Pa entawn tlak Roger Federer

Mipa Tennis khawvelah hian tunge ropui ber ang tih hi inzawt ta ila; mi tam tak chuan Roger Federer hi a ni kan ti ngei ang. Chutih rual chuan Rafel Nadal leh Novak Djokovic te pawh hi – an record/statistic kan en chuan dah hniam theih an nihloh zia pawh kan hria ang a, Federer record ropui tak khum thei dinhmunah pawh an ding mek a nih hi. Amaherawhchu Roger Federer hi chuan mi rilru a hneh ber tiila kan sawi sual awmlo e.

Roger Federer hi kum 1981,  August ni 8 ah Basel, Switzerland ah lo piangin a pa hi Robert Federer niin a nu chu South African lam mi Lynette Du Rand a ni a. Kum naupangte a nih lai atangin Federer hian infiamna lam a ngainain a tuipui nghal hle a. A bikin Tennis hi a tuipui-in a thiam hle a; kum 11 chauh a upa a nihin Switzerland Junior Tennis Players Top 3 a lang phak khawp a thiam a ni tawh a. Tennis palyer hrang hlui Boris Becker, Stefan Edberg leh Pete Sampras  te hi a ngaihsan leh a entawn te an ni.

Kum 1998 Junior Wimbledon title a la a; chuta tang chuan hmasawn zelin kum 2001 ah a hun laia Tennis player thiam ber pawl Pete Sampras chu Wimbledon fourth round ah a hneh a. Kum 2003 ah chuan Wimbledon ah champion in Swiss mi leh sa, Grand Slam title la thei hmasa ber niin a bak zawng chu ‘history’ a ni. Tunah hian Grand Slam title 20 zet la tawhin khawvel ‘record’ ni mek a ni tih kan hre awm e.

Kum 2009 ah khan Mirka Vavrinec chu nupuiah neiin a nupui pawh hi professional tennis player thin a ni a. Fa hi phir vawi hnih ngawt mai – Myla-i leh Charlene-i/Leo-a leh Lenny-a an neiin tunah hian in Bottmingen, Switzerland an a cheng mek a. Khawvel Tennis palyer hausa leh lar tak a ni chung hian hminghliauna leh chanchin mawilo nei miahloa a hun a hmang thei te, tennis court chhunga a nungchang mawi tak mai te hi mite ngaihsan chhan leh an thinglung hnehtu ber a ni kan ti thei awm e.

Heti taka khawvel ngainat rawn leh ngaihsan rawn a nih vang te pawh a ni ang – an ram Switzerland chuan an ram pawisa 20 franc-ah leh Stamp ah Roger Federer thla hi an chuan tir kulh mai a; Swiss mihring damlai thla pawisa-a an chuantir hmasak ber a ni nghe nghe.

A nun atanga zirtur kan neih thenkhat te lo tarlang ila-

Hawlhchham hlau suh: Hlawhchham hlauh lohna rilru hi infiammite leh mihringte tana tha ber a ni a. Kum 2011-ah khan Federer chuan Djokovic chu Australian Open semifinal-ah a hnehlo a. Mahse chuvang a hlawhchham ta anga inngailoin leh hlauthawng miahloa hmalam pan chhunzawmin kum 2012 khan Djokovic chu Wimbledon-ah a hneh ve thung a nih kha. 

Keini pawh kan thiltih vawikhatah kan hlawhtlinglo a nih pawhin beidawnglo a beih chhunzawm zel hi hlawhtlinna bul ber a ni. 

Mahni inringtawk rawh: New York Times chuan Federer- a inkhelh dan hi ‘ game thatho lo, zawi leh nguai’ tiin a lo sawi tawh a, a inkhel en thinte chuan kan hrechiang hle awm e. Hmanhmawhlo tak leh hahdam taka inkhel thin  a ni a; chu a inkheldan phung nghet takah chuan mahni inringtawk taka awmin tun hi a thleng a ni. Nangpawh mi dang nen in inanglo ang; mahse nangmah inringtawk tak chungin hmalam pan zel ang che.

I hna leh i nun ngaipawimawh rawh: Inelna zawng zawnga tel vek hi Roger Federer hian a ti ngailo a; a kum a upat hnuah phei chuan Tennis inelna zawng zawngah a tel tawh ngailo. A khup a hliam a neih lai khan a chhungte nen hun hmangin Australia-ah zinin chawlh a hmang a. Kum 2017 a Wimbledon a khelh pawh khan a nupui fanaute nen Wimbledon ah hian an cheng a. Tennis hi a pawimawh em em rualin ka tan engkim erawh a nilo-tiin a sawi a. Nangpawh i chhungte tan hunawl neih tum ang che. I hna leh i chhungkua ngaipawimawh ang che.

Mahni inthunun rawh: Roger Federer hi hun harsa leh hlimawm tak a tawh lai pawha mahni inthunun thei ber zing a mi a ni tih kan hre awm e. A game khelha a chet that emaw a chet chhiat emaw hian rilru fim tak leh chiai miahloin a awm thin tih kan hre awm e. A tleirawl chhuah tirh khan racket paih leh sawisel te a han ching ve a; chuvang chuan a rilru leh a tha tamtak a seng ral thin tih hriain a sim hmak a. Thil tihsual leh tihdikloh te leh duhthusamlo thil te chu thleng ve reng tur a ni tih hrechhuakin, chung thilte nen chuan tawhho thiam a tul zawk zia sawiin tun lai khawvel imfiammite zinga entawntlak berah a inchhuah ta a nih hi.

Keini pawh kan hnathawhna leh kan nitin nunah mi min tihbuai changte, min sawisel changte, hlawhtlinna lawmawm tak leh hun lungchhiatthlak takte pawh kan tawng ang. Mahse chung hunah pawh chuan chi-ai loin mahni inthunun tlat tum ang u.  

I hlawhchhamna atangin inzir rawh: Hei hi Roger Federer thusawi ropui ber pawl leh a nun ngeiah pawh a taka langchhuak chiang ber a ni awm e. Kan hlawhtlinna aiin kan hlawhchhamna hian zirtur pawimawh zawk min hrilh tiin a sawi a. Hlawhchhamna chuan kan chaklohna leh kan mamawh diktak min tarlan sak a, chu chuan mi tha zawk kan nih theihna tura zirtur pawimawh tak min pe a ni tiin a sawi.

Keini pawhin kan tihsual atang ngei hian mi tha zawk, mi hlawhtling zawk leh mihring puitling zawkah kan insiam thei a. Chuvang chuan kan tihsual atang ngei hian inzir ang u.

A chanchin kan la hriatloh thenkhatte –

Roger Federer hi kum 14 a nih thleng kha chuan thlai chauh ei mi –Vegetarian a ni.

Tennis piah lamah hian football a tuipui em em a; tuihleuh pawh a thiam hle.

Piano tum a thiam em em bawk a; hunawl a neih chuan Piano hi a tum nasa thin hle.

Amah hi Roman Catholic niin kum 2006 khan Pope Benedict XVI nen an inkawm tawh bawk.  

FC Basel supporter niin an inkhel pawh a en ve fo thin a ni.

Kum 2003 Wimbledon a lak khan  bawngpui ‘Juliette’ an present!

Farnu Diana neiin unau mipa pianpui erawh a neilo.

Kum 2003, December thla atang khan Roger Federer Foundation dinin he Foundation hi naupang chanhaite tan a din a ni.