Bible châng hrilhfiahna chihnih

Khawvela lehkhabu zir hlawh, sawi hlawh leh kan chhiar nasat ber chu Bible hi a ni ngei ang. Bilble vang hian lehkhabu, thuziak leh thusawi tam tak a pian chhuah phah tawh a, a lo la pian chhuah belh zel bawk ang. Kristian sakhaw chhungah chauh ni lo pawh Bible hian zir nasat a hlawh em em a; khawvela lehkhabu ropui leh ngaihven hlawh, film-ah pawh an siam ‘The Da Vinci Code’,  Dan Brown-a ziak pawh kha Bible sira thawnthu phuahchawp ngaihnawm leh hmuhnawm tak a ni tih kan hre vek awm e. 

Bible hi thu hausa leh ril, zir chian tlak, ngaihnawm leh chatuan nunna pai a nih avangin zir ngun a pawimawh em em a. Bible zirtirna leh a sawi tum dik tak hrula kan sawi emaw kan hrilh fiah emaw chuan kan thlarau thlenga boralna kawng zawh thei kan ni a, khawvel leh a piah lam chatuan thlenga pawimawh a nih avangin ngun taka kan zir hi kan bat a ni. 

U

A tirah chuan Bible hian bung leh châng a nei lo a, Stephen Langton, Archbishop of Canterbury chuan kum 1227 AD khan tuna kan hman lai ang hian Bible bung leh châng hi a duang chhuak a; chu chu The Wycliffe English Bible, kum 1382 a an tihchhuah chuan hmangin vawiin thlengin kan la hmang ta zel a ni. Pathian thu kan sawi dawn te, kan ziah dawnah te Bible bung leh châng tlawhchhan leh behchhanin kan sawi ta zel a, a remchangin chhinchhiah leh zawn chhuah te pawh a lo awlsam phah ta em em a nih hi. 

Hrilhfiah dan chihnih

Kan sawi tak angin Pathian thu kan sawi leh kan ziah dawnah Bible bung leh châng kan la chhuak a, chumi behchhan chuan kan sawi fiahin kan hrilh fiah thin a; Bible-in a sawi dan dik tak leh min zirtir a tum dan ang takin kan zir em tih hi ngun taka ngaihtuah a ngai hle. Pathian thu zirna huangah chuan Bible châng – a tobula chhuia hrilfiahna hi ‘Exegesis’ an ti a, Greek tawng atanga lak a ni. ‘Exegesis/ ἐξήγησις’ chu la chhuak emaw hruai chhuak emaw tihna a ni a, a tobul atanga chhui chhuak tiin kan sawi thei ang.

Hemi letling chiaha Bible hrilhfiahna pakhat chu ‘Eisegesis’ an ti a; Greek tawng tho niin a awm zia chu ‘chhui lut’ tiin kan sawi thei mai ang a. Mahni ngaihdan leh hriat dan kan neihsa mila Bible châng hrilhfiahna hi a ni a, a bu chhungin a sawi tum dik tak sawi si loa tum leh kawh lam nei sa rana hrilhfiahna a ni. 

Kan hrilfiah sual thin em? 

Kan duh dan leh kan ngaihdan, kan tanchhan tinghet tura Bible hrilfiah mai ching hi rawngbawltute zingah pawh kan awm fo mai; a pawi hle! Kan sual vang emaw kan tum reng vang emaw ni lo hian Bible-a Pathianin thu min chah thelh duai hian thu kan sawiin kan ziak thei a ni. Entirna pakhat lek lo tarlang ila-

Philippi 4:13- Mi tichaktuah chuan engkim ka ti thei a ni- tih hi RelevantMagazine.com in a tarlan dan chuan, ‘Vawiinah emaw naktukah emaw ka thil tih turah chuan hnehna ka chan ngei theihna turin Pathianin chakna leh theihna min pe ngei ang’ tiin an hrilh fiah thin a. American boxer ro thap Evander Holyfield pawh khan he Bible châng hi a duh hle tih kan hre vek awm e. Infiamna leh inelnaah hnenhna kan chan ngei theihna tur atana infuihna, ngaihthatna leh innghahna atan kan hmang thin.   

Mahse he lai thuchah hi ngun taka kan zir chuan Tirhkoh Paula’n Lung In atangin Europe-a kohhran a din hmasak ber Philippi Kohhran tana a ziak a ni a. Paula hi thih mai hmabak, roreltu te’n thiam loh an chantir mai tur a ni a. Chuti ang nun beidawn thlak leh mahni thih hun nghaka tâng reng a ni chung pawhin Lal Isua a rin avangin a zam lo a, chakna leh huaisenna, lungawina famkim a neih zia a sawi lanna a ni.

A chunga entirna pakhat lek kan pek atang pawh khian Bible kan hrilh fiah dik leh dik loh hian a sawi tum a in ang loin innghahna atan pawh kan hmang sual thei hle tih a lang chiang hle awm e. Bible thute hi a sawi tum leh a thuchah laimu dik tak hre tur chuan ngun taka kan zir leh kan chhiar a pawimawh em em a; mahni rin dan leh duhdan mila hrilh fiah ve mai hian pawi a khawih theih tih kan hriat a ngai hle.  

Rawngbawltute mawhphurhna

Kohhrana rawngbawltu te hian kan theih tawp chhuaha kan enkawl mipuite tan Pathian thu dik leh rintlak hrilh leh zirtir hi kan bat a nih zia inhre chiang nawn fo ang u. Kan thiamna leh finna te a inchen loin dinhmun in ang lo tak taka awm kan ni a; kan enkawl kohhran te pawh finna thuah te, sum leh pai leh mihring mihrinna zawnah te pawh kan inthlau hlawm hle a. Mahse kan awmna hmun theuhah erawh chuan theihtawp kan chhuah thei a ni. 

Kan Kohhran thurin te, Nilai zan leh Sunday Sikula kan zirlai te hi ngun takin zir nawn ila, thiam loh leh hriat fiah tawk loh kan neih chuan kan Pastor leh Upa te pawh hi zawt fiah fo ang u. Kan kohhran tana kan phak tawk leh theih tawp kan chhuahna hian tun aia rah duhawm zawk leh hlawk zawk a chhuah theihna turin Pathian thu i zir ngun ang u. 

Pathian thu zir chhuak, Theologian leh Pastor te ngaisang duh lo leh hmu ro tlat, mihring thiamna leh finna hmanga Pathian thu sawi fiah tum anga kan ngaih tlatna rilru te hi a awm fo thin a, a pawi hle. Kan Pastor te, Theologian tha tak tak te hi Pathianin kohhran enkawl turte, kawng dik lo laka kan peng bo tur min chhanchhuaktu tur atan a ruat a ni tih hi hrechiang nawn ila. Vawiin thlenga khawvela Kohhran ban pawimawh te chu Pastor leh Upa te hi an ni tih hre rengin, anni hnen atang hian Pathian thu chah laimu te, kan hriat fiah loh leh kan hriat dik loh te zawtin hma sawn ze turin kan insawm a ni.