Skip to main content

Tlangval entawn tlak Leonardo DiCaprio

Kum 2000 hnulama piang, vawiina thalai duhawm tak tak te hian Leonardo Dicaprio hi kan atchilh ve hman lo a nih pawhin kan nu leh pa, a bikin kan nu te chuan lum hlum thak huama an ngaihzawn rawn leh atchilh a ni a. Kan pate hoin a sam tihdan –hair style an entawn luai luai khawpa tlangval hmeltha a ni. Kum 1997 –a khawvel dengchhuak khawpa film hmuhnawm leh vawiin thlenga kan la en fo Titanic film avang khan khawvelin a hmelhriat leh zual a nih kha. Film a chan thiamna lam hi sawi kan tum lo a; vawiina kan buaipui ber ‘kan khawvel leilung chhe mek’ buapuitu –environmentalist a nihna lam zawk hi kan sawi tum chu a ni.  

Leonardo chanchin tawi

Kum 1974, November ni 11-ah khan Los Angeles, California-ah Leonardo Wilhelm DiCaprio tih hming puin Imerlin leh George Dicaprio te fapa ni turin a lo piang a; nausen mai a la nih laiin a nu leh pa te hi an inthen a ni. A nu bulah sei lianin a pa nen pawh hian an inpawh em em tho a. Kum 5 chauha upa a nih tangin Tv lamah alang chho tan a, Romeo & Juliet film te changin kum 1997 –a Titanic film a chan khan khawvel a deng chhuak ta nih kha. Titanic hian film lama chawimawina sang ber Oscar Award/Academy Award kha 11 zet a dawng a nih kha. 

Leonardo hian Best Actor Award hi a dawn theih loh em avangin amah tantute/fans lam pawhin an vuipuiin ve hle thin a. Kum 2016-ah khan ‘The Revenant’ atangin Oscar Award hi a dawng ve ta a nih kha. Tunah hian tlangval senior, kum 47 a upa a ni mek a nih chu.

Social Media leh Leonardo

Leonardo hian Social Media –Twitter, Instagram leh Facebook a khawih thin a, kum 1998 atang khan Leonardo DiCaprio Foundation tih a din bawk a. Heng a Social Media-ah te hian, vawiina kan buaipui em em sik leh sa, kangmei leh nungcha te a vei zia thu leh helam kawnga hma a lak nasat zia hi kan hmu thei awm e. A mimal thlalak leh film a chan tawhna lam hnuhma engmah a tar lang ngai lo a. Tun lai thalaite hi chuan Leonardo social media hi han ‘stalk’ ta se, film star a ni tih kan hre lo mai thei a ni.   

Environment leh Leonardo

‘Environment’ chu Mizo tawng ang main kan hre bel tawh a; kan khawvel sik leh sa, boruak, tui, rawmngaw, nungcha leh mihring, he khawvela thil awm zawng te hi an ni e tiin kan sawi mai thei awm e. He khawvela thil awmte hi inbuk tawk tak leh a nih dan tur ang takin Pathianin a siam a ni a. Mahse chung chu mihring hmasawn duhna avang te, ram kang leh leimin te, khuarel chhiatna hrang hrang avang tein a lo chhe ta tial tial a. Vawiinah pawh khawvel leh Mzoram chu ram kang, tui vang, khawlum leh hri leng avangin kan buai luih luih a nih hi. 

Heng zawng zawngte hi Leonardo hian a vei em em a; kum 1998 atang khan ‘The Leonardo DiCaprio Foundation’ dinin kan khawvel chhe zel tur venna atan sum leh pai thawkchhuakin nasa takin tan a la a, vawiin thlengin he pawl hian khawvel tan sum leh pai a la seng reng a ni. UNO nena thawk dunin khawvel leilung leh ramngaw chereu zel tur te hi veng turin mipuite min zirtir thin a ni. Kum 2016 khan USA President Barak Obama hnenah ‘Sik leh sa inthlak dannglam hi i awih lo a nih chuan Science thiamna i awih lo tihna a ni a. Chuvangin ka ngaihdan chuan – office kai tlak i ni lo,’ tiin a lo sawi tawh a nih kha.

‘The Revenant’ film vanga Oscar Award a dawn tum khan mipui hmaah –‘A tawp nan hei hi sawi ka  duh: The Revenant film hi mihring te leh khuarel te inlaichinna a ni a. Kum 2015 kha khawvel lum ber kuma chhinchhiah a nih kha. He film kan siamnaah hian vur tla kan mamawh avangin khawvel chhim tawpah kan kal a ngai a. Sik leh sa inthlak danglam hi thil tak tak a ni a, a thleng mek a ni. Mihring chunga chhiatna thleng mek a ni a, ti tawp turin kan ṭanrual a ngai a ni. Vawiinah hian khawvel tana hnawhtawktu te hi kan thlawp a ngai a; mihring mihrinna ngaipawh a, ram lei lung fa vaibelchhe chuang tawrhna tur venga dingte hi kan thlawp tlat a tul a ni. Kan fate fa leh chhawng te tan te, mi ṭhenkhat aw - politics avanga hriat hlawh lo leh thamral ta te tan kan ti tur a ni,’ tiin a sawi a nih kha.  

Kan milarte pawhin entawn ve ang u

Mihring hian tui zawng leh ngaihsan zawng kan nei a, intihluih emaw innawrluih theih emaw a ni hauh lo. Chutih rual erawh chuan he khawvela kan damchhung leh kan thlah lo la awm zel tur te tana chenna tlak khawvel hnuchiah leh siam hi kan mawhphurhna a ni a. Pathian thu atang pawhin khawvel enkawl hi mihringin kan tih tura Pathianin thu min pek a ni tih Genesis 1:26-ah kan hmu. Chuvangin vawiina kan Mizo milar, kawng tin renga kan entawn leh kan ngaihsan em em te u, a takin kan khawvel, ramngaw, sik leh sa  - environment hi lo vei leh zual turin kan ngen a che u. Nangni berin in vei chuan, keini chuan in hnung kan zui ngei ngei ang.    

Nu leh pa ten kan fate i hrilh ang u

A tir lama kan sawi tawh angin vawiina nu leh tlangval tam zawk hi kum 2000 hnulama piang deuh vek an ni tawh a. Nu leh pa te hian kan nulat tlangval laia kan atchilh leh kan ngaihzawn rawn Leonardo DiCaprio-a’n kan khawvel chhe zel tur a vei zia te hi kan fate hrilh ila. Tui intur kan neih tawh loh hnuah te, kan in leh lo a kan ral vek hnuah te, khawlum lutuk vanga kan thih hnuah te chauh kan khawvel hi vei loin, tun atangin tan vei tlang ila, kan fate zilhna atan i hmang ang u.

Comments

Popular posts from this blog

Lal Isua Hmangaihna

Ramhlun North Pastor Bial Zaipawl in kum 2013 a an sak Lal Isua hmangaihna tih hla, T. Laldintluanga phuah hi tun lai ah hrelo kan vang hle awm e. He hla hi Zaithiam hrang hrang te pawhin an sa a. Lal Isua hmangaihna hi kan tan a tawkin engkima engkimah a rintlak zia puanchhuahna ropui tak a ni tih kan hre awm e.     He hla phuahtu T. Laldintluanga, Ramhlun North hi tunah hian Synod Choir (2018-2020) Conductor ni mek a ni a. He hla a phuah dan chanchin hi ka va zawt a, PDF in min lo pe thlap a, a chung ah ka lawm hle.  “He hla hi kum 2013 a ka phuah a ni a, heng hunlai hian a bikin thalaite ah mahni intihlum te, ruihhlo avanga thihna te, thih thut thutna ang chi kha a tam em em a, ka phak tawkin ka vei ve hle a ni. Chung ka thalai pui sual in a tihbuai mek, mahni intihhlum duhna hial nei, nun beidawnga tap mek te pawh chu Lal Isua hmangaihna hian a nghak reng ni hian ka hria a. Emau kawnga khualzin pahnih ten an khawhar hnem tura Lal Isua an sawm khan an va...

BEISEINA NUNG

I Petera 1:3-9 A chunga kan tarlan Bible châng innghahna hi Petera te hun laia Asia Minor-a Kohhran țhang chak em em mai te chungchang lehkha a thawn ațangin a ni a. Helai 1:3-9 ah hian Pathian khawngaihnain Lal Isua tiha thawhnlehna hian beiseina nung min neih tir thu leh chu Lal Isua thiha thawhlehna chu kan chhandamna-chatuan nunna kan neih theihna tur a nih thu Petera hian min hrilh a. Beiseina hi keini ringtute chauh ni lo mi zawng zawng hian kan neih hi a pawimawh em em a. Beiseina hi mi rethei te chaw an ti hial țhin a ni. Miin beiseina a neih tawh loh chuan nun hlutna hi a hre tawh țhin lo a. Mi lar, zaithiam, Celeb etc pawh nise amah ah beiseina a awm loh chuan mahni intihhlum mai hi a thlang țhin. Hmanni lawk ah Linkin Park band-a an Vocalist Chester Bennington-a pawh inawkhluma an hmuh kha! Khang te kha a larin khawvelin an hriat nen-beiseina a neih tawh loh vang a ni ngei ang- a nunna kha amahin a inlak hial ni! Chuvangin beiseina neih pawimawh zia hi kan sawi ...

Lal Isua chaknaa innghatin

Kristian Hla Bu Number 149-na kan keu chuan khawvela Pathian hla ropui ber pawl; Edgar Lewis leh William W. Rock te phuah 'Lal Isua chaknaa innghatin' (Just lean upon the arms of Jesus) tih kan hmu a. He hla hi Mizotawngin Ch. Pasena leh Zakunga te'n min lehlin sak a, Zofate zingah he hla hi sam thiamlo kan awm awmlo e.  He hla phuahtu zinga pakhat William W. Rock-a chanchin hi han hriat zui em em tur a awmlo a. Edgar Lewis-a erawh hi chu  February ni 8, 1865 ah Yates City,   Illinois ah a piangin a laiah hming chu Lewis Edgar Jones a ni a. Hla thluk a siam emaw, a phuah emaw hian  Edgar Lewis, Lewis Edgar tih emaw Mary Slater ti te in hming lem a hmang thin. Moody Bible Institute-ah Pathian thu a zirzawh hnuin  Young Men’s Christian Association,  Davenport , Iowa;  Fort Worth , Texas ah leh Santa Barbara, California ah te a thawk thin.  September 1, 1936 khan  Santa Barbara , California ah a boral a;  Santa Barbara Cemetery ,...