Tuarna leh hreawmna chungchanga Pathian thuchah: Joba nun atangin

Thuthlung Hluiah hian Joba bu hi thuziak tha leh mawi ber te zing a mi a ni a, Hebrai Bible ah chuan ‘Iyyob’ tia ziakin a awmzia chu ‘tihduhdah tuar’ tihna a ni. Septuagint ah ‘Iob’ tia an ziah chu Vulgate leh English Bible ah ‘I’ hi ‘J’  a thlakin Mizo Bible ah pawh Joba tiin kan hmang zui ve ta zel a ni.

Joba bu ziak hun hi zirmite chuan kum zabi 5-4 BC vela an ziak a nih an ring ber a; a ziaktu hi chiang taka hriat theih ni tawhlo mahsela Hebrai mi ngeiin a ziah a nih an ring.  

Tunge Joba?

Joba bu thuhmahruai a kan hmuh angin Joba chu Pathian tih mi tak leh mi dik tak a ni tih kan hmu a. Khawchhak mi, Uz rama cheng niin Pathian malsawmna tam tak dawngin mi hausa tak leh fing tak a ni a. Septuagint chuan Edom lal Ishaodad-a niin a sawi a, Israel mi nge, Edom mi nge a nih chiang takin hriat a harsa tawh a. A pawimawh ber erawh chu Joba hi Pathian tih mi, mi fel ta, mi hausa tak leh hreawmna nasa tak tuar chung pawha Pathian phatsan duhlotu a ni tih hi a ni.

Eng nge Joba bu hian min zirtir a tum?

Joba lehkhabu a Pathian thu min chah pawimawh tak mai hi kan hre sengin kan hre zo vek dawn hauhlo a, a langsar zual leh kan tunlai khawvel boruak tawn mek (Covid -19) enmil chungin sawi ta ila-

Tuarna zawng zawng hi hremna a nilo: Joba bu a thil lang chiang em em chu mifel tawrhna nasa tak hi a ni. Thuthlung Hlui lama mithiam tak Samuel Rolles Driver chuan Joba bu hian Pathian thinurna chhinchhiahna bulpui ber chu tawrhna hi ni a kan ngaihdan hnialna hi a ni a ti a. Thuthlung Hluiah chuan tuarna lo thleng reng reng hi sualna vanga Pathian hremnaah an pawm thin a. Joba bu atang hian mihringte tawrhna chhan hi hriat zawh vek theih a nihloh zia Joba bu ziaktu hian tarlan a tum ber niin a lang.

Mi tha tak tak leh fel tak te te hian harsatna tam tak an an tawk a, mi sual tak ni a kan hriat te pawhin malsawmna tak tak an dawng thin. Kan chunga tuarna lo thleng thleng zawng zawng hi kan sual bik vang emaw, Pathian min hremna emaw a ni vek lo tih Joba atang hian chiang takin Pathianin min hrilh kan ti thei awm e.

Kan sualna avanga tawrhna hi Pathian atanga lo thleng chu a awm ngei a, chutih rual chuan mi dik tak chungah pawh a thleng thin tih Joba bu leh kan nitin nunah hian kan hmu chiang hle awm e. Tuarna hi kawng khat chauha hrilhfiah zawh sen a nilo a, Pathian thuruk hi mihringte finna leh theihna hmanga hriatchhuah zawh leh chhui sen zawh rual a nihloh zia te pawh Joba bu atang hian kan hre fiah leh zual awm e.

Dikna leh felna bulpui Pathian: Pathian chu dikna leh felna bulpui Pathian a nih zia Joba buah hian kan hmu chiang hle a. Amah vanga dik taka awmte leh tuarna tam tak paltlang tute chu a tawpah malsawmnain Pathian hian a vur ngei dawn tih pawh kan hmu chiang hle. Dik taka nun hman te, fel taka nun hram hram te hian awmzia a neiin a tlo zia leh chatuan daih thil a kengtel a ni tih Joba buah hian kan hmu chiang hle.  

Joba’n fiahna leh tuarna karah pawh chhel takin Pathian a ring lui tlat leh a tawrhchhelna te hi keini ringute hian kan entawn tur leh min chona pawimawh tak a ni tih kan hriat nawn a tul hle.

Pathian chungnunna hriatchian: Kan tawrhna leh kan chunga harsatna lo thleng zawng zawngte hi hrilh fiah emaw chhuichhuah vek emaw tum aiin Pathian kuta dah thiam a tul zia leh a ngaihzia pawh Joba bu atang hian chiang takin kan hmu thei a ni. Harsatna leh manganna tawp khawk kan tawrh lai pawhin Pathian ring tlat tur leh A hnena tlu lut tawp mai tur kan nih zia te hi Joba bu atang hian i hre nawn thar ang u. Kan duh dan leh kan ngaihdan, kan finna ringawt hmangin Pathian thuneihna leh remruatna hi kan chhui chhuah vek theih a nihloh zia a lang chiang hle.

Tuarna chungchangah hian mi tamtak chuan Pathian a awm te kan rinloh phah hial thin a, Pathian nihna tak tak kan hriatchianloh vang leh kan rin dan leh kan hriatthiam phak chauha Pathian hi kan chunga rorel tura kan ngaih thin vang hian Pathian lakah hian kan vuiin kan ringhlel thin a ni.   Mahse Joba bu atang hian Pathian chungnun zia  leh engkim chunga thuneitu a nihnate, mihring anga awm tan ni leh hriatphakloh neilo Pathian, engkim hre vektu leh engkim chunga leng Pathian a nih zia kan hre chiang awm e.

Kan tun khawvel hman mekah Hripuiin khawvel min run a, kan hmalam hun zel tur kan hrelo. Kristian te thlirna zawn atangin Pathianin khawvel min hremna anga ngai tawk te, Pathian lo kal lehna hnaih tawhzia tarlanna anga ngai te kan awm a, a diklo kan intihsak thei hauhlo ang.

Joba bu atanga zirtur kan tarlan tlemte leh famkimlo tak atang hian Pathian hi kan hriatchian nawn a, engpawh kan chungah thleng se chhel taka ring mai tur kan nih zia te leh kan tuarna zawng zawng hi hremna a nilo tih te kan zir chhuah thiam a pawimawh awm e.

Pathian hi kan hriatthiam phak baka ropui leh thunei Pathian a ni tih erawh kan hre reng tur a ni. Hausakna, sum leh pai leh a thalam ringawta kan dam chhung nun min hman tir tum Pathian kan belo a, engpawh kan chungah thleng se a tawp thlenga awmpui min tiamtu Pathian, chatuan nunna min petu a ni tih kan hre reng tur a ni.