Quarantine Center-a awm hi tute nge an nih?

Mi tin engtia chhân ṭheuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se - Kolossa 4:6

Mi nawlpui ban phakah Social Media (Facebook, Instagram, WhatsApp adt.) a awm tawh avang hian zan khat thil thuah kan chanchin mawi leh mawi lo hian ram pum a deng chhuak a. Kan chanchin hi mi zawng zawng deuh thaw sawi leh sel theihna khawvelah kan cheng mek a nih hi.

Kan ram India Dan pui Article 19 (1)(a) in kan duh zawng leh kan vei zawng, tha kan tih zawng te zalen taka sawi theihna min pek avang te hian Social Media lamah te pawh kan ngaih dan, kan vei zawng leh Sorkar kan duhkhawp lohna te pawh kan sawi thei a, a tha hle. Chutih rual erawh chuan thu dik lo leh rintlak loh, tawngkam mawi lo leh tha lo, chi inthliarna lam hawi leh mi pawisawina lam hawia sawi leh ziah emaw hi Press Council of India chuan a phal hauh lo tih GN. Ray chuan chiang takin a ziak a.

Keini Mizote pawh hian Internet awm hma leh khawvel ram zau zawk kan daidarh hma pawhin tawngkam mawi lo leh tha lo hmang duh lo hnam kan ni a. Kan pi leh pu te pawhin ‘Tawngkam thain Sial a man’ tiin hman atangin min lo zirtir diam tawh a nih kha. Mahni aia upa te zah tak leh thuhnuaihrawlh taka seilian tur leh khawtlang rorelna nuam leh tha, mi tin hlimna leh lawmna thlen turin min thlahtute khan theihtawp chhuahin min zirtirin min enkawl sei lian a nih kha.

Vawiinah erawh chuan Social Media kaltlanga indiriam leh inchirhtheh te, a tuar tu leh a lo dawngsawng tu tana na ngawih ngawih tura thil sawi te hi kan chingin kan uar ta hle a, a pawi hle. Tunah ngat phei chuan Covid-19 in khawvel a chawk buaia, keini Mizote ngei pawh min luhchilhin min run mek a. Kan sawi zui dan tawngkam te hi a tuartu te tana a nat tur zia hi kan ngaihtuah thleng pha loa, a pawi tak zet a ni.

Mizoram pawn atanga kan u leh nau lo haw – Quarantine Center atanga rilru nuam lo leh hreawm ti tak chung leh inthlahrung ru em em chunga an thisen /swab sample result nghak mek te kan tawngkam leh kan thuziak hmanga kan kheng bet sawk sawk te hi a tuartu tan a nat zia hi kan ngaihtuah thleng lo a ni. Anmahni hian kan sawi sel leh kan diriam ngai loin hreawm leh phurrrit tak an phur mek sa a, va diriam zui hi an ngailo – an tawrhna hi a na tawk tih i hriatsak ang u.

Vawiina Quarantine Center a awm mek te hi tu dang ni loin kan unau, kan Mizo pui, inthlahrunna leh hreawm tihna chang hria, mi tana phurrit leh harstana thlen duhlo Mizo te kha an ni. Tumah hi he natna tidarhtu leh ralti tura kan ram siam duhtu hi an awm lo tih hriain theih tawp chhuaha kan fuih leh kan thlamuan te, kan tawngtaipuite hi an mamawh tih hi hriat sak ang u.

Kristian kan nihna zawn atang pawh hian tawngkam mawi leh tha hi kan sawi tur a nih zia Tirhkhoh Paul-a pawhin chiang takin min hrilh a. Paul-a hian Kristian nun dan tha (ethics) tam tak min ziritir a. Kolossa 4:6 a kan hmuh ang khian kan tawngka chhuak chu chia al, khawngaihna tel ni fo turin min chah a nih kha. Grik ho tan chuan Chi hi finna entirna a ni a, helai thua Paul-a’n a sawi tum ber chu kan tawngkam chhuak chu mi dangte tana hriat nuam leh pawm nuam, thufing leh hlu pai a ni tur a ni. Kan eitur te tui taka kan ei theihna tura chi hmanga kan pawlh tui ang hian kan tawngkam chhuak chu khawngaihna leh hmangaihna tel a ni tur a ni.

An duh reng vang leh an remruat lawk bik ni hauh loa kan unau Mizoram pawn atanga lo haw, Hripui hlauhawm tak vei thei leh thehdarhthei an ni tih inhre renga rilru nuam lo tak leh inthlahrung taka awm mekte kan lo dawn sawn dan tawngkam thenkhat hi chu Chi tel lo, diriamna leh khawngaihna tel lo a ni tih hi zep tur a awm lo. Kan sawi zui dan hi an hmuin an hre ve vek a, keini aiin Social Media khawihna hun thawl an ngah zawk a. Chuvang chuan kan zavai hian sawi tur leh sawi loh turte, mi dangte hriat nuam lo tur thil leh inzah lohna tawngkam te hi hmang tlem ang u.

Kohhran, khawtlang leh kan ram hruaitute zingah ngei ngei pawh hian tawngkam na tak tak leh mi dangte tina ngawih ngawih thei thil sawi leh ziah kan ching a. Mi dangte thlamuan leh fuih tur zawk si hian rapthlak kan tih thute hi kan sawi lang fo a. Tih theih kan nei lo ta sa sa, tawngkam tha leh mawi zawkin i dawngsawng ang u.

Kan zavaia kan dam tlan theihna tur te, he natna vei mek te leh vei thei dinhmuna ding mek te, Mizorama lo la haw leh zel tur te tan hian kan theihtawp chhuahin tawngtai ila, kan vaiin he Hripui hi i do zawk ang u. Chia al, khawngaihna tel nena kan dawngsawng thei lo a nih pawhin i ngawi ngam ang u!