“Chutiang bawkin in eng chu mi mit hmuhin eng rawh se; chutichuan, in thiltih thatte an hmu ang a, in Pa vana mi an chawimawi thei ang.” – Matthaia 5:16.
Pathian khawngaihnain kum thar, kum 2020 kan lo thleng leh ta a; kum thar chibai vek u le.
Kum hlui kal taah khan kan hunte kan duhthusam ang takin kan hmang zo thei kher lo mai thei. Mihring kan nih angin tlinglo leh sualin a luahkhah kan ni a. Chuvang chuan mi dangte pawisawi leh keimahni ngei pawh inchhir vawng vawng khawpa hun hman te pawh kum hlui lamah kan nei ang. Chung zawng zawngte chu kan siamtha thei tawhlo a; kum tharah erawh chuan kan tihsual te siam tha tur leh mi dangte tana malsawmna niturin kan inbuatsaih thei tih erawh hre rengin kum bul atanga tan la turin kan insawm nghal a ni.
A chunga Pathian thu kan tarlan Chanchin Tha Matthaia ziak bung 5:16 thu khi kan hre vek awm e. Matthaia ziak bung 5 thu hrim hrim hi – Kristian nive lo te pawhin an chhiar nasat leh mihring te nun dan tur (Ethical) atana pawimawh em em mai a ni a. India hnam pa Mahatma Gandhi pawh khan he thu Lal Isua zirtirna hi a chhiar nasain a nun kaihruaitu berah a hmang nasa hle niin an sawi thin.
Lal Isua pawh khan thu pawimawh tak a zirtir dawn avang khan thu chung ngatin a zirtir a. Juda zirtirtu (rabbi) te khan thu pawimawh bik leh uluk taka mi an zirtir dawn chuan an thu thin a; Lal Isua pawh hi Tlang chunga thu a sawinaah hian thu chung kherin a zirtir a; a pawimawh hle tihna a ni.
Tlang chunga Lal Isua thusawi/zirtirna hi sawi nawn ngailoin kan hre vek ang a; a chunga kan tar lanah khian khawvel eng kan nih thu min hrilh a. Heti anga tehkhin thu tawi (simile) hmanga zirtirna hi Juda Rabbi te khan an uarin Lal Isua pawh hian a hmang ve nual a. Juda ho tan chuan ‘khawvel eng in ni’ ti a Lal Isua’n a zirtir hi a fiah em em mai a; hmanlai Israel ram Palestina ramah mi naran in chuan tukverh bial pakhat- te tak te chauh lo chu kawngka dang an neilo a, a thim em em thin a. Chuvang chuan khawnvar chhit an mamawh hle a; an chhit tawh hnuah chuan a dahnaah bikah dahin a eng chu an chhhawr tangkai thin a ni.
Eng tangkai zia chu a hre chiang tute kan ni a; nikhat ‘current’ kan neihloh pawhin kan nunphung buai zia chu a tak ngei a hre vek tute kan ni. Chuvangin keini hi mi dangte tana eng- malsawmna thlentu nituirn kum thar atanga a tawp thleng a inbuatsaih turin kan insawm a ni.
Kum hlui leh kum kal tawh lamah te kan chhungkaw tana phurrit leh hnawksak, mi dangte tana harsatna leh buaina thlentu pawh kan lo ni tawh mai thei e. Engpawh chu nise kuminah erawh chuan mi dangte tana eng, eng leh zual ni turin kum tir atangin hun hman i tum ang u.
Kan eizawnna leh kan nitin hnathawh te, kan khawsak dan leh nunphung te, kan chhungkua te chu a in ang vek dawn hauhlo. Chuti rual erawh chuan kan awmna hmun a piangah mi dangte tana malsawmna thlentu erawh kan ni thei vek a ni.
Kan eng chu mi mit hmua eng turin Lal Isua’n min duhin min zirtir a. Chuti ang tur chuan kei mahni theuh hi kan pawimawh a; kan nungchang leh kan chetzia kal tlangin mi dangte’n kan nunah Pathian an lo hmuh phahin an lo chawimawi phah thei a ni tih Lal Isua’n min hrilh a. Chuti khawp chuan keimahni – kan nun hi a pawimawh tak zet a.
Kan chhungkua, kan hnathawhnaah leh mi dangte tan – ringlo mi leh hnam dangte lakah pawh Missionary hna kan thawh nghal theih chu kan nun hmangin a ni a. Mi dangte tana malsawmna thlentu, Lal Isua neitu leh zuitu kan nihna kan tihlan rual hian miin keimahni kaltlangin Pathian ropui zia an lo hmuh phah thei a ni tih kan hriat nawn a; mi dangte tan a eng, an kawng kawhhmuhtu leh chuti ang nun chu an neih ve theihna turin nang leh kei hi kan pawimawh zia kan inhriatchian nawn a ngai hle mai.
Chuvangin nang leh kei hi kumin kum thar atanga kum tawp thlengin mi dangte tana eng; malsawmna thlentu nih tumin bul tan ang aw tiin kan insawm a ni.
Comments
Post a Comment