Pathian nihna: Habakuka bu atanga thlirna

Thuthlung Hluia bu 35-na Habakuka buah hian Zawlnei Habakuka leh Pathian inbiakna kan hmu a. Zawlnei Habakuka hi Pathianin khawvela ro a rel danah a vui a, a chhuahchhal bawk tih kan hmu a nih kha. Israel ram lehkhabuahte hian heti anga mihringin Pathian a chhuahchhalhna hi a hmain a la awm ngailo hial ang tih a ni a. Chuti anga Pathian chhuahchhalhna leh A rorel dana vui Habakuka hnena Pathian nihna ropui tak tarlan a nih dan hi kan thiam tawk tlemte hmangin i lo zir teh ang.

A bu hming: Hebrai Bible-ah chuan ‘Habaqquq’ tia ziah niin a awmzia chu ‘pawm’ tihna a ni a. Greek tawng Bible Septuagint-ah chuan ‘Ambakoum’ tiin an ziak a, Latin Bible Vulgate-ah chuan ‘Habacuc’ ti a ziakin Sap tawng Bible-ah ‘Habakkuk’ tih a ni a. Chu chu Mizo Bible-ah ‘k’ pakhat paihin ‘Habakuka’ tiin kan sawi ve ta a ni.

Tu ziah nge?: Habakuka ziaktu leh a ziah hun lai hi German Pathian Theologian Karl Ferdinand Reinhard Budde chuan kum BC 615 vela ziah a nih a ring a, a ziaktu pawh Zawlnei Habakuka ngei hi niin a ring a. Mi thiam thenkhat erawh chuan Habakuka 1:6 a Kaldai ho tih hi a tirah chuan Kittim, Grik ho sawina a ni e an ti a. Chuvang chuan chuan Habakuka bu hi Grik lal ropui Alexander-a lal lai kum BC 333 velah an ziak a ni an ti ve thung a. Mahse mi thiam tam zawkte erawh chuan kum BC 600,  Babulon-in Kermis-a hnehna an chan leh Nebukadnezzar-a’n Juda ram a runa, Jerusalem a lak inkar vela ziah a nih an ring.

Tunge Habakuka?: Habakuka chanchin hi hriat tam tur a awm lutuk lo a; a lehkhabuah hian a rawngbawl hun lai leh a thlahtute chanchin kan hmu lo. Pathian leh Israelte inkara palai hna thawktu, Zawlnei a ni tih erawh chiang takin kan hmu (1:1, 3:1). Tin, bung thumnaa hla thu avang hian Levia chi, rimawi tum tura tih hnam zinga mi niin  mi thiamte chuan an ngai a ni.

Eng nge min zirtir a tum?: He lehkhabu bung khatna atang hian Zawlnei Habakuka hi Pathian rorel danah a vui a, zawhna a zawt nghal tih kan hmu awm e. Chuta tanga Pathian nihna leh a rorel dante chu kan thiam tawkin lo sawi zui ta ila-

Mi tha tuarna leh misual vanneihna chungchanga Pathian rilru: Habakuka bung 1:2-4 a kan hmuh ang hian Pathian tha leh dik, khawvel pumpui thununa enkawltu leh engkim hre vektu chuan engati nge mi fel leh Pathian thu awihte tuar a phal a, mi sual tak leh keini ngaihdana thi nghal tlak nia kan hriat khawpa sualte chu dinchan a phal lawi si tih zawhna kha  ni a. Chuta Pathianin Habakuka a hrilh chu mi fel leh thate’n mi sualte kut an tawrh chhan chu anmahni zilhna leh thununa atana Pathian thil tih a ni tih min hrilh a. He lehkhabu-ah pawh hian Kaldai ho Pathian rorelna hmanrua an nih thu Habakuka hian min hrilh a ni.

Pathian thianghlim leh dik: Habakuka hian Pathian mizia chiang takin min hrilh a. Pathian chu sualna hmu theilo khawpa mit thianghlim leh fel a nih thu kan hmu. Thil diklo tak titute hi dingchangin mihring lamah dinhmun awhawm leh ropui tak angin han leng vel mahsela rorelna chu an pumpelh dawnlo tih kan hmu a. Pathianin tul a tih hun leh an chunga rorelna lo thleng tur chu dawhthei taka nghah fan fan tur a nih thu kan hmu a.  Mi sualte chu vanneiin tluang viauin lang mahsela Pathianin an chunga rorelna a lekkawh hun chu a lo la thleng ngei ngei dawn tih kan hmu a ni.

Nghah tlak Pathian: Rinawm tak leh dawhthei taka Pathian nghak hram hram thintu chu Pathianin chhanna duhawm tak a pe ngei ngei zel tih kan hmu thei a (2:3). Mi fel chu Pathian lama a tan reng a, beisei hram hram leh chhel tak chunga rinna a nghah tlat chuan Pathianin a ti thlawn ngailo ang tih kan hmu a ni.

Innghah tlak Pathian: Habakuka bua lar ber leh kan hriat lar ber chu Habakuka tawngtaina hi a ni awm e. Habakuka tawngtaina hi a ropui takzet a; Pathian chu a thil pekte leh a malsawmna tinreng ai pawha ropui a ni a. Israel fate intunna leh an eizawnna– Theipui rah, Olive, lo neih, Grep rah leh an ranvulh te chuan rah chhuahloin heng atang hian malsawmna dawng loin chan vek mahsela a petu Pathian chu engkima fak zel tur leh a chunga innghat tlat turin min fuih a.  Retheihna leh tam lo thlengah pawh chuan Pathian chu a la fak cheu dawn thu min hrilh a, a ropui hle. Pathian ber a awm chhung chuan eng chhiatna pawh lo thlengin tuar dawn mahila,  kan tan lawmna  leh hlimna tur a awm zêl dawn a; kan mamhawh tawk zelin chakna leh theihna Pathianin min pe dawn tih hi min hrilh a ni.