Covid -19 vanga khawvel
kan buaina hian Pathian kan biak dan thlengin nghawng a nei chho a; Mizoramah
ngei pawh Biak in khar ngai hial khawpin min tibuai a ni tih hre vek tu kan ni.
Chutih karah chuan he hripui leng mekah hian Pathian hian eng nge tum a neih a;
eng nge min zirtir chhuah a tum tih hi ngun taka kan ngaihtuah erawh a tul takzet
a ni.
Khawvel ram hrang
hrangah he hripuiin mipuite a nghawng dan leh kan dawn sawn dan a in anglo a.
Keini Mizoram, Kristian ramah chuan chhungkuaa Pathian kan pawl theihna hunah
Kohhran kaltlangin Pathianin rem min ruatsak ti ila kan sawi sual awmlo e.
Mizoram Kohhran leh Sorkar-in mahni inchhung atanga Pathian fak leh chawmiawi
hrih tura min hrilh hi Pathian thupek anga kan ngaih duh tlatloh erawh chuan
kan tisual hle ang.
Mi tamtak Harhna leh
Thlarau Thianghlim hming chawia pawn lama Pathian fak leh chawimawi duh tlat
kan awm hi a pawi hle. Pathian hian he hripui hi inkaidarh thei zawng leh kan
thih vek theihna a ni tih hre reng chunga a huho leh pawn lama Amah chawimawi
leh fak tura min tih a nih chuan a tir atang reng khan Kohhran hote hian Biak ina
a huhoa Pathian chibai buk hi an titawp hrih hauhlo ang.
Lal Isua Krista
khawvela a lo kal khan Pathian remruat chu Lal Isua Krawsa a thihna leh
thawhlehna kha a ni a. Chumi tihhawhlting tur chuan Isua zirtir Petera te ngei
pawhin Lal Isua an man avanga Puithiam lalber bawih Malka beng dinglam kha Lal
Isua chhanna turin sahthlak sak mahse Lal Isua’n a pawmlo a. Petera chetdan hi
Lal Isua zuitu diktak chet dan tur ni ngeia a lan laiin Pathian remruatna tichhe
thei a nih avangin fak leh sawi zui hlawhloin Lal Isua’n Petera kha a zilh zawk
a ni.
Thuthlung Thar hunah
Lal Isua’n kan awm dan tur leh Pathian thuchah kan hriat zel theihna turin Kohhran
min dinsak a. Chu Kohhran chu Lal Isua’n ata a nih thu leh a taksa a nih thute,
thuneihna sang tak – Vanram Chabi hial pawh a pek a ni tih kan hmu a. Chu
Kohhran, Lal Isua taksa ngei chuan keini Mizoram ringtute hi mahni inchhungah
kan chhungkuaa Pathian fak tura min tih laia pawn lam leh a huhoa Pathian fak
hi Pathian remruat a ni ang em? Petera’n Malka beng a sahtlak sak ang leka Pathian
thiltum diktak dalna hmanrua mai a nilo maw?
Khawvel ram dang chu kan
sawi thei hauhlo ang a, he hripui leng mek vanga Mizoram kristiante tana
Pathian remruat chu kan inah, kan chhungkuaa Pathian chibai buk hi a ni tih kan
hriat nawn a va tul teh lul em! Kohhran leh Sorkar kaltlangin Pathianin Mizote
hi he hripui laka kan himna tur leh kan dam khawchhuah theihna turin kan tihtur
min hrilh a. A bak thil dang kan rilrua awm hi Tharau Thianghlim hnathawh a
nilo tih kan hriat a ngai a ni. Kohhran kaltlangin Tharau Thianghlimin kan
tihtur min hrilh chu - kan chhungkuaa
kan inah Pathian chibai buk hi a ni.
Kohhran thu hnial zawng
leh kalsan zawnga harhna leh pawlna chana kal hrim hrim hi a tlo rei ngailo tih
hre chiangtu ber chu keini Mizote hi kan ni awm e. Pathian khawngaihnain
Mizoramin Harhna vawi tamtak kan lo dawng tawh a. Chung harhna changtute zingah
chuan Kohhran thuawih chung zela harhna chang te hi vawiin thlenga Pathian mi
hman chhunzawm te an la ni zel tih hrechiang ber tute kan ni.
Kohhran thu zawm
theilo, Kohhran duh khawplo leh nek zawnga harhna changa kal te reng reng hi
Pathian Tharau Thianghlim hian a chenchilh zui zel khat khawp mai a. A tawpah
chuan engmah niloah an chhuak a, hman zui tlaklohah an chhuak zel tih hi hun kal
tawhah pawh chiang takin a lang a ni.
Nangmahah a huho leh
pawn vak chhuak chak zawnga a thawh tlat pawhin Pathian leh kohhran aw ngaichang
la. Pathian hian a huhoa Amah chibai buk tura min ti a nih chuan A aiawha a dah
Kohhrante hi a hriattir hmasa ber ang tih hi lo ringhlel ngai suh. Pathian fak
leh chawimawi ni a i inhriat lai hian Pathian hanthawh leh thiltum dik tak
daltu, mi tamtak nunna suattu hmarua lek i ni palh thei tih in hre reng rawh.
Tuna chiang taka he
Covid-19 vanga Mizoram bika Pathian thiltum chu –kan chhungkuaa kan ina Pathian
chibai buk a ni – a huho niloin. Chu chu Kohhrante kaltlanga Pathianin min
hrilh a ni.
Comments
Post a Comment