Thuziak thiam chu ka ni lo a; thu ziak tam erawh chu ka ni ve tawh mai thei - ka kum ang rualah chuan. Tun tumah hian thu leh hla ka ziah chhoh dan sawi ve ka châk a; chutih rual erawh chuan mahni inhâm lian zawnga thusawi leh ziah hi ka hlauh ber a ni a. Chapona leh insawitheihna rawngkai a awm a nih chuan Pathian hmingin min ngaidam ula; tun bâk hi mahni chanchin (autobiography) kan ziak dawn a nih loh chuan kan sawi tawh lo ang.
Thuziah bul tan dan
Middle Sikul kan kal lai, kum 1999 velah khan kan veng YMA Chanchinbu-ah hian 'Article' ziah ve ka tum a. Lehkhapuanah ka kutin ka ziak a. Kan veng YMA President hnatlang haw lam kha ka thuziak chu ka pe a. Mahse ani chuan naupang thuziak mai mai chu engahmah ngai loin kawng sira hmawlh lo dingah chuan min tarsak a. A hnuah mi dangin an hmu a, an chhiar a ni awm e.
Chanchinbua ziah hmasak ber
Pawl 11 kan zir kum, 2007 a Lunglei Gov't Higher Secondary School kan kalin, kan sikul chanchin phek, tlatin chhuakah khan thu ka ziak a, min chhuah sak a. Chu chu ka bul tanna a ni. A hnuah chuan kan Veng leh khaw YMA Chanchinbu lamah te ka ziak ve zauh zauh thin bawk.
Thuziah vanga lawmman dawn
Kum 2009-2012 a Lunglei Gov't College kan kal laiin BA 2nd & 3rd Yr ah khan College Week kan neihah Article inziah siak (Mizo tawng) ah lawmman pakhatna ka la ve ve a. Saikuti Hall-ah Certificate leh Medal min pe kha ka lawm hle.
Chumi hnuah chuan Aizawl Theological College-a BD ka zir tan kum, kum 2016 khan MZP Chnanchinbu-ah, kum 2013 vela ka ziah tawh Article 1 chu - kum 2015-2015 chhunga MZP Chanchinbua thuziak tha ber 'Article of the Year' ah an lo thlang teh tlat a. Hei hi an lo thlang thin tih pawh ka hre ngai lo a, ka lawm hle. Heng hi Pathian khawngaihna vang chauh a ni.
Vanglaini, Aizawl Post, Zozam, Kristian Thalai, Lengzem adt
Kum 2015 -a Orissa/Odhisa ka awm laiin Vanglaini chanchinbuah hian ka thuziak 1 ka pe ve thuai a, min lo khawngaihin min lo chhuah sak a, ka lawm hle. Vanglaini chanchinbuah hian vawi 50 aia tam chu thu ka ziak ve tawh awm e.
Aizawl Post hian thuziah ka pêk ang ang hi min chhuah sak ve ṭhin a, vawi 70 ka ziak ve tawh mai thei e - ka lo chhinchhiah lem lo a. Ka lawm em em bawk.
Zozam Times hi an fel em em a, ka thuziak fahrah tak tak thlengin min chhuah sak zel a, ka lawm hle. Kum 2016 atangin vawiin thlengin chawlhkar tin thu ka la ziak ve a. Huang nei loah chuan Zozam Times hian ka thuziah min chhuah sak nasa em em a; kum 2016 atangin vawiin thlengin chawlhkar tin (kum 1 chhungin karkhat chhunga vawi 2/3 min chhuah sak hman loh hi a awm zauh ang) min chhuah sak a, an chungah Pathian hmingin lawmthu ka sawi mawlh mwawlh a ni.
KṬP Chanchinbu Kristian Thalai-ah hian kum 2013 atangin kumtin thu ka ziak ve a, kum 2018 khan tum hnih min chhuah sak a. Pathian khawngaihnain kum 9 chhungin vawi 10 ka thuziak a chhuak ve tawh a, ka ngaihluin ka lawm hle.
Lêngzem chanchinbu-ah hian tum 7 emaw ka ziak tling ve tawh mai thei bawk. Chanchinbu hlu, mi thiam tak tak thuziak awma huangah min khawngaih chhuah ve thin hi ka lawm tak zet a ni.
Lelte Weekly -ah hian huang nei miah si loin kum 2016 atang hian ka ziak ve deuh reng bawk a. Chanchinbu neitu C. Dinthanga hian min duhsak em em a; ka ziah theihnghilh, ziah tur ka hriat loh pawhin min lo tur a, ka ziah leh phah thin.
Kohhran lam chanchinbu Makedonia te, Veng hrang hrang TKP, KTP, SAY, Methodist etc te hian keia thuziak mai mai hi min lo dil ve leh thin a, ka lawm thei hle. Veng thenkhat YMA Chanchinbu lam hian min hmelhriat vangin min chhuah sak ve leh thin bawk. Heng zawng zawng hi Pathian khawngaihna luangliam a ni.
Ziah tur ka hre lo a; peih lo chung chungin ka ziak thin.
Thuziah tur hul vek tum hi ka ngah a, Zozam Times ah te khian karkhatah thuziak 1 tal dah ka duh si avangin thuziah duhnain min tur ngut ngut zel a, mahse han ziah mai tur hi ka hre lo fo a ni.
Pathian thu ziah dawn hian ka hah zual a; sermon te, kan tawngtaina leh kan zirna avang tein Pathian thu ziah tur ka dawng ve thin a. Chungah chuan ka thiam tawka ulukin ka ziak ve thin.
Thuziak tur hian rilru sen a lo ngai ve em em a; peih lo chung chunga ziah hi ka ngah hle. Ning tak chungin lehkhabu ka râwn a; Sap tawng lehlin te a lo ngai a - Sap tawng hi ka thiam lo em em nen. Chuti ang chuan ka ziak ve hram hram a, ka ziah zawh hian ka lâwm ber zel!
Keimahin ka hlawkpui ber
Thu ka ziah hian keimah hian ka hlawkpui ber a; ka hriat chian loh leh ka thiam loh te hi ka ziak a, inzirna atan ka hmang a ni ber mai. Miin thu ka ziah thiam loh zia hi min hrilh se - lâwm takin ka pawm. Thuziak thiam ka inti lo a, keima tuina a nih vangin ka ziak ve tawp a ni. Chutihrualin, thu i ziak thiam hle mai tiin min fak ta se, ka lâwm em em ang.
Pathian zarah kan dam chuan kan ziak ve leh tawp zel dawn a, dawhthei takin lo chhiar ve tawp mai la; i lo ning viau a nih chuan min hrilh tawp la, i hmuh loh turin ka lo ziak tawh dawn nia.
Comments
Post a Comment