ZD tho la, êng rawh!

Aizawl Theological College ka kal chhung (2016-2020) a ka roomate neihchhhun R. Lalengkima/Kimtea Ralte in ka chanchin a ziah hi ka va lawm teh lul êm! Heti taka min chawimawi avang hian Pathian hmingin lawmthu ka sawi e!

May ni 19 zing dar 7:30 pelh hret chuan Lunglei atanga km 11 vela hla Zobâwk (kan khua atang phei chuan km 113 vel zet a ni tawh a, khâp ang zawnga chhut phei chuan chhut fé tham a ni tawh😂) khaw chhung lùn lai chu kan tlan pel zel a, YMA signboard-in ‘MANGTHA MAI LE’ a tih piah lama rei vak lo kan tlan leh hnu chuan Thalaite infiamna tualzawl sir a in kawt ah chuan kan ding dat a. Kan thawm hria in amah Rinfela Zadeng ngei chu a mutna atang chuan a lo tho nghal át a, hlim taka rawn hawi paw pheu pah chuan “In lo thleng der tawh a ni maw?” a lo ti var a. Ka rilru ah erawh Maubâwk tlangval Jacob Zosangliana'n Hostel awm laia a mu lai kaitho paha, “ZD tho la, éng rawh! Èn chu a har deuh maithei” a tih chu a lo awm daih thung a.😄

Zobâwk to ATC via Orissa

Amah hi pa tha tak mai, a tawng phét phét ang bawka che phét phét a ni na a, a duh thilah  erawh a chiangin a tumruh hle. Pathian thu zirna lama a inliluh tak tak hmain Orissa khaw chèngker thlengin a lo dâi dar ve viau hman a. A hmel en atang ringawt pawh hian khawi hmunah pawh inhai kaw thei zel tur hmel hi a pu reuh a. India rama Kristian te tihduhdah nasat berna hmunah pawh Missionary hna a thawh lai pawhin a hlim thei viau zel. Thianpa Biakvela Vanzau in “A ram leilung fate te nen pawh a hmel hi a danglam vak lova, an ngaina thei riau” a lo tih te kha, a Kamis sen, a dung zawnga tial ngei nen leh midum nihliap sei hawl chunga phâi khawlum hnuaia an vâk vêl tur nen kan mitthla hian ka pawmpui ta riau mai.😄

Theologian cum Writer

Duhlian tawngah ngei Bachelor Degree nei a ni bawk a, tawngkam bungrua leh han remkhâwm vel pawh a thiam na rawh e. A duhtawka a lei an vaivir tawh hi chuan a thlun phelh ang zar zar hi a ni mai a. Thu ziah lam hlei hlei a chemkal na. Lawmman te sêp a dawn tawh nual bakah kum 2016-a MZP in Article ziak tha ber chawimawina an hlan te kha a awm viau rêng a ni. 

Duhlian tawng a thiam tluk zet hian awze tawng hi thiam ngat sela chu kan Boss en deuh há hial hian ka ring thin. Zir thuhmun pawl thuhmun na na na chu ngaihdan inang lova kan rik nak nak lai a, Zadeng aw fiah kêk kâwk a, Zobawk English ngei nen “Bekhaus...” a tih tawh hi chuan room chhung hi Khuavang kallai ang mai hian a reh dap a, a sawi chhunzawm tur nghak hian Tlumtea thlir tak hian kan lo thlir dauh dauh thin. A duh tawka awze tawnga an tawng tawh hi chu Kawlhawk chem barh ang nawk nawk hi a ni na a, mahse a duh chin sawina tur English word erawh a pai reng thung si. A duh ang a sawi zawh hi chuan kan pâwla phai lam chhuak awze tawng thiama kan neih Simon Pachuau te pawh mak tiin an meng duli leh pap thin. Twinkle Hauhnar leh Mary Lalenmawi Vaiphei te angin British accent nei ve lo mah sela, Zobawk English nen hian a damkhaw chhuak dawn tih hi ka chiang.

Khawr, khawr lo

Vei lam an hmang thiam zawk tlat mai te hian a ti ZD-a riau. A thusawi tifiah tura khawr deuh tlùn a, a kut an han phar vel te, a ball pét tur che vel intintuah, bawlhhlawh rût tur an ang tlat te hi a hmuhnawm dangdai. Veikhawr hi pumbilh vek pawh nise ka chuhpui lo tawp ang. A kutzungchal pahnih chauh a hmangthiam chung pawh hian Computer-a a thil type te hi Thloh thing tù ang mai hian a ri tlir char char thei nia. Chutih laiin hmangaihna lamtluangah erawh a khawr hauh thung si lo. “Ka hâng na a, ka nalh a nia” tih te hi atana an ziah ni mai âwma mawi a ni a. A mawina hre riau hi a haihchham tlat lo. Inhauh nikhua ah lamtang atan a tlak chiah lo a nih pawhin, a thiam thilte en hi chuan Puarak atan erawh duhthusam a nih ka ring. Arsenal Football Club chanchin a sawi phei hi chu Bawrhsaiabe duh aia chhum hmin ei ang vel a ni, nâl tak a ni.

Thil Pahnih

Ka laka thil bat tir talh tum na na na chu, thil pahnih ah ka hnenah lawmthu sawina tur a nei ve tlat. Pakhat ah chuan, a hmel en pawha damlo thei hmel pawh pu lo kha exam laiin a dam lo a, a mu tlat (a damlo erawh hritlang khawsik satliah mai mai mah nise a nat hmel bik). Exam pawh tum lo kha, a mu lai ka tung tho. A exam a, tha takin a pass ve tho. Pahnihna, tunlai hripui leng karah km 113 chuang tlanin VLTF duty eng emaw zat leh an hrui thlun tlan pelh hnuah kum li chhunga ka roommate neih chhun hi tlawh lo thei ka ni lo (ka ngaihpawimawh bakah, a lo remchang hlauh bawk a😄).

Mi bik, mi danglam, fiamthu duh, mi pawisawi hlau si. Fiamthu thawh nan pawha mi chanchin aia mahni chanchin hmanga fiamthu sawi zawk tlat tu. Mi tlang, a huna zak lo thei leh ding chhuak ngam, keini a hun lova bengchheng, a huna kâ chih leh tlat thin; mahni ngaihdan pawh sawi chhuak ngam ngai lo hian, rim tam tak karah tluk loh rim i nam zia ka hre chhuak fo thin. I thiam, i finna leh i thil zir chhuah te hmangin midangte tana enna thlen tu ni ang che. (Tarmit day&night a vuah a, kan thim nileng reng mai dawn chu a nih hi😎😂)