Mizo tawnga ‘Rawngbawltu’ tih kan sawi chuan Kohhran rawngbawltute kan sawina a ni a; Pastor, Kohhran Committee, thalai hruaitu, Kohhran hmeichhe hruaitu, Sunday Sikul zirtirtute zawng zawng huap a ni bawk. Chu aia huam zau leh chipchiar zawka kan sawi dawn chuan Kristian, Lal Isua ringtute zawng zawng hi kan kawh tir thei bawk ang.
A tawng bul: ‘Rawngbawltu’ chu Greek tawnga ‘Euangelion’, Sap tawnga ‘deacon’ tih niin chu chu ‘engkimah chhiahhlawh’ tihna a ni a. Chaw ei dawhkana rawngbawlna a kawk a; Thuthlung Tharah chuan Kohhran rawngbawltu sawina atan an hmang a. Chumi awmzia chu Pathian leh Kohhran chhiahhlawh an nih vang a ni. Thuthlung Tharah hian rawngbawltu tih tawngkam hi vawi 29 aia tam a lang.
Kohhran rawngbawltu: 1 Timothea 3:8-13-ah Kohhran rawngbawltu tur chung chang fiah takin kan hmu a; rawngbawltu chu - mi zahawm, mi rilru nghet, zu heh leh bawlhhlawh taka hlêp duh mi ni lo; chhia leh tha hriatna thianga rinna thu ril chelh tlat mi, mi rêl chîng lo, insûm thei, kawng engkima mi rinawm, nupui pakhat nei, fate leh chhûngkaw enkawl thiam mi an nih tûr thu chiang takin kan hmu a; hei hi rawngbawltute kan tehna tur a ni.
Rawngbawltu Lal Isua Krista: Chanchin Tha Marka ziak bung 10:45-ah chuan Lal Isua’n rawngbawltu nihna chu a dinhmun atangin heti ang hian a sawi a – ‘Mihring Fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nana a nun pe zawk turin a lo kal a ni si.’ Philippi 2:6-7 ah chuan Tirhkoh Paul-a hian Lal Isua hmangin rawngbawltu nihna hrilh fiah ve lehin rawngbawltu chu – mahni leh mahni intitlawm (kenosis –intiruak/inbunruak), ropuina leh chawimawina zawng zawng pawh thlahlel thei loa chhandamna kawng buatsaihtu nun chu ‘rawngbawltu’ nihna tiin min hrilh bawk.
Kan Bible-ah hian Rawngbawltu nihna leh dinhmun, an tihtur leh mawhphurhna chi hrang hrang kan hmu a, heti hian kawng thumin lo sawi ta ila-
Mahnini inphat: Philippi 2: 6-7-a kan hmuh ang khan Lal Isua chu kan tana chhandamna hna thawk turin Pathian fapa a nihna te, mihringte aia pawh ropui zawk leh Pathian a nihna te chu kalsana mahni inbunruaka intitlawmin kan tan chhandamna hna thawktu ni turin khawvelah a pa Pathian thu awiha lo kalin chu a thiltih chu keini rawngbawltute hian entawn ve turin kan ni. Mahni inphatsan veka Lal Isua Krista hnungzuia rawngbawl hna hi thawk tur kan ni a, chapo leh mahni inchhuang ru tak rawngbawltu chu Lal Isua tana rawngbawl ni loin ama tana rawngbawltu mai a ni tihna ni.
Thuruk enkawltu: I Korinth 4:1-2 ah ‘Keiniho hi Krista rawngbawltuah leh Pathian thuruk enkawltuah miin min ngai rawh se’ tih kan hmu a; miin eng angin nge min ngaih? Kohhran thu rel, Kohhran Thalai leh Hmeichhe lama kan thurelte sawi chhuak zung zung mi, mi thuruk pawh zep thei lo leh sawi chhuak chak tlat mi kan ni em? Kohhran mipuite’n thuruk hrilh tlaka an ngaih loh rawngbawltu chuan Pathian thuruk phei chu a vawng him zo lo ang. Chuvangin Pathian leh kohhrante tan pawha thuruk enkawltu leh vawng himtu kan nih a ngai.
Hmasawn tur kan ni: Rawngbawltu ropui Paul-a chuan – ‘Unaute u, manah ka inngai lo. Amaherawhchu, he thil pakhat hi ka ti thîn - hnung lama thil awmte chu theihnghilha, hma lama thil awmte chu banin Krista Isuaa Pathian chung lam koh chhan lâwmman hmu tûrin, tiam chin lam chu ka pan talh talh a ni’ tiin min hrilh a (Philippi 3:13:). Zawlnei Jeremia chuan- Dâwngdah taka LALPA hna thawk chu ânchhe dawngin awm rawh se (Jeremia 48:10) a ti bur mai bawk; tawngkam a dim lo hle tih kan hmu awm e. Kum 20/30 dawn Pastor, Upa adt kan nih tawh avanga thawk zo tawh anga rawngbawl hna hi kalpui mai mai tur kan ni lo tih kan hriat nawn reng a tul hle. Tirhkoh Paul-a te meuh pawhin nitin hmasawn tura a beih reng laia keini kan lo inthlahdah mai mai chuan anchhia kan dawng ang tih a hlauhawm hle.
Miin Pastor leh Missionary hi eizawnna atana thawh an chak a ni chuan vawiina Pastor leh Missionary ni mekte hian in enfiahna tur kan nei tihna a ni a; Lal Isua sawi rawngbawltu kan ni em tih in enfiahna tura fuihna aw mawi tak a ni tih i hria ang u. Rawngbawlna hi eizawnna ni loin Lal Isua chanchin tha hrilna a ni tih hi fiah tak leh langsar taka an hmuh theihna tur chuan vawiina rawngbawltu nang leh kei hi kan pawimawh ber a ni.
Comments
Post a Comment