Fireproof

Kum 2008-a American Christian Drama Film 'Fireproof' hi Mizote hian kan en fur tawh ang a. Mizotawng pawhin Pachuau Pictures (LPS 11) te hian an letling a nih kha. He film hi nupa inkarah zirtir tha tak mai nei niin America ramah pawh beisei aia sang a film hlawhtling a ni a. Stephen Kendrick ziah niin Best Feature Film award  dawng pha hial a ni a.  September 26, 2008 ah tichhuah a ni a; sum tamtak la lutin kum 2008 chhunga Kristian film/drama tichhuah hlawhtling ber a ni nghe nghe. 

America ramah khuan nupa chungchang a buaina hi an harsatna lian ber a ni a. Nupa inthen an tamin chhungkaw kehchhia hi tam tak an awm a. Kristiante zingah pawh he harsatna hian bu a khuar nghet em em mai a. Chung nupa inkar harsatna chinfel dan film tha tak chu a nih vang te pawh a ni ang e - Fireproof hian hlawhtlinna nasa tak mai a chan. 

He film -a a changtupa ber Caleb-a (Kirk Cameron) hi Fire Department ah Captain niin nupui Catherine Holt-i(Erin Bethea), damdawi in enkawltu chu nupuiah a nei a. An hnathawhna hmunah chuan miropui leh pasaltha dinhmun luah pha khawpin an thawk tha a. Caleb-a pawh hian chawimawina a dawng nasain kang mei karah mi nunna tam tak a chhanchhuak thin. A nupui chu ngaihsak tawkloin Caleb-a chuan a nuam tih zawng leh mahni hmasial taka nungin an nupa nun aiin ama mimal nawmsakna leh duhzawng dah lalin hun a hmang thin a. 

Chuti ang renga chhungkaw nun hman chu Caleb-a nupui Catherine-i chuan a tlin talo a; inthen turin Ukil a ruai ta hial a. An nupa inkar chu a khi chat zau zel a; Catherine-i pawh chuan ngaihzawng dang a nei titih ta hial a. A pasal chu a hnathawhna leh pawnlamah chuan Pasaltha ni mahse a nupui tan erawh chuan Pasaltha a ni theilo a; beidawnna thlen tu a ni. Chuvang chuan inthen mailoh chu hmabak a awm ta lo a ni. 

Chuti ang boruak rit tak mai an tawn lai mek chuan Caleb-a thawpui Michael-a leh Caleb-a pa John-a te chuan an nupa inkar chu siamtha turin Caleb-a chu thurawn an pe a. Caleb-a pa John-a chuan ni 40 chhunga an nupa inkar siamthatna tur a hun hman dan tur chu pein harsa titak chungin Caleb-a chuan a pa thu zawmin an nupa inkar siamthat tum chuan tan a la ta a. Beidawn chang te, thinrim chang te a nei nasa em em a. Mahse a pa John-a chuan tawngtaina nen a fuih a; a tawpah chuan Caleb-a pawh chuan Pathian rinchhan chunga beiin an nupa inkar - inhmangaihna thi tawh chu Pathian rinchhan chungin a lo siam tha leh thei ta a. Kristian chhungkua, nupa inhmangaih tawn tak leh mite tan a entawn tlak niturin an hun an hmang dun thei ta a nih kha. 

America ram mai nilo - kan Mizoram khawvel leh kan chhungkuaah ngei pawh hian heti ang nupa inkar thalo; chhungkua-in a ruk a kan tawrh tlawk tlawk hi tam tak a awm ngei ang. Kan inngaihzawn lai anga inthlalhlel leh inhmangaih tawn tawh lo; fate kan neih tawh avanga inthen hreh si hi tam tak kan awm ngei ang. He film -a kan hmuh anga kan nupui pasal te aia mahni nuam tih zawnga kan hun leh rilru pe tam zawk; mobile phone khawih reng mai te, len vah nuam ti em em mai leh ngaihzawng dang nei hi tam tak kan awm ngei ang. Chumi rah chhuah chu uirena te, chhungkaw kehchhia leh fahrah te a ni a, a pawi hle.  

Inneihna hi a tir atang reng a Pathian remruat a ni a; Kristian kan nihna zawn atang phei chuan nupa inthen hi Pathian thuawihlohna sual lian tak a ni a, Pathianin inthen hi a haw hle tih Malakia 2:16 ah kan hmu. Pathian leh Kohhran hmaah dam chhungin - a hreawm emaw a nuam emaw thihnain min then hma loh chuan awm dun tlat tawh tura intiam si hian kan inthen leh thin a; a pawi hle. Kan inthenna chhan chu engpawh nise keimahni thiamloh tho tho a ni - nupa chu pumkhat kan nih tlat tawh avangin. 

Fireproof film tlawmte a kan hmuh ang hian Pathian hmangaihna leh Pathian rinchhan lo chuan kan nupui pasal te hi kan hmangaih reng theilo tih a lang chiang hle a. Kan inchhungkhurah Lal Isua'n hmun sang ber a chan tlat erawh chuan kan inhmangaih tawn tlat zel thei dawn a ni tih he film ah hian chiang takin kan hmu a. Bible-ah pawh Kolossa 3:18-21-ah nupa awm dan tur chiang takin kan hmu a. Inngaihtlawm tawn te, dawhtheihna te, fanau te nen pawha inpawh taka awm tur leh naupangte pawhin kan nu leh pa te thu zawm tur kan nih zia te kan hmu a ni. 

Kan nupa inkar leh kan chhungkua tichhe thei thil laka inthiarfihlim hram hram tur te, kan inlaichinna tichhe thei zawng zawng laka kan inthiarfihlim hi a pawimawh tak zet a. Tun lai khawvelah ngat phei chuan Mobile phone hian kan inchhungkhur min run a; kan inlaichinna pawh nasa takin a tichhe mek a ni. Chuvang chuan Pathian leh Kohhran te hmaa kan thutiam tawh te min tihhlawhchham tir thei zawng zawng hi paih bo a kan chhungkaw tana bul tan tha leh turin nu leh pa te leh naupang zawng zawng te kan insawm thar a ni. 

Lal Isua kan neih tlat chuan kan rethei emaw kan hausa emaw, kan hrisello emaw kan dam tha emaw chhungkaw nuam leh inhmangaih tawn chhungkua hi kan din ngei ngei dawn a. Tawngtaina nen atang kawpin kan nupa inkar chhe tawh tak mai din thar a hmangaihna par vul tir leh turin kan insawm tak meuh meuh a. He film tlawm tak Fireproof hi in nupa ngei a lo en ve turin ka sawm a che u.