawt em em mai a; chumi tichhe tur chuan an tawng tihhransak kha kawng awmchhun leh sawt ber a ni tih Pathianin a hria a, kan lo heti zo ta a nih kha. Tawng pawimawhna leh inpumkhatna siamtu a nih zia hi Pathian thu atang pawhin chiang takin kan hmu thei awm e.
Mizo tawng nge Sap tawng pawimawh?
An pawimawh ve ve. Pathianin Mizo niturin leh Mizo tawnga tawng tur leh kan ngaihtuahna pawh Mizo tawng atanga intan turin min siam a, Mizoramah kan cheng a ni. Chutih rualin khawvel puma kan thusawi leh kan tawngte miin an hriatthiam theihna tur erawh chuan Sap tawng kan thiam a ngai a; khawvel pum huapa kan damkhawchhuahna atan Sap tawng hi kan mamawh a ni ti ila kan sawi uar awm lo e. Chutih rual erawh chuan kan pianpui tawng ngaihnep leh hnual suat emaw thlauhthlak emaw chu a dik chuang lo a, an kalkawp tlat tur a ni. Kan pianpui tawng kan thiam loh chuan hnam bo kan ni a, Sap tawng kan thiam loh chuan khawvelah mi bo kan ni thung.
Ziak leh chhiar kan thiam tirh atanga kan thu leh hlaa hmasawnna tam tak min petu chu Mizo tawng thiam, Mizo tawnga thu leh hla ziak hmasate kha an ni a. An thu leh hla kha zirna sikulah kan zir a, hla mawi tak tak tak phuahtute khan Mizo nih hlutna kan thinlungah an tuh a, hnam inpumkhatna a siam phah a ni. Sap tawnga thu leh hla tha, thawnthu ropui leh zirtir nei tha em em te kha Sap tawng thiam hmasa JF Laldailova, R. Lalrawna, PL Liandinga adt te’n Mizo tawngin min lehlin sak a, chu chuan kan khaw hawi tizauvin thu leh hlaah hmasawnna ropui tak min thlen a nih hi. Chuvangin Mizo leh Sap tawng hi kan tan chuan unau an ni a, an pahnih hian kan thiam em em tur a ni.
Tu nge mawhphurtu?
Zirna sikul pawimawh zia a lang chiang ta hle mai a, zirtirtute leh zirlaite leh chhungkua kan pawimawhzia a lang chiangin mawhphurhna kan neih len zia a lang chiang ta hle mai. India rama lehkhathiam tamna ber pawl ni chunga Sap tawnga kan tawng tha thei lo a nih chuan keimahni, kan zirtirtute, kan sikul leh kan sorkar hi inenfiah ngawih ngawih tur kan ni. Sorkar leh zirtirtute’n theihtawp an chhuah laia kan zirthat duh loh emaw, pass mark ngawr ngawr hmu tur leh Google-a innghat em em sikul naupang kan nih chuan kan thiam loh a ni. Kan hotute min zirtir bak piah lama zirlai atchilh hi kan tihtur a ni.
Pawl khat atanga MA thlenga zirna hi Mizoram chhungah kan nei a, Mizo subject-ah MA zirna pawh Pathian zarah kan nei tawh bawk. Naupang hnena tawng pawimawhna leh hlutna tuha an zir tui theihna tura mawhphurtu lian ber chu zirtirtute kan ni. Zirtirtu sikul kal tha peih lo, ziritir tha peih lo leh pawisa hmuhna ngawr ngawr atan chauha thawktute sikul atangin Vairengte daia buaina chungchang fiah taka sawi thei Sap tawng thiam tak sikul naupang tha hi beisei ngam chi a ni lo.
Sokar pawh hian zirtirtute leh sikulte hi ngaipawimawh zual se la; luhna tlak leh luh chakawm khawpa sikul tha siam hi a mawhphurhna a ni tih hre nawn fo teh se. Zirtirtu sikul kal tha peih lo, chawlh nuam ti em em leh zel thel em em mai te hi hrem ngam se la, thlatin sikul hi en en fiah se la chuan tun aiin hma kan sawn ngei ang.
Kan chhungkua hian tun aiin zirna kan ngaipawimawh zual tur a ni a; kan phak tawkah a tha ber leh a zawng zawng nena lehkha kan zir a ngai tihna a ni. Kan chhungkaw dinhmun avangin Sap sikulah kan fate kan dah vek thei lo ang a, Sorkar sikulah kan inkal tir thei tawk tawk pawh a ni ang. Kan tihtheih tawk - an zirna tur hun awl siam te, an zir lai en pui te, kan thiam bak an zir tawh a nih pawha a thiam zawkte zawh sak leh ngaihsak erawh hi chu chungkaw tinin kan tih theih a ni. Kan fa zirlai naupang aia mobile phone leh kan nuam tih zawng ngaihsak nu leh pa kan nih chuan in enfiah kan ngai hle tihna a ni.
Engtin nge kan zir ang?
Mizo tawng hi chu kan pianpui a ni a, sikul kal miah lo pawhin mi pangngai chuan kan thiam vek a. Chutih rual erawh chuan zir tlak leh kan tawng humhim zel tur erawh chuan nasa taka kan zir a ngai. Kan pianpui tawng ngeia fiah taka kan hriat tawh hi chu eng tawng pawhin fiah takin kan sawi chhawng thei tawh thin. Kan pianpui leh kan ngaihtuahna bul ber Mizo tawng atanga a awmze dik tak kan hriat chian tawh loh hi chu tawng dang pawhin sawiin zir mahila kan hre fiah tak tak tawh ngai dawn lo. Chuvangin kan tawng Pathianin min pek hi uluk taka kan zira kan thiam em em hi kan bat a ni. Mizo tawnga thuziak dik leh tha, lehkhabu leh chanchinbute hi kan chiar fo tur a ni.
Sap tawng kan zirna bul ber chu sikulah a ni a, Tv, film leh hnathawhna atang tein kan inzir thin bawk. Zirna sikulah chuan Sap tawng dik leh zahawm kan zir a, tawng chauh ni lo subject dang pawh Sap tawng vekin kan zir thin a nih hi. Heng kan zirlaite hi uluk takin zir ila, tihsual leh tih dik loh hi i hlau lo ang u. Mi sawi dik loh leh ziah dik tawk lohte, an sawi sual palhte pawh nuih mai loin a dik zawk hrilh ila, huaisenna i nei ang u.
Lam nalh loh leh lam dan dik tawk lo mai maiah phei hi chuan buai lo ila; Sap tawng hian min seh dawn lo a, Sap tawng zawk hi i seh ang u. A Sap ho tak tak zawk hi chuan kan sawi tum hriat tum hian an beng an dawh a, kan lam no nalh em, kan lam dik lo em tih velah an buai hman lo. Benga Sap tawng ri kan hriat tam leh kan ngaihthlak tam hian kan ri hriatna a ti chak a, awlsam takin zawhna leh chhana pawh kan hre thei dawn a ni. Sap tawng lehkhabu chhiar tam te, Film en tam leh mi biak tam te hi kan inzirna lian ber turte an ni.
Instagram leh Facebook vela likers leh followers ngah loh kan hlauh aia nasain Sap tawng leh Mizo tawng thiam lo nih hi hlau ila, Mizo tawng leh Sap tawng thiam lo nih hi zak ila, chuti chuan Vairengte mai ni lo Vairengpui thlengin kan thu leh hla hi a lo darh ang a. Ramriah Sipai angin Silai nen kan chhuak thei lo a nih pawhin tawng hmangin khawvel hriatah kan ram leh hnam hi kan humhalh thei ang.
Comments
Post a Comment