Entawn tlak Josefa

Genesis bung 37-50  inkarah Thuthlung Hlui huna mi ropui ber pawl Josefa chanchin hi kan hmu tan a.  Thuthlung Hlui huna Israel hnam pa (patriarchs) Abrahama, Isaaka leh Jakoba te ai pawhin a chanchin hi Bible ah kan hmu tam a. Bible zirmi tam tak chuan Josepha chanchin chip chiar taka Bible-a a lan chhan hi Lal Isua Krista nun dan leh rawngbawlna nena a inan vang niin an ngai a. Josefa chanchin atang hian Pathian rinawm zia te, harsatna eng ang karah pawh Pathianin min koh chhan ang taka rinawm taka hlenchhuak tur kan nih zia a lang chiang hle a ni.

A chanchin tawi: Josefa hming awmzia hi ‘Pathianin belhchhah rawh se’ tihna a ni a. A pa Jakoba tar lam fa niin a nu Rakili fa upa zawk a ni a; a pa fa duat bik niin kawrfual ze hrang hranga zia a siam sak tih kan hmu a. Unau sawmpahnih zingah amah hi sawmpakhatna niin a unau dang te pawhin a pa lakah an thik tih kan hria a. He tih hun lai vel hi kum BC 1900 emaw vel niin Bible zirmite chuan an ngai. 

A pa Jakoba atanga Beram vulha eizawng chhungkua niin a unaute Sekem hmuna Beram an venna hmuna a va tlawh tumin Median sumdawng ho hnenah tangka sawmhniha hralhin Aigupta ramah Pharaoa hnuaia hotu pakhat Potiphara’n a lei tih kan hmu. Aigupta rama a awm chhungin harsatna tam tak a paltlang a; tan inah te khung niin a tawpah Pathian a tih tlat avangin amah leh an chhungkua zawng zawng, Aigupta ram chenin Pathian malsawmna an dawng tih kan hmu a ni. 

Aigupta ram roreltuah tangin a pa leh a unaute zawng zawng nen an cheng a, Aigupta ramah hian a pa Jakoba pawh phum a nih thu kan hmu a. Josefa atang hian Israel hnam hnih Manase leh Ephraim hnam an lo chhuak a; kum 110 zet damin a tute khup thum hmuin thlamuang takin Aogupta ramah hian a thi tih kan hmu a ni. 

Josefa chanchin atanga zirtur kan neih pathum han tarlang ila-

Rinawmna: Josefa nun pumpuiah hian mihring leh Pathian laka a rinawmna hian hmun lian ber a chang tih kan hmu chiang hle a. Sal a nih avanga a tawrhna hrang hrangte hi a tam hle a. A pu te tan rinawm tak leh taima takin, rintlak takin hna a thawk a. A chunga Pathian rorel dan chu – a nuam leh hreawmah pawh phunnawi loin rinawm takin a tihtur chu a hlen chhuak mai thin a nih kha. Rinawm taka hna a thawhna chuan rah a chhuah a, a thiltih apiangah a hlawhtling a. Dik lo takin tan ina khung hial tawk mahse rinawm takin a awm tlat zel tih kan hmu a nih kha. 

Thlemna a do zo: Josefa thlemna hneh dan tluka entawn tlak hi Bible hmun dangah pawh hian kan hmu tam lo hle awm e. Nitinin thlemna tawk mahse Pathian duh loh zawng sual chu nghet takin a do tih – Potiphara nupuiin a thlem khan kan hmu chiang hle. Thlemna lo kal chu tlan sanin Pathian duh zawng a pan tlatna hi kan entawn tur leh thlemna kan do dan tur leh kan hneh dan tur dik kawng awm chhun a ni tih Josefa atang hian kan zirchhuak thei awm e. 

Ngaihdamna: Josefa nunah hian ngaihdamna hi kan hmu chiang hle bawk. A unaute’n mi ramah sal ni tur leh hreawm tinreng tuar turin an hralh a; a thih leh dam pawh hre tawh loin an chhungkaw lak atang chuan mitthi ang maia hla a ni a. Chuti ang khawpa an chhungkaw lak atanga mi hrang leh mitthi a nih hnua phuba lak theihna hun tha a neihah pawh chuan ngaihdamna rilru puin an chhungkuain an cheng za ta zawk tih kan hmu a nih kha. Pathian pawhin kan sualna anga kan chunga phuba la loin Lal Isua Krista kaltlangin ngaihdamna leh chatuan nunna min pe a. Kan hmelma te ngaihdam hi Pathian thu laimu a ni tih kan hriat reng a va tul em!