Social Media hmangtute hnena thuchah

‘Social Media’ hi Sap tawng nimahse sawifiah leh hranpa ngailo khawpa kan hriat chian leh kan hman nasat a ni tih hi kan pawm vek awm e. Thalai leh nu leh pate pawhin kan hmang nasain tun ‘Lockdown’ lai phei hi chuan a hma zawng aiin kan hmang nasa zual a. Mi tin deuh thaw ban phakah a awm tawh avang hian thu leh hla pawh nasa takin a pian belh a, chutah tak chuan kan tawng hi eng ang takin nge a nghawng tih hi kan ngaihtuah ngun a tul hle.

Instagram hmangtute u..

Khawvel milar te leh thalai lamin kan hman nasat chu Instagram hi a ni a; followers leh likers ngah nih te hi a hluin thalaite pawhin kan ngaisangin chuti anga awm ve chu kan chakin kan duh ve tih hi phat rual a nilo e. Thu leh hla ril leh mawi tak tak te, thlalak nalh tak tak leh sexy tak tak te thlenga kan inpho chhuahna chhan hi eng dang niloin miin min hria se kan tih vang a ni a, tin sum leh pai pawh a lakluh theih bawk a nih kha.

Kan hman dan leh kan hman chhan chu engpawh lo nise- Mizo tawng hi dik takin i hmang ang u tiin kan inchah a ni. ‘Caption’ kan siam te, kan ‘comment’ te, thu leh hla ril – kan thalai puite duh zawng tak kan ziah lanah te hian a dik thei ang bera ziak hram hram turin kan inchah a ni. Mizo tawng ziah dan kan thiam tawklo a nih chuan a thiam te zawh hi hreh lo ila, tin keimahni ngei pawh hian kan zir phawt chuan kan thiam em em ang.

Talent tha tak tak in nei a, thalai tam takin kan zui che u a, in thlalak leh in thu leh hla te kan lo ngaichang thin a. Chuti taka mi pawimawh in nih avang chuan kan tawng inziah dikloh leh intihsual hian keini hian intihdan entawnin kan tisual ve zel dawn a. Chuvangin a dik thei ang ber leh a tha thei ang bera ziak tur leh zir tlak niturin kan ngenin kan chah che u a ni. Kan hnam leh tawng a boral lohna tura tan min lakpui turin kan sawm tak meuh meuh che u a ni e.

You Tube Channel neite u, khawngaihtakin...

You Tube Channel neitute leh thawnthu ngaihnawm tak tak min chhiar sak thintute, thu ngaihnawm leh bengvar thlak tak tak min hrilh thintute u- khawngaihtakin Mizo tawng dik leh nalh thei ang bera in thu leh hlate hi min hlui zel turin kan ngen a che u. In channel hi hna kan thawh pah te, zan kan mutnaah te hian naupangte nen kan ngaithla nasa em em a. Zotawng diklo leh nalh lo tak tak inhman chuan keini leh kan tu leh fate hian kan tawng hi kan hmang diklo chho zel dawn si a. Chuvang tak chuan tawng dik zawk leh mawi zawk hi lo hmang zel turin kan ngen a che u.

Tawng pawimawh zia leh hlut zia hi a chrechiang bertute innih kha. In talent ropui tak leh inthawhrimna hmangin thawnhtu ngaihnawm tak tak leh thil bengvarthlak tak takte min hrilh a, kan va lawm em! Tun aia tan lo la zual tur leh Zotawng dik leh mawi zawk hmanga kan tana luangliam leh zel turin kan sawm tak meuh meuh che u a ni.

Facebook leh WhatsApp lama thu ziak thin te u, kan ngen leh a che u...

Facebook leh WhatsApp lama thu ziak tha tak tak leh ngaihnawm, tangkai leh hlu tak tak ziak thinte u – in thu leh hla ziah te hi a darh zauin chhiartu pawh kan tam em em a. Chuvang tak chuan tan han la leh zual ula, Zotawng dik leh mawi, zir tlak leh entawn tlak min hnuchiah zel turin kan ngen a che u.

Facebook leh WhatsApp Group hrang hrangah in thu leh halte kan lo chhiarin kan lo hlut em em thin a. Thalai leh naupang chenin in thu leh hla te kan lo chhiar thin a; in lo ziah dik tawkloh emaw hawrawp kimlo taka in lo ziah te hian ziah dan tur leh hman dan tur dik emaw kan tih mai hi a hlauhawm em em a. Chuvang tak chuan a dik thei ang ber leh Zotawng ziah dan dik taka ziak zel turin kan sawmin kan ngen a che u.

Pathianin talent hlu tak tak a pek che u hmanga ‘Social Media’ lama kan tana inluan chhuahnaah lawm thu kan sawi a. In talent ropui tak tak te hmang hian kan tawng – Mizo tawng chhe zel tur leh kan hman dik tawklohte hi min siam that pui tur leh kan ram leh hnam min humhalh pui turin kan sawm a che u.