Infiamna khawvelah hian ‘Ball’ pawimawhzia hi kan hre theuh ang a, ball tel loa infiamna hi a tlem zawk a ni hial ang. Khawvel huapa infiamna lar Football, Tennis, Basketball adt te hi ball hman ngai vek a ni a, an ball hman tur pawh hi a bik taka siam niin ‘company’ tha leh rintlak te’n an siam a. Khawvel puma infiamna lar ber FIFA World Cup ah pawh a bik taka siam ball tha leh rintlak hi an hmang thin tih kan hre vek awm e. Ball awmna hmun a zirin kan chakin kan chak lo thin a, a awmna tur dika taka ball kan dah theih chuan hnehna kan chang thin a nih kha.
Politics khawvelah pawh hian kan inkhelhna ball hian hmun pawimawh tak a chang a, kan ram leh hnam dinchhuahna leh tluksawp theihna pawh kan ball-ah hian a innghat a. Kan Politician te leh mipuite’n politics khawvela kan inkhelhna ball hi kan ram leh hnam dinchhuahna atan hian a tha em tih hi inzawt ta ila; tha ti lo hi kan tam zawk ngei ang a. Mahse kan ball hman lai thlak tur khawpa mi huaisen leh dik erawh chu kan inkhelh pui ngam lo tlat ni hian a lang thin.
Hmanni lawka Mizote zingah dikna avanga mi hriathlawh KL Liana a boral a, kan hman rohlu leh mi ropui kan chan tih hi Zofa te’n kan pawm vek a. Mahse, amah anga mi dik hi ngati nge kan nih ve ngam loh? Chhana hrang hrang awm thei zinga langsar ber chu kan ram leh hnam rorelna atana kan hman kan politics ball hi a dik loh vang a ni tih huai takin kan sawi thei ang. Thudik leh tha, rinawm leh rintlak ball a lo chhawp chhuak thin te hi kan inkhelh pui ngam tak tak lo a, kan pet pui ngam lo a. Dawt leh thudik chanve hmanga kan ram Sorkar inrelbawlna tura ball lo vawrhchhuak tute hi kan inkhelhpui zel avangin tun hi kan thleng tih a chrechiang bertu te chu keimahni ngei hi kan ni a, a tuartute pawh keimahni ngei kan ni.
Delhi Chief Minister that zia te, Bihar Chief Minister that zia te leh ram dang Minister that zia te kan sawi sawi a, an ramin hma a sawn zia leh an rorelna te kan hmuin kan it thin a, kan sawi fo thin. Chuti ang mi chu Zofate zingah an awm ve lo a ni hauh lo a; inthlan dawnah thudik leh rinawmna ball an lo vawrh chhuahin kan petpui ngam loin kan khelhpui ngam lo a. Thudik chanve leh nakin lawka kan nuihzat leh tur thu dik mang lo puang chhuaka mipuite min bawl kual leh mai mai turte ball lo vawrhchhuah hi kan khelh pui luih luih a. Thudik lo leh dawt chanve hmangtu te ball in goal a ‘score’ hnuah keimahni ngei hi kan lawm lo leh si a, kan heti zo ta a ni ber mai.
Mizoram politics khawvel hi chhe ta vek leh siamthat theih hauh loh a la ni lo a, mahse kan inkhelhna ball hi kan thlak ngam hma loh chuan ‘Nahaia chu nise tihian a lo mai tur’ tiin Chhura chengkek lawh tum thukhawchang hi kan thunawn a ni reng dawn a ni. Mi dik leh mi tha hi kan hria a, kan chawimawi hreh loin kan ngaisang tih hi thudik leh langchhuak fo a ni. Mahse chuti anga mi dik leh tha te’n ram rorelna vawng vuana kan ram leh hnam kaihhruai an duh hian an ball min pek hi ngati nge kan pet pui ngam loh? Mizoram Politics hi thudik leh rinawman ball hmanga khelh ve theih a ni tlat lo hi eng nge a chhan? Ngatinge kan ram hruaitu hlun te hian an ball hman thiam sa, kum 40 chuang kan ramin a hlawhtlinpui tak tak theih siloh hi an vawrhchhuah nawna an chakpui zel mai le?
Kan ram hruaitu hlun te hian an ball hman an thlak duh lohna chhan lian tak chu anmahni inkhelhpuia hlawhtlinna an chan zel theihna tur mipui te hi kan la tam vang a ni. Mipuite hian kan ram leh hnam hi kan hmangaih tak tak a nih chuan retheih leh tawrh huama kan politcs ball hman hi kan thlak a hun ve tawh tak zet a ni. Mipui tel loin kan hruaitu thlanchhuah te hian anmahni chauhin lalna leh thuneihna hi an nei thei lo a. Keini mipuite hian ball dik lo min pek hi kan hnawl ngam phawt chuan ball dik zawk hi min pe em em dawn a. Anmahni hi tha famkim lo mahse mipuiin dikna leh rinawmna ball hlir kan pass phawt chuan a tawpa goal tur chu thudik leh rinawmna hi a ni tih chu mi a ber pawhin kan hre vek awm e.
Dawt leh thu dik lo, rinawmna leh dikna tel lo ball hmanga inkhelh reng hian a tawpah rah tha a chhuah loh zia hre tur hi chuan ‘experience’ hi chu kan nei tawk ve tawh khawp mai! Chuvangin Zofate hi i harh mawlh ang u. Kan ram hruaitu tur te hian thudik leh rintlak, langtlang leh hmasawnna keng tel ngei tur Politics an khelh theihna turin mipuite hian an ball lo vawrhchhuah hi i thlak sak mawlh teh ang u. Mi tha leh dik, kan it ruk leh kan awh ruk ngawih ngawih te hnawl zel a, an thusawi kan nuih zat ruk leh fiamthu thawhna mai mai atana kan hman leh tur ram hruaitu thlanchhuah te hi i sim ang u.
Nang leh kei hian ball dik zawk chauh kan pet duh a; ball dik lo zawk kan hnawl zel chuan ball min petu hian loh theihlohin ball dik chu min la pe ngei ngei dawn. Chuvang chuan kan ram leh hnam siamthatna tur hian kan pahniha kan pawimawh zia hi hre nawn tharin; Politcs khelhna atana dawt leh ther hlo, rinawmlohna leh chhungkhat leh a ti thei te induhskna politics ball hi hnawlin thudik leh diknain ro a relh theihna tura ball rintlak hi pet ngam turin kan rilru i siam teh ang aw?
Comments
Post a Comment