Bible kan chhiar chuan Exodus bung 16-ah Israel fate’n Mosia kaihhruaina hnuaia Pathianin ram a pek Kanaan an panna kawnga Sin thlaler hmun an thlen tumin Israel fate hi an ei leh in tur lungkhamin phunawiin tih kan hmu a. Aigupta rama an awm laia sa bel bula an thut lai te kha ngaiin Mosia leh Arona chungah an phunnawi a, thlalerah chuan riltama an thih mai an hlau a nih kha. Chu an harsatna chu Pathianin a lo hria a, Israel fate hian thlalera an vah chhung, kum 40 chung zet chu an ei turin Manna hi Pathianin a pe a ni tih kan hre theuh awm e.
Manna chu eng nge?
Manna chu Hebrai tawng a ni a, ‘Eng nge ni?’ tihna a ni. Thil var pan thlir thler a ni a, Pathianin Israel fate chhang an ei tur atana a pek a nih thu Mosia khan a sawi a. Mitinin an mahni khamkhawp aia tam char khawl theih a ni lo a, lo chhar khawl lui emaw an awm pawhin a lung a, a rimchhe thin tih Bible kan hmu.
Manna Economy
Manna awmzia leh a nihna chu kan hre tawh a, Economy/Economics pawh hi Sap tawng nimahse kan hre bel hle awm e. JF Laldailova Dictionary-ah chuan economy chu –inrenchem thiamna, pawisa lam leh chhungkaw thila khawsak rel dan, tiin a sawi fiah a. Pathianin an mamawh tawk baka chuang liam nei lo tur leh duham taka khawsa lo tura Israel fate a thunununa leh a zirtirna Manna atang hian vawiinah hian eng nge zirtur kan neih le?
Hma taka bul tan
Tunlai Mizoram khawvelah hian thlalai te hi zing kan tho hma hlawm em le? Zir chianna chu ka nei lo a, mahse thalaite hi zing kan tho tlai hlawm hle tih hi chu chhungkaw tamtakin kan sawi zin ber a ni. Mobile Phone lo chhuah hnuah hian zan kan meng rei a, zan reiah internet a lo chak zawk bawk nen - kan mengreiin zing kan tho tlai thei hle a ni. Zan lama hnathawk hi chu a tlem zawk kan ni ang a, a tam zawk erawh hi chu games khel leh phone kan khawih vanga meng rei kan ni. Kan thupui sawi lai mekah khian Israel fate khian an eitur thawkchhuak turin zing kar atangin a thawk chhuak tih kan hmu.
Zingkar mai pawh nilo, nitin kan hnawthawhna kawngah hian bul kan tan hma ngai em? Mi hnuaia inhlawhfa tur chuan zing dar 9:30 aia tlai loah bul kan tan ngei a ngai a; Sorkar leh Office a thawk, mipuiin kan dawr turte hian dar engzatah nge kan inpeih thin? Sorkar Damdawi In, Sikul leh Office a thawk te hi kan kal hma ngai em? Min dawrtu turte hi min nghah chhungin an hun hlu tak kan paih sak teuh tih kan inhria em? Kohhrana mi pawimawh, akul ataia a ban pawimawh kan nih chuan kan hna thawhna hmunah kan tlai tur a ni lo. Kristian chuan a hun takah taima takin a hna a tan tur a ni.
Mamawh tawk baka liam chhek khawl loh
Manna atanga thil chiang tak kan hmuh chu mamawh tawk baka liam chhekkhawl hi Pathian hian a ti lem lo tih a lang chiang hle. Lal Isua pawhin naktuk atana lungkham nei lo turin min ti mauh mai bawk (Matthaia 6:25-34). Kristiante leh khawvel hian he leiah hian cham hlen leh kum hlun tur ang maia inngaiin kan inchhek khawlin kan inhai vur nasa hle a nih hi. Kan mamawh tawk baka liam neih kan duhna hian duhamna te, kut tling lo leh thianghlim lo taka sum leh pai lakluh duhna keng tel a, kan heti zo ta a ni.
Manna hi mitin daih a ni a, Israel chhungkaw tinte khan an khamkhawp theuh kha an char thei tih kan hmu a. Keini erawh chuan kan ta tur bakah mi dang ta thlenga neih khawl kan tum tlat avangin dik lo takin thil kan ti a, mi dang chanai thlenga chhuhsak duh kan ni thin hi Pathian pawisawina lian tak a ni. Kan thawh leh kan hlawh mila nung mai tur kan nih laiin mi dangte ta tur thlenga kan chhuhsak thin avangin mi rethei leh hausa inkar pawh a hlat zual phah a ni. Van ram kai tum Kristian kan nih chuan kan thawh leh kan hlawh chhuah mila nun hi kan tihtur a ni.
A taka thawh
Pathian hian Israel fate eitur Manna hi an chawthlengah emaw an bukah emaw pek chilh loin pawnah an chhar turin a pe tih kan hmu. Kan nitin ei leh in tur hi thawkchhuak turin Pathianin min ti a, chu chu zawm mai tur kan ni. Kan eizawnna hnaa tui lo, thawk tha duh lo leh zuzi em em thin kan nih chuan, kan Kohhran leh khawtlangah mi tangkai leh lang sar tak ni mahila kan chungah Pathian a lawm ang em tih hi inzawt fiah ang u. II Thesalonika 3:10-ah pawh hna thawk duh lo chuan ei pawh ei suh se tih kan hmu.
Thawk rim si loa thawhrah tha tak neih kan tum chuan kawng dik lo kan zawh thin – chu chu Pathian thu awih lohna a ni. Kohhran thlalaiah nasa taka inhmang, mahni zirlaia hlawhchham leh si i nih chuan Pathian thu i awih dan a famkim lo a ni. Kan thawh mila kan thawh hlawh lak hi Pathian thu a ni a; thawk duh si lo hlawh lak erawh sual a ni.
Rukru, sulrul leh tuiekin a tihchhiat theih lohna hmuna kan ro khawlkawma tura zirtirna kan ni chungin khawvelah hian kan inchhekkhawlin mi dangte tana zuah leh hnuchhiah nei miah loa nun kan tum hi a Pathian thu loin mihirng mihrinna zawnah pawh sual a ni a. Vawiina kan thil neih te hi ren cham tak leh fing taka hmang ila, tul lo leh tang kai loah sum leh pai, leilung hausakna te hi hmang ral mai mai loa Pathian thuawih chung zelin kan nitin hun hman i tum ang u.
Comments
Post a Comment