Nupui pasal atan tunge kan duh?

-Rinfela Zadeng & Debbie Rinawmi

Kohhran, khawtlang, ram leh hnam inghahna leh a chakna thuruk lian tak pakhat chu keini thalaite chungah hian a awm tiila kan sawi sual awm lo e. Tunlai khawvel changkang tawh lutukah phei hi chuan kum upa leh kan nu leh pa te thiam loh leh tihtheih lo, an ngaihtuahphak loh finna changkang tak takin min hual avangin thlalai lung fing zawk leh chak zawk te hi kan pawimawh zual a. Kan rilru puthmang a zirin kan chhungkua, kan kohhran leh kan ram dinhmun hi thui tak a innghat a ni.

Kan ram leh hnam, kan kohhran leh kan chhungkuain hmalam leh hmasawn tura ke a pen theihna tur hian tuna kan hun hman mek leh kan awmdan hian hmun pawimawh ber a chang a. Chhungkua kan la din zelna tur, nuipui pasal zawn kawngah pawh hian kan lakah kan thalaipuite hian duh leh beisei, zawn an nei a. Kan nu leh pa te pawhin keini aimahin kan lakah beisei an nei sang zawk a, kan ram leh kan kohhran pawhin beiseina min nei sang hle a ni.

Nupui tur atan hian....

An hmelthat leh that loh te, an pian nalh leh nalh loh te hi mipa mit la hmasa ber tu leh nulate kan umzuina tura kan ngaihtuhan luah hmasa ber chu  an ni tih hi zep tur a awm lo, mipa zawng zawng deuh thaw rilru a ni ang. Mahse, chuti ang pian leh hmel i lo nei lo a nih pawhin lo la, lo beidawng reng reng suh. Heti anga nula itawm tak leh mawi takte hi mipa chuan nalh kan ti teuh meuh mai a, mahse an laka kan beisei leh duh ber hian vanram lam a kawk lo duh khawp mai!

Chuti ang ringawt mitmenga nupui kan zawn chuan kan tisual duh khawp mai a, chuvangin mipa tam tak chuan nupuia neih kan duh tur tak tak hi chu a pangngai hi a lo ni duh khawp mai. Tin, an rilru put hmang hi kan en ngun a, rintlak leh inngahna tlak inni em tih hi a tawp khawka kan teh rukna teh fung lian ber chu a lo ni ngei ngei zel. Nula –pian nalh hran lo, hmeltha hran lo leh zei em em hran lo pawh i lo ni mai thei e, mahse zamin zak suh. Ngaihzawng leh nupuia kan duh hi chu mipa hian kan thliar fo a, a tawpah a rintlak leh tlo zawk hi damchhung kawppui atan chuan kan duh tlat zel.

Ngaihzawng atan chuan zei leh nalh, hmeltha leh itawm te chu tui mipa fa in nge duh lo teh lul ang! Engkim hre tawh leh tawng tawh, zak lo ve tak te chu ngaihzawng atan hian kan duh vaiu rualin a tawpah chuan mi nun zahawm, zei lo leh Pathian tih tlat mi, fate enkawl seilen kawnga ngaihngam taka kan rin zawh tur hi mipa, pasal atana neih tlak chuan an thlang zel tih hi ngun taka i en chuan i hmu teuh ang!

Mipa ingahhna tlak nia i hriatte nupui - i hmeichhiatpui te hi en la, mi nun tha leh mi lerh lo, nungchang mawi leh thiante zingah pawh a zei lo leh Social Media velah pawh thlalak nalh tak tak nei bik lo te an ni tih i hre ngei ang. Chuvang chuan tuna mawi leh nalh aiin nakina a hun taka mawi leh nalh, tlo turin inbuatsaih la. Pathian tih tlat chungin i nun kha han hmang lui hram hram la, engkim petu che Pathian chuan i phu tawk leh i tana tha ber tur pasal a pe ngei ngei ang che.

Zan rei tak tak thlenga Social Media lama hun hmang, Facebook leh Instagram lama ‘live’ thin, thlalak mawi leh nalh, itawm leh duhawm tak tak te hi – mipa hian kan umzuiin kan ngaihven teuh meuh mai. Mahse a tawp tak taka Biak Ina Pastor hmaa kan dinpui tur atan chuang langsar lo lama nula tha leh nalh, belhchian dawl leh inghahna tlak, Pathian tih tlattu nula thing leh lang sar lo te hia kan thlang zawk zel a ni tih hi lo hre reng ang che.

Pasal tur atan hian...

Kristian sakhaw vuantu kan nih angin a tak taka Kristian chhungkaw dinpui tur mipa hi kan duh mai a ni lo va, kan thlahlel a ni. Ram nuam leh hnam ropui, hmasawn leh entawn tlak din tur chuan dikna leh huaisenna a ngai a, chutiang siam tur chuan mimal tin te kan pawimawh a. A bul tanna hmasa ber chu kan chhungkuaah a ni.

Mipa tam zawk chuan sek/six pack te nalh inti a, lirthei mawi leh nalh tak tak, ro sum leh khawvel changkanna a chelh beh theih emaw min ti thin - hmeichhia te hi. Chumi vang chuan hmeichhe then khat pasal/makpa hausa neih tum ngawr ngawr tlem azawng te chu inhip mahna le! Hmeichhe nawlpui chu inneih rosum ah kan lungawi zo dér lo nia -hmaih lian deuh in neih kan hlau.

Pasal atan chuan kan thlamuanpui ngei tur kan duh. Hmeichhe lu chu mipa in nih angin inlakah himna kan zawng thin a. Pasal thenkhat, an lakah himna leh ralmuanna beisei ngam loh khawpa patling lo kan hmuh te hian kan zam a, kan thlabar thin. Kan chhehvel kan thlir a, chhungkua kan awh thin chu hlim tak leh thlamuang taka pa ber awpna hnuaia chhungkaw uap lum te hi an ni.

Thil tam takah hmeichhia kan chungnun tawh lai leh sang taka kan thlawh lai pawhin kan mamawh che u tih in hria em? In nâk ruh bo kan ni miau a! Hna sang tak tak chelh thei hmeichhia te hi tlem té chauh an ni a; chuvangin min chawm thei ngei tur pasal kan duh. Kan fing ve tawh a, dam tha pangngai ni si, mipa nitina in awm ringawt hian min hip vak tawh lo.

Hmanah chuan mipa chu - mi rel ve zuah zuah lo, hmeichhe thunawiah phei chuan inrawlh ngai lo-ah kan ngaih rual che uin keimahni hmeichhia chu kam tam kan inti thin a. Hemi kawngah hian a ruk tak pawhin kan zah em em thin che u a. Hun inher zelin Social Media khawvela min seng luh hnu hian hmeichhe thenkhat tawng duh deuh deuhte chu ngaih khatah kan ngai mai a, kam tam kan intih sa vang a ni ang. Chutihrualin, mipa kam tam leh tawngkam chhe tak tak kan hmuh hian kan thinlung kil, hmun biru ber atang hian hahîpin mak kan ti a, kan râp thin! Chutiang mite leh nileng zan khuaa games khel thin te hi ngaihzawng atan pawh kan iai a, pasal atan phei chuan kan ngaihtuah pha lo. Kan chhehvelah chutiang mi chu kan hmu ve a, chhungkaw enkawlna hun an nei lo tih kan hmu a. Anmahni thlarau chaw ngei pawh an ei hman loh chuan Kristian chhungkua chu hla tak a ni ang tiin kan lo zeldin ve tawp thin a, dik tak maw?

Pathianin hmeichhiate hi derdep takin min siam mahse kawng tam takah chuan kan chak a, ngaihtuahna thuk deuh mai kan nei bawk a. Kan ngaihtuahna pawnlang leh ho tak phenah hian ngaihtuahna thuk, nu bulh maia fim tak si- no bal taka tui thianghlim dah ang mai hi kan nei ve a. A chang chuan keini ngei pawh hian kan ngaihtuahna nu but thin leh chiai thin te hi kan remkhawm thiam hauh lo a. Hemi kawngah te hian mipa, hringnun hrethiam zet mai bula awm kan thlahlel a, titi pui kan châk a, milar leh thenawmte chanchin ngawt lo deuh sawi châk chang kan nei ve thin tih te hi in hriat loh kan hlau. Heng te tham tamte te te hi kan rilru inhnehna tura hmanraw pawimawh leh lian zet a ni tih kan hrilh ru che u.

Lalpa tih chu finna a ni tih kan hria a, pasal fing tak kan duh bawk. Lalpa tih tak mipaah hian heng- taimakna, hmeichhe duat thiamna, fing leh fel, zahawm leh kan chhungril duhthusam leh mamawh  dang zawng zawng hi a awm kim vek ang tih kan ring a. Chu chu hre turah kan ngai che u a, kan sawi lo mai mai thin a ni.

Rilru hrisel tak leh ngaihdan fumfe tak mipa i nih phei chuan kan ngaisang ngawt ang che. Thil kan tih dawna kan inbuatsaih thin ang hian Kristian chhungkua din tur pawhin inngaihzawn tantirh atanga inbuatsaih lawk tur a ni tih kan hriat ve kar avangin thil dik lo pawisa lo leh Pathian tih lo nunzia kan hmuh hian 'pasal tlak lo' tiin kan hnual ve rawih rawih thin a nia aw. 'Kristian chhungkua kan din anga, fa chhawr tlak tak tak kan nei anga, khawtlangah thil tha an thlen anga' tiin duh thu kan sam thin a, chumi min tihhlawhtlin pui thei tur chu pasal atana kan duhzawng chu an ni.

Tui zawng leh nuam tih zawng a inang lo tih kan hre ve, chutih rual chuan chanchinbu leh lehkhabu eng maw chhiar ve thin nia kan hriat te hi kan ngaisang a, kan awt a, kan dah sang larh thin. Miin 'eng lehkhabu nge i chhiar thin?' ti a mi an zawh nikhuaa 'Bible a ni mai alawm' tia chhanna pe te hian Bible pawh an chhiar hnem em em chuang lo tih kan hriat ve vang pawh a ni mai thei.

Sexy leh zahmawh lam hawia min lo biak te hian sexy kan ti lo che u a, kan ten cheuin zahawmloh kan ti thin zawk che u. Pangngai tak leh zahtlak kan ni lo chunga zah tak leh hawihhawm taka min lo biak te hian kan zah cheuin ‘sexy’ kan ti zawk che u a. Kan dam chhunga intan inpek zawh hi kan chak thin zawk a ni.