Bible zirnaah chuan Thuhriltu hi finna
lehkhabu (Wisdom literature) huangah dahin Hebrai Bible ah chuan 'Qoheleth' ti
a ziakin a awmzia chu 'thuhriltu' emaw 'inkhawmna hruaitu' emaw tihna a ni a.
Chu chu Greek tawng Bible Septuagint ah 'Ekklesiastes' tiin an ziak a, Vulgate
leh English Bible in 'Ecclesiastes' tiin an ziak chhawng ve leh a. Thuhriltu
leh inkhawmna hruaitu chu thuhmuna ngaih a nih avangin Mizo Bible ah pawh
'Thuhriltu' tiin kan hmang ve ta zel a nih hi.
He lehkhabu ziah dan kalhmang hi fel tak
niin thu leh hla inpawlh, thu hmahruai leh a tawp kharna fel tak neia ziah niin
a tarlan tum ber chu mihring nun awmzia hi eng nge a nih chiah tih hi a ni.
Tu ziah nge?
Thuhriltu buah hian a ziaktu hming hi
chiang taka tarlan nilo mahse Davida fapa, Jerusalem Lal in a ziak tih erawh
kan hmu a, Solomon-a lo chu chuti ang mi midang an vang hle tih erawh kan hre
thei nghal awm e. Kristian hmasa te leh Judate chuan Solomon-a ziah ngei a nih
an ring a, Lazare Eliezer Wogue, French Rabbi chuan Thuhriltu hi Solomon-a ziah
ngei a nih a ring bawk.
Chutih rual erawh chuan mi thiam tam
takin chik taka an zir chuan Thuhriltu hi Solomon-a ziah a nih an ring meuhlo
a; a chhan lian tak pakhat chu an tawngkam hman tam tak hi Solomon-a hnu lam
tawngkauchheh ni a an hriat vang a ni. Mi thiam thenkhat chuan Grik ho nunphung zeh tel a nih avang hian BC
200 vela ziah a nih an ring a, Jamnia inkhawmpuiah Juda Rabbi kalkhawm te chuan
AD 90 vel khan Bible a telh turin an pawm niin an sawi. A pawimawh ber erawh chu Thuhriltu hian
mihring nun hi a hmu chiangin fiah takin a tarlang a ni tih kan hre awm e.
Eng
nge min zirtir a tum?
Thuhriltu-ah hian mihring nun awmze
chhuina chi hrang hrang kan hmu a; a thlirna atang chuan engkim mai hi
Pathianin a ruahman a, chu chu mihringin a hre phak lo a, engkim mai hi a lo
thlawn vek mai a ni. Chuvangin mihringin kan tih theih awm chhun chu Pathian
tih leh a thuawih hi a ni tawp mai a ni. He lai thu hi Thuhthlung Thar lama Lal
Isua min zirtirna nen pawh a inmil hle tih kan hre awm e.
He lehkhabuin thupui ber a a neih chu
Pathian tih leh a thupek zawm hi a ni a, chu chu mihringte mawhphurhna a nih
thu a sawi bawk. Pathian tihna tello chuan nun hian awmzia a neilo a, thil
engmah hian hlutna a neilo a, engkim hi engmahlo mai a ni tih fiah takin min
hrilh a ni.
Thalaite tan pawh thuchah pawimawh tak
mai min hnuchhiah a. Engtin nge kan that lai leh kan vanglai te hi kan chen ang?
Kan chunga roretu tur Pathian tih chung leh a thupek te awih chuanga kan
thatlai leh kan vangalaite hi chen turin min chah a nih kha (11:9). Kan inchhirna
tur leh kan dam chhung hun zawng zawnga hreawmna leh phurrit tak phur chunga hun
kan hman lohna turin Thuhriltu hian keini thalai zawng zawngte pawh hi min chah
a ni tih kan hriat nawn a tul hle awm e.
Pathian tihna nun chu nun dan tha ber
leh mihringte kan dam chhan bul ber tur a nih thu chiang takin min hrilh a. Nawmsakna
chu hreawmna leh beidawnna laka min chhantu a nih thu a sawilang a, mahse chu
pawh chu a petu Pathian hnenah lawmthu kan sawi leh siloh chuan engmah lo mai
mai a nih thu min hrilh chiang hle.
Thurhriltu thlirna atang chuan a thim
zawng lam hlirin mihring nun hi a thlir emaw a tih theih a, chutih rual chuan
beiseina min pek chu Pathian chu roreltu leh mi thate lawmman petu a nih zia
chiang takin min hrilh tel a nih kha (3:17, 8:12, 13). Hei hi keini Kristiante
phei chuan kan thurin bulpui ber pawl a ni pawh kan ti thei awm e.
Kan sawi zo senglo a, kan sawi vek thiam
dawn heklo. Mahse Thuhriltu hian a tawnhriat atanga mihringte nun dan tur leh
kan nun awmzia chiang taka a tarlan te hi ngaihtuah nawn ta theuh ila. He
khawvel a Pathian rorel dan tur leh ruahmanna zawng zawng hi kan hriatthiam ve
vek phak a nihloh zia te, Pathian telloa nun hi awmze neilo leh engmahlo mai a
nih zia te hrenawnin leh tun kan boruak tawn mekah pawh hian Pathian chu kan
inngahna awmchhun leh a tawp a nih zia te i hre thar ang u.
👍🏻👍🏻👍🏻
ReplyDelete