Rawngbawlsak phutlo rawngbawl tu

Chanchin Tha Marka ziak 10:45 ziak kan chhiar chuan Lal Isua tawngkam ropui tak ‘ Mihring fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nana a nun pe zawk turin a lo kal a ni si’ tih kan hmu ang a. He thu vek hi Chanchin Tha Mathaia ziak 20:28-ah pawh kan hmu a nih kha.

Pathian thu zir mite chuan Marka 10:45 –na hi Marka ziakah chuan chang pawimawh ber lai a ni e tiin an sawi thin a. He thu a sawi chhuahna chhan bul ber chu Jebadaia fapa te pahnih Jakoba leh Johana te’n Lal Isua hnenah Lal Isua’n lal ram a din hunah chanvo ropui leh langsar taka awm an dil a nih kha. Mahse Lal Isua chhana atang hian an thil dil an hriatchian tawkloh zia leh he thil an dil avang hian zirtirte inkarah pawh inhriat thiam lohna a awm deuh niin a lang (Marka 10:41).

Lal Isua zirtirte zingah ngeiah pawh hian ropuina leh lansarh chakna hian hmun a luah a ni tih helai atang hian chiang takin a lang a. Lal Isua hnung zuia rawngbawltu leh thahnemngai tak anni a. Chuvang chuan Lal Isua hnenah hian nakina Lal Isua’n ram a la din turah chuan chanvo tha tak chan an dil a nih kha. Mahse Lal Isua chuan chu chu Ani pek theih a niloh thu hirlhin zirtir zawng zawngte a ko khawm a. Lal Isua chuan thihna a hmachhawn tur thu te, rawngbawlna awmzia leh Pathian ram awm zia te a lo hrilh fiah a nih kha.

Lal Isua chuan Marka ziak 10:43- a kan hmuh ang hian rawngbawltu dinhmun dik tak a lo hrilh fiah a. A tawngbul lamah ‘rawngbawltu’ chu ‘deacon’ tih a niin ‘engkimah chhiahhlawh’ tihna  a ni a. Chaw ei dawhkana rawngbawlna a kawk a; Thuthlung Tharah chuan Kohhran rawngbawltu sawina atan an hmang a. Chumi awmzia chu Pathian leh Kohhran chhiahhlawh annih vang a ni. Mahni indah pawimawh hmasa lo a midang tana inpekna hi Lal Isua’n ‘rawngbawltu’ awm dan tur min zirtir dan chu a ni. Chuvangin amah Lal Isua ngei pawh chuan mite rawngbawlsaka awm tur niloin, mi te tana nun pe zawk tura lo kal a nih zia a hrilh a. Chu nun chu ropuina dik a nih zia a sawi a ni.

 

Ropuina, zahawmna leh langsar leh lar nih duhna khawvelah kan cheng mek a. Chu chuan Lal Isua hnung zuia rawng kan bawlnaah pawh hmun thuk tak a luah a ni tih zep rual a awmlo. Thuhriltu lar, rawngbawltu lar leh mi ngaihsan rawn nih te hi kan chak fo a, a thente phei chuan a zawnin kan zawng titih hial thin. Chuti ang rilru kan put tawh chuan kan rawngbawlpuite thikna leh  anmahni elna leh erna hi kan hriatloh hlanin kan lo nei vat tawh thin.

Ram rolrelnaah leh mimal nun hrim hrimah pawh ropuina leh thuneihna duh reng reng hian kan hmanhlel fo a. Rawng kan bawlsak thin mipuite leh Lal Isua ber theihnghilh hian keimahni hi kan invulh lian a, tlawmna leh mite tana inpekna nun – Lal Isua’n nei tura min tih hi mausam thakin kan awm thin a, a pawi hle. Lal Isua hnungzuia Ama hminga rawngbawltu nisi hian Lal Isua min zirtir anglo takin kan rawngbawl tur hian mi kan beisei fo a, a pawi hle.     

Rawngbawlna nung leh tlo nei tur chuan keimahni ngei hi kan inchinral hmasak hi angai tih kan hriat nawn fo a tha hle. Mahni inhaivurna leh inlak milenna atana rawng hi kan bawl a nih chuan a tuartu chu keimahni leh kan rawngbawlsak mipuite hi a ni. Chu chu politics khawvelah hian chiang takin kan hmu thei awm e.

Kan ram roreltute pawh Kristian, Lal Isua thupek zawm tura kan piantirh atanga Sunday sikul a inzir chhuak vek kan ni a. Mahse a thupek te leh a thu kan zir te zawmlo a rawngbawlna chanvo kan chelh te kan hman thin avang hian hma kan sawn theilo a. Mahni leh chhungkhatte inhaivurna atan he rawngbawl hna hi kan hman thin avangin tun hi kan ni zo ta a, a pawi hle.

Lal Isua min zirtirna leh a thuchah te hi zir nawnin ngaihtuah chiang nawn ila. A taka nunpuitu leh Lal Isua ‘rawngbawltu – chhiahhlawh’ hi ni theuh ila. Chu chuan tun atanga hmuh theih khawpin kan nun leh kan rawngbawlnaah rah tha a chhuah ang a. Kan ram, kan kohhran, kan khawtlang leh keimahni ngei hian hma a sawn ngei ang.